برۋسيلوۆسكيدىڭ «قىز جىبەك» وپەراسى 86 جىلدان بەرى اباي اتىنداعى قازاق ۇلتتىق اكادەميالىق وپەرا جانە بالەت تەاترىنىڭ ۇلكەن ساحناسىندا قويىلىپ كەلەدى. قايعىلى ماحاببات, ادالدىق جانە قۇمارلىق تاريحى 26 جەلتوقساندا العاش رەت قايتا جاڭعىرادى, دەپ جازادى Egemen.kz.
پرەمەرا كۇندەرى «قىز جىبەك» وپەراسى رەجيسسەر - ميحايل پاندجاۆيدزە (رەسەي, ماسكەۋ), ديريجەر – قانات وماروۆ, سۋرەتشىلەر – سوفيا تاسماعامبەتوۆا مەن پاۆەل دراگۋنوۆ, حورەوگرافتار – گۇلجان تۇتكىباەۆا مەن ايگۇل ءتاتيدىڭ رەجيسسۋرا مەن ستسەنوگرافيادان تابىلعان ەرەكشە شەشىمدەرىمەن ەلىمىزدىڭ باس تەاترىنىڭ ۇلكەن ساحناسىندا جاڭاشا دۇنيەگە كەلىپ, جاڭاشا شىرقالادى.
«قىز جىبەك» وپەراسىنىڭ پرەمەراسى كومپوزيتور ەۆگەني برۋسيلوۆسكيدىڭ, سپەكتاكلدىڭ ءبىرىنشى رەجيسسەرى قۇرمانبەك جانداربەكوۆتىڭ جانە باس پارتيانى ورىنداۋشى قانابەك بايسەيىتوۆتىڭ 115 جىلدىعىنا ورايلاستىرىلعان. ولاردىڭ شىعارماشىلىعى قازاق ۇلتتىق وپەرا ونەرى مەن كاسىبي مۋزىكا مادەنيەتىنىڭ دامۋىمەن تىعىز بايلانىستى. «قىز جىبەك» ليريكالىق-ەپيكالىق وپەراسى-ۇلتتىق مۋزىكا ونەرىنىڭ التىن قورىن قۇرايتىن العاشقى قازاق وپەراسى.
ديريجەر ءۇشىن مۋزىكالىق ماتەريالمەن جۇمىس جاساۋدا پارتيتۋراعا تولىعىمەن ەنۋگە مۇمكىندىك بەرەتىن ەموتسيونالدى بايلانىستاردى, ءسوز تىركەستەرىن, ساحنانى ءتۇسىنۋ وتە ماڭىزدى. «قىز جىبەك» وپەراسىندا مەن ءۇشىن وسىنداي بايلانىس ءتۇرى ايەل بەينەلەرى بولدى.
مىسالى, جىبەكپەن اسسوتسياتسيالانىپ, بۇكىل وپەرادان وتەتىن «گاككۋ» باستى تاقىرىبى كەيىپكەردىڭ ەموتسيونالدى جاعدايىنا سۇيەنە وتىرىپ, ول بىردە تۇنىق ءارى سۇلۋ, بىردە قايعىلى دا بەيمازا, ياعني ءار ساتتە ءار ءتۇرلى ەستىلەدى», تەاتردىڭ باس ديريجەرى قانات وماروۆ.
«قىز جىبەك» وپەراسى – الەمدىك مۇرانىڭ قازىناسى. رومەو مەن دجۋلەتتانىڭ تاريحىنان باسقا, ادەبيەتتانۋشىلار بۇل جۇمىستا بۇكىل الەم ادەبيەتىنەن بىرنەشە سيۋجەتتىك جەلىلەردى كورەدى. مەن ورتا ازيادا, تۇركىمەنستاندا دۇنيەگە كەلگەندىكتەن حالىقتىق داستۇرلەرمەن جاقسى تانىسپىن, سول سەبەپتەن دە بۇل ماعان جاقىن ءارى تۇسىنىكتى. دايىندىق بارىسىندا مەن قازاق حالقىنىڭ مادەنيەتى تۋرالى كوپ نارسە ءبىلدىم جانە داستۇرلەردى ساقتاۋ قاجەتتىلىگىن جاقسى تۇسىنەمىن. سونىمەن قاتار, ءداستۇر ارناسىندا ماڭگى قالۋدىڭ دا ماعىناسى جوق ەكەنىن تۇسىنەمىن, ويتكەنى سپەكتاكل, ۋاقىت رۋحىنا سايكەس كەلمەي, قىزىقسىز بولىپ شىعۋى دا مۇمكىن», دەدى تەاتردىڭ قويۋشى-رەجيسسەر ميحايل پاندجاۆيدزە.
«قىز جىبەك» وپەراسىنىڭ جاڭا قويىلىمى – بۇل كوپتەگەن مۋزىكالىق ىقشامداۋلار اشىلعان ۇلكەن, تولىققاندى سپەكتاكل. وسىنىڭ ارقاسىندا سپەكتاكلگە «قىز جىبەك ءتۇسى» ساحناسى قايتا ورالادى.