بۇگىن تاراز قالاسىنداعى «دوستىق» ۇيىندە ءابۋ ناسىر ءال-ءفارابيدىڭ 1150 جىلدىعى مەن اباي قۇنانباي ۇلىنىڭ 175 جىلدىعىنا وراي ء«ال-فارابي جانە اباي: ۇلىلار ۇندەستىگى» اتتى عىلىمي-تاجىريبەلىك كونفەرەنتسياسى ءوتتى, دەپ حابارلايدى Egemen.kz.
اتالعان رۋحاني جيىندى جامبىل وبلىسىنىڭ اكىمى بەردىبەك ساپارباەۆ ءسوز سويلەپ اشىپ, جۇرگىزىپ وتىردى.
اۋەلى ءوز سوزىندە قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەت بۇل مەرەيتويدىڭ بۇكىل قازاق حالقى ءۇشىن عانا ەمەس, بۇكىل تۇركى دۇنيەسىنە ورتاق مەرەيتوي ەكەنىن, سوندىقتان دا قوس الىپتىڭ تويلارى - ۇلتىمىز ءۇشىن رۋحاني ورلەۋ جولىنداعى ۇلى مەرەكە دەپ ەسەپتەيتىنىن جەتكىزدى. سونىمەن قاتار, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى, اكادەميك عالىمقايىر مۇتانوۆ ۇلى تۇلعالاردىڭ ۇرپاق ءۇشىن ورىنى ءاردايىم ماڭىزدى ەكەنىن اتاپ ءوتتى.
سونىمەن قاتار, عالىمقايىر مۇتانوۆ قوس الىپتىڭ رۋحاني الەمىندەگى جاڭاشىلدىقتار, رۋحاني سىلكىنىس, جالپى ولاردىڭ ۇلى بولمىسى حاقىندا وي قوزعادى. ال, جالپىۇلتتىق «ەگەمەن قازاقستان» گازەتىنىڭ باسقارما توراعاسى, حالىقارالىق تۇركى اكادەمياسىنىڭ پرەزيدەنتى دارحان قىدىرالى اۋەلى بيىلعى جىلى مەملەكەت باسشىسى قاسىم-جومارت توقاەۆتىڭ پارمەنىمەن ەلىمىزدە ءال-فارابي جانە اباي سىندى ۇلى تۇلعالاردىڭ مەرەيتويى اتالىپ ءوتىپ جاتقانىن, ءال-فارابي الەمدىك اقىل ويدىڭ الىبى بولسا, اباي حاكىم الاش اقىل-ويىنىڭ تەمىرقازىعى ەكەنىن جەتكىزدى. سونىمەن قاتار, دارحان قىدىرالى بيىلعى جىلى «ەگەمەن قازاقستان» گازەتىندە ۇلى تۇلعالار حاقىندا كوپتەگەن عالىمداردىڭ ەڭبەكتەرى جاريالانعانىن, جالپى, ەكى الىپتىڭ ۇندەستىگى "تولىق ادام" ءىلىمى تۋرالى دا ايتىپ ءوتتى. اسىرەسە جاستاردىڭ ىزگى ادام بولۋعا قۇلشىنىسىن ارتتىرۋعا, جات ادەتتەردەن ارىلۋعا جەتەلۋگە ءال-فارابي مەن اباي سىندى ۇلى تۇلعالاردىڭ ۇلەسىنىڭ زور ەكەنىن ايتتى.
سونداي-اق ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ەرلان سىدىقوۆ اباي الەمىن اشىپ كورسەتۋ ماقساتىندا اتالعان وقۋ ورداسىندا كوپتەگەن جۇمىستار اتقارىلعانىن ايتسا, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى تاحير بالىقباەۆ ۇلى ءال-ءفارابيدىڭ رۋحاني الەمىن اشىپ كورسەتۋدە اقجان ماشانوۆ, ابايدى تانىتۋدا مەكەمتاس مىرزاحمەتوۆ سياقتى عالىمداردىڭ ولشەۋسىز ەڭبەك ەتكەنىن, سوندىقتان دا قازاق قوعامى ءۇشىن قوس الىپتىڭ ەسىمى اجىراماس ۇعىم ەكەنىن جەتكىزدى. ال, م.ح.دۋلاتي اتىنداعى تاراز وڭىرلىك ۋنيۆەرسيتەتى قازاق ءتىلى مەن ادەبيەتى كافەدراسىنىڭ وقىتۋشىسى, ابايتانۋشى راحات سالاماتوۆا دا ابايدىڭ ماڭگى وشپەس, ولمەس رۋحاني قۇبىلىس ەكەنىنە توقتالدى.
جيىندى وبلىس اكىمى بەردىبەك ساپارباەۆ بۇگىنگى كونفەرەنتسيا بارىسىندا ۇلى تۇلعالارىمىز تۋرالى تىڭ دەرەكتەر ايتىلىپ, ورەلى اڭگىمە وربىگەنىن ايتا كەلىپ, قۇرمەتتى قوناقتارعا ۋاقىت ءبولىپ كونفەرەنتسياعا قاتىسقاندارى ءۇشىن العىس ءبىلدىردى.