اقتوبەدە ءورت وقيعاسى كوبەيگەن

اقتوبە وبلىستىق توتەنشە جاعدايلار دەپارتامەنتى ماماندارىنىڭ حابارلاۋىنشا, بيىلعى جىلى وتكەن جىلمەن سالىستىرعاندا 4 ەسە كوبەيگەن ورتتەردىڭ  سالدارىنان كەلتىرىلگەن ماتەريالدىق شىعىن كولەمى دە 123 ميلليون تەڭگەگە ارتقان. سونىڭ ىشىندە جەكە تۇرعىن ءۇي سەكتورىنىڭ جالىنعا ورانۋى جيىلەپ بارادى. وعان نەگىزىنەن تۇرعىنداردىڭ قاراپايىم قاۋىپسىزدىك  ەرەجەلەرىن ساقتاماۋى, ەكىنشى جاعىنان  جىلىتۋ قوندىرعىلارى مەن  اقاۋى بار پەشتەر دە سەبەپشى بولعان. ال جىلىتۋ ماۋسىمى باستالعالى  گاز باللوندارىنىڭ جارىلۋى وقيعالارى جيىلەپ كەتتى. سوندىقتان دا تجد ماماندارى  گاز قۇيۋ بەكەتتەرىندە تولتىرىلعان گاز باللوندارىنىڭ تۇرعىن ءۇي جاعدايىندا ساقتالۋىنا ەرەكشە اباي بولۋ قاجەتتىگىن ەسكەرتەدى. 15 قاراشا كۇنى تاڭەرتەڭگىلىك ۋاقىتتا  حرومتاۋ قالاسىندا ءۇي ىشىندە گاز باللونى جارىلىپ, ودان تۇتانعان ورتتەن ء  بىر وتباسىنىڭ  ءتورت ادامى زارداپ شەككەن. وكىنىشكە قاراي سول ءۇيدىڭ وتاعاسى اۋرۋحاناعا جەتكىزىلگەن بويى  قايتىس بولدى.  وقيعاعا سىرتتا سالقىندا تۇرعان گاز باللونىنىڭ ۇيگە كىرگىزىلىپ,  جىلۋدىڭ اسەرىنەن ىدىستاعى  گاز كوندەنساتىنىڭ كوتەرىلۋى جارىلىسقا اكەلگەن.

اقتوبە وبلىستىق تجد باسقارما باسشىسى ەۆگەني وۆچارسكي تۇرعىندارعا  قاتتى ايازدا قاتىپ تۇرعان گاز باللونىن  ۇيگە كىرگىزۋدەن ساق بولۋ قاجەتتىگىن ەسكەرتەدى. ويتكەنى  باللون ىشىندە  جينالعان گاز كوندەنساتىنان قىسىم  كوبەيىپ, جارىلىسقا اكەلۋى مۇمكىن. بۇل جەردە گاز قۇيۋ بەكەتتەرىنىڭ دە كىناسى كوپ. بەكەت قىزمەتكەرلەرى  گاز باللوندارىن  85 پايىزدان ارتىق تولتىرماۋى ءتيىس بولسا دا, ولار قاراپايىم  تەحنيكالىق ەرەجەنى ساقتاي بەرمەيدى.  بىرەر كۇن  مارتوك اۋدانىندا دا وسىعان ۇقساس وقيعا قايتالانىپ, ايازدا تۇرعان باللوندى ۇيگە كىرگىزگەندە, جىلۋدىڭ سالدارىنان گاز تولتىرىلعان ىدىس جارىلعان. باقىتىنا وراي زارداپ شەككەن ادام جوق.

كوپ قاباتتى ۇيلەردە  تەمەكى تۇقىلىنان تۇتانعان ءورت وقيعالارى دا جيىلەپ كەتكەن.  وبلىستىق توتەنشە جاعدايلار دەپارتامەنتىنىڭ ماماندارى   جاس بالالاردى ۇيدە ەرەسەكتەردىڭ باقىلاۋىنسىز جالعىز قالدىرۋعا بولمايتىندىعىن قاتاڭ ەسكەرتەدى. 19 جەلتوقسان كۇنى كۇندىزگى ۋاقىتتا  اقتوبە قالاسىنداعى "باتىس-2" ىقشام اۋدانىنداعى كوپقاباتتى ءۇيدىڭ ءبىر پاتەرىن تۇتاس شارپىعان ورتكە جاس بالالار سەبەپشى بولعان. شاقىرتۋ تۇسكەن بويى قالاداعى ءورت قىزمەتىنىڭ بۇكىل قۇرامى تەگىس جۇمىلدىرىلىپ, 70 تۇرعىن  سىرتقا شىعارىلىپ, جالىن تەز ءسوندىرىلدى.

جاڭا جىل مەرەكەسىندە دە ءورت جيىلەيتىنى جىل سايىن قايتالاناتىن جاعداي. بىلتىر جاڭا جىل مەرەكەسىندە وبلىستا  15 ءورت وقيعاسى تىركەلگەن. مەرەكە كۇندەرى   پيروتەحنيكالىق زاتتاردىڭ سالدارىنان ءورتتىڭ تۇتانۋ قاۋپى جوعارىلايدى. قازىرگى كەزدە تجد ماماندارى مەن پوليتسەيلەر قالاداعى  پيروتەحنيكالىق زاتتار ساتاتىن دۇكەندەر مەن بازارلارعا ليتسەنزيالارىن تەكسەرۋ ماقساتىندا رەيد جۇرگىزۋدى باستادى.