ءوزىمىز وندىرگەن ءونىمدى وڭدەۋدىڭ ماڭىزى زور. نەگىزىنەن اۋىل شارۋاشىلىعىنا يەك سۇيەگەن ءوڭىر ءونىم وڭدەۋدىڭ اۋقىمىن كەڭەيتىپ كەلەدى. بۇل قارىمدى قۋات جامان تۇماۋمەن جاعالاسقان ەلدىڭ داستارقانىنىڭ بەرەكەسىن كەلتىرۋگە سەپتىگىن تيگىزۋدە.
بيىل وبلىس ديقاندارى كۇزگى جيىن-تەرىندى ۇيىمشىلدىقپەن وتكىزىپ, قۇت قامباعا مول ءونىم قۇيىپ الدى. بەرەكەنىڭ ۇيىرىلۋىنە اۋىل شارۋاشىلىعى تەحنيكالارىنىڭ ءبىرشاما جاقسارۋى سەبەپ بولىپ وتىر. اۋىل شارۋاشىلىعى داقىلدارىنىڭ بارلىق ءتۇرى بويىنشا 5,2 ميلليون توننا ءونىم جينالدى. ورتاشا گەكتار بەرەكەسى 11,8 تسەنتنەردەن اينالدى. جينالعان استىق كولەمى ىشكى قاجەتتىلىكتى تولىق كولەمدە, سونداي-اق, ەكسپورت الەۋەتىن 2-2,5 ميلليون توننا دەڭگەيىندە قامتاماسىز ەتۋگە مۇمكىندىك بەردى.
استىقتى ءوڭىر ءۇشىن ەڭ كەرەگى استىق كومبايندارى. قوڭىر كۇزدەگى قاربالاستا تەحنيكا تۇگەل بولعان جاعدايدا عانا كۇزگى جاۋىن-شاشىنعا ۇرىنباي, وراق ناۋقانىن ويداعىداي اياقتاي الاسىڭ. قازىر كوكشەتاۋدا «Kazrost Engineering» كومپانياسى قارقىندى جۇمىس ىستەۋدە. ءوندىرىس كولەمىن ارتتىرىپ, جىلىنا 800 كومباين قۇراستىرماق. جوباعا 7,5 ملرد تەڭگەدەن استام ينۆەستيتسيا قۇيىلعان. كاسىپورىن «ۆەكتور» جانە «Acros» ءتارىزدى الىمدىلىعى جوعارى استىق كومبايندارىن شىعارۋدا. بۇل كومبايندار القاپتاردا سىندارلى سىناقتان وتكەن تەحنيكالار.
– زاۋىت جاڭا ەكىنشى تسەحتىڭ قۇرىلىسى مەن ءوندىرىستى جاڭعىرتۋ ەسەبىنەن كولەمدى ۇلعايتپاق. ءبىر ايتا كەتەرلىگى, كومباين قۇراستىراتىن قوسىمشا تاعى 7 بىردەي بەكەت ۇيىمداستىرىلىپ وتىر, – دەيدى كاسىپورىننىڭ باس ديرەكتورى دارىن يمانمۇساەۆ, – كاسىپورىندى جاڭعىرتۋ ۋاقىتتان ۇتىپ, قۇراستىرۋ جۇمىستارىن جەڭىلدەتەدى.
جىل باسىنان بەرى زاۋىتتا 480 استىق كومباينى قۇراستىرىلعان. ونىڭ 400-دەن استامى ديقانداردىڭ قولىنا ءتيىپ, كۇزگى وراق جۇمىستارىنا قاتىستى. قازىر بۇل تەحنيكالارعا ەلىمىزدىڭ استىقتى وڭىرلەرىنەن سۇرانىس ۇزدىكسىز ءتۇسىپ جاتىر. ءسوز اراسىندا ءبىر كومبايننىڭ قۇنى 50 ملن تەڭگەنىڭ شاماسىندا ەكەنىن ايتا كەتەلىك. شەتەلدىك تەحنيكالاردان الدەقايدا ارزان ءارى جوندەۋگە دە ىڭعايلى.
– شەتەلدەن الىناتىن اۋىل شارۋاشىلىعى تەحنيكالارىنىڭ باعاسى قىمبات, – دەيدى اۋىل شارۋاشىلىعى ءمينيسترى ساپارحان وماروۆ, – وتاندىق ءوندىرىستى دامىتىپ, اۋىل شارۋاشىلىعى تەحنيكالارىن ءوزىمىزدىڭ شىعارعانىمىز الدەقايدا جاقسى عوي.
زاۋىتتا جالعىز كومباين عانا ەمەس, وزگە دە استىق تيەگىش, شالعى ءتارىزدى اۋىل شارۋاشىلىعى تەحنيكالارى شىعارىلىپ, ديقانداردىڭ قاجەتىنە ابدەن-اق جاراپ تۇر. ءوز تەحنيكامىز ءوزىمىزدىڭ كادەمىزگە جاراعان سوڭ اۋىل شارۋاشىلىعى ونىمدەرىن مولىنان وندىرۋگە سەپتىگىن تيگىزۋدە. ەندىگى ماسەلە, سول ءونىمدى ۇقساتۋ جايى. بۇل تاراپتا دا العا ۇمتىلعان تالپىنىس بار. ماسەلەن, استىق جانە مايلى داقىلداردى ساقتاپ, قايتا وڭدەۋمەن اينالىساتىن «Sinegor-Grain» سەرىكتەستىگى رەسەي مەن تۇركيانىڭ قازىرگى زامانعى قوندىرعىلارىمەن جابدىقتالعان. بۇل جەردە ءبىر مەزەتتە بيداي مەن مايلى داقىلداردى قابىلداپ, وڭدەيتىن ەكى جەلى بار. ەلەۆاتوردىڭ تاۋلىكتىك قۋاتى 30 مىڭ توننا بولسا, ديىرمەننىڭ مۇمكىندىگى ودان دا جوعارى. كاسىپورىن باسشىسى جاسۇلان ماديمۇحامەتوۆتىڭ ايتۋىنا قاراعاندا, بيىلعى شىلدە ايىندا استىق كەپتىرۋ جانە ديىرمەن كەشەندەرى ىسكە قوسىلعان. جوبانىڭ قۇنى 1 ملرد تەڭگە كولەمىندە. كەلەر جىلى ماي ءوندىرۋ جەلىسىن, قۇراما جەم ءوندىرىسىن قولعا الماق.
ءوڭىردىڭ ءونىم وڭدەۋدەن ءوڭى جاقسى. ماسەلەن, «كوكشەتاۋ ءسۇت زاۋىتى» سەرىكتەستىگى ءسۇت ونىمدەرىن شىعاراتىن جاڭا جەلىنى ىسكە قوسىپ وتىر. سول ارقىلى تاۋلىگىنە 50 توننا ءسۇت, ايران, قاتىق, قايماق, ىرىمشىك, قوسپا, قۇرت, سارى ماي ءتارىزدى ءسۇت ونىمدەرىنىڭ بىرنەشە ءتۇرى شىعادى. كاسىپورىنعا 1,5 ملرد تەڭگە كولەمىندە ينۆەستيتسيا سالىنىپ, يتاليالىق «سleverMahines» جابدىعى ورناتىلعان.
وسىلايشا, كوكشە وڭىرىندە ءونىم ءوندىرۋ مەن وڭدەۋدىڭ جاڭا بەلەسى باعىندىرىلۋدا.
اقمولا وبلىسى