پرەمەر-مينيستر اسقار مامين قازاقستان اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ سەلەكتورلىق وتىرىسىن وتكىزدى, دەپ حابارلايدى Egemen.kz.
سانيتارلىق-ەپيدەميولوگيالىق احۋال تۋرالى دەنساۋلىق ساقتاۋ ءمينيسترى ا. تسوي, ءدارى-دارمەكتەرگە باعا ساياساتىن مونيتورينگتەۋ جۇمىسى تۋرالى باسەكەلەستىكتى قورعاۋ جانە دامىتۋ اگەنتتىگىنىڭ توراعاسى س. جۇمانعارين, كارانتيندىك شارالاردىڭ ساقتالۋىن باقىلاۋ تۋرالى ىشكى ىستەر ءمينيسترى ە. تۇرعىمباەۆ, وڭىرلەردەگى جاعداي تۋرالى اتىراۋ وبلىسىنىڭ اكىمى م. دوسمۇحامبەتوۆ, پاۆلودار وبلىسىنىڭ اكىمى ءا. سقاقوۆ, قوستاناي وبلىسىنىڭ اكىمى ا. مۇحامبەتوۆ باياندادى.
قازاقستاندا كوروناۆيرۋس ينفەكتسياسىنىڭ تارالۋى باقىلاناتىن دەڭگەيدە تۇر. كوروناۆيرۋس ينفەكتسياسىمەن جاڭادان سىرقاتتانعانداردىڭ تاۋلىكتىك ءوسىمى 0,4%-دى, رەپرودۋكتيۆتىك كورسەتكىشى 0,9-دى قۇرايدى.
ينفەكتسيالىق توسەك ورىندارىنىڭ تولىمدىلىعى – 28%, رەانيماتسيالىق توسەك ورىندارىنىڭ تولىمدىلىعى – 20%. 5 ءوڭىر جوعارى جانە ورتاشا تاۋەكەل ايماقتارىندا ورنالاسقان, اتاپ ايتساق: اتىراۋ, قوستاناي, پاۆلودار, سولتۇستىك قازاقستان جانە اقمولا وبلىستارى. كەلەسى جىلعى قاڭتار-اقپان ايلارىندا جرۆي مەن تۇماۋدىڭ ءوسۋى اياسىندا كوروناۆيرۋس ينفەكتسياسىمەن سىرقاتتانۋ دەڭگەيىنىڭ ارتۋ قاۋپى بار.
وسىعان بايلانىستى ۆاك بىرقاتار شەشىم قابىلدادى:
2020 جىلعى 25 جەلتوقساننان باستاپ 2021 جىلعى 5 قاڭتارعا دەيىن ويىن-ساۋىق, سپورتتىق جانە باسقا دا بۇقارالىق ءىس-شارالاردى, ونىڭ ىشىندە جاڭا جىلدىق ەرتەڭگىلىكتەر مەن مەرەكەلىك كورپوراتيۆتەردى وتكىزۋگە تىيىم سالىنادى.
ەپيدەميولوگيالىق جاعداي تۇراقتالعانعا دەيىن «تەڭىز» كەن ورنىندا شەكتەۋ شارالارى كۇشەيتىلەدى.
بولشەك ساۋدا جەلىسىندە انتيكوۆيدتى دارىلىك زاتتاردىڭ باعاسىن ورتا ەسەپپەن 24%-عا تومەندەتۋ بويىنشا شارالار قابىلداۋ.
سونىمەن قاتار ءبىلىم بەرۋ ساپاسىن قامتاماسىز ەتۋ ماقساتىندا, ءبىلىم جانە عىلىم مينيسترلىگىنىڭ ۇسىنىسى بويىنشا, سونداي-اق قوعامنىڭ پىكىرىن ەسكەرە وتىرىپ, كەلەسى شەشىمدەر قابىلداندى:
وقۋ جىلىنىڭ III توقسانىنان باستاپ ءبىتىرۋشى سىنىپتار ءۇشىن (9,11,12 سىنىپتار) سانيتارلىق-ەپيدەميولوگيالىق تالاپتاردى ساقتاي وتىرىپ, ارالاس وقىتۋ (پاندەردىڭ 70%-ىن – ءداستۇرلى فورماتتا, 30%-ىن – قاشىقتان) قاراستىرىلسىن;
وقۋ جىلىنىڭ III توقسانىنان باستاپ مەكتەپ وقۋشىلارىنىڭ بىلىمىندەگى ولقىلىقتاردىڭ ورنىن تولتىرۋ ماقساتىندا ساباقتان تىس ۋاقىتتا 5 ادامنان اسپايتىن توپتاردا جەكە كونسۋلتاتسيا ۇيىمداستىرىلسىن;
II سەمەستردەن باستاپ كوللەدجدەر مەن جوعارى وقۋ ورىندارىنىڭ ءبىرىنشى كۋرس ستۋدەنتتەرىن ارالاس وقىتۋ قايتا باستالسىن.
ۇكىمەت باسشىسى اكىمدەرگە وڭىردەگى ەپيدەميولوگيالىق جاعدايعا بايلانىستى جاعدايدى تۇراقتاندىرۋ ماقساتىندا قاجەتتى شەكتەۋ شارالارىن قابىلداۋدى تاپسىردى.
پرەمەر-مينيستر اكىمدەردىڭ نازارىن قوعامدىق ورىنداردى, مەكتەپتەر مەن بالاباقشالاردى ساپالى سانيتارلىق وڭدەۋ, سونداي-اق ەگۋ پۋنكتتەرىن ۆاكتسيناتسيالاۋعا دايىنداۋ قاجەتتىگىنە اۋداردى. ىشكى ىستەر مينيسترلىگىنە اكىمدىكتەرمەن بىرلەسىپ, مەرەكە الدىنداعى جانە مەرەكە كۇندەرى سانيتارلىق-ەپيدەميولوگيالىق تالاپتاردى ساقتاۋدى قامتاماسىز ەتۋ تاپسىرىلدى.