جەزقازعانداعى تاريحي-ارحەولوگيالىق مۋزەيدەگى قۇندى جادىگەردىڭ ءبىرى –اقىن, سەگىز قىرلى, ءبىر سىرلى ونەر يەسى تايجان قالماعانبەتوۆتىڭ سىرنايى. مۋزىكالىق اسپاپتى مۇراجايعا 2017 جىلى تايجان اقىننىڭ نەمەرەسى تەمىرحان قالماعانبەتوۆ «تاريحتا ءوز اتىڭدى قالدىر» اكتسياسى اياسىندا ۇيىمداستىرىلعان ءىس-شارا بارىسىندا وتكىزىپتى.
– سىرناي 1912 جىلدىڭ ءساۋىر ايىندا ورىنبور گۋبەرنياسىنداعى ترويتسك قالاسىندا تۇرعان الەكساندر يۆانوۆيچ دەگەن شەبەردىڭ قولىنان شىققان ەكەن. اسپاپتىڭ ءتۇسى قوڭىر. نەگىزگى سۇيەگى اعاشتان جاسالعان. گۇل بەينەسىندەگى ورنەكپەن بەزەندىرىلگەن, – دەيدى مۋزەيدىڭ اعا عىلىمي قىزمەتكەرى ا.جانبوسىنوۆا.
تايجان قالماعانبەتوۆكە اقىندىق, سازگەرلىك ءارى ورىنداۋشىلىق قاسيەتتەر قاتار دارىعان: ونەرپاز دومبىرادا شەبەر ويناعان, قوبىزدى دا قۇيقىلجىتقان. ال سىرناي تارتۋدى كوكشەدەگى ناعاشى جۇرتى – ۇكىلى ىبىرايدىڭ اۋىلىنا بارىپ جۇرگەنىندە ۇيرەنىپتى.
ەسكە سالار بولساق, تايجان پوەزياسىن قازاقتىڭ كورنەكتى اقىنى كاكىمبەك سالىقوۆ عىلىمي تۇرعىدا زەرتتەگەندەردىڭ ءبىرى بولدى. قايراتكەر تۇلعا 2004 جىلى جارىققا شىققان «ساق-ساق كۇلسىن سىرنايىم» جيناعىندا ونەرپاز اقىن تۋىندىلارىن كەڭىنەن قامتىدى. سول جىلى «اقىن تايجان» اتتى ليريكالىق پوەماسى ەنگىزىلگەن «اقىن تايجان» اتتى ەكىنشى جيناعى جارىق كوردى.
قاراعاندى وبلىسى