قوعامدىق ءتارتىپتىڭ ساقتالۋىن قاداعالايتىن پوليتسەيلەر كەيدە قورعانسىز جانعا دا الدىمەن قولۇشىن سوزادى. سونداي پوليتسيا قىزمەتكەرىنىڭ قاتارىندا الان تۇرلانوۆ تا بار. بيىل 25 جاسقا تولعان ينسپەكتوردىڭ ءبىر جىل بۇرىن تۋعان كۇنىندە ارىپتەسىمەن بىرگە بەس ادامدى ورتتەن قۇتقارعانىن كوپشىلىك بىلمەۋى مۇمكىن.
ول بالا كۇنىنەن قۇقىق قورعاۋ سالاسىندا جۇمىس ىستەۋدى ماقسات ەتتى. ءسويتىپ بۇدان التى جىل بۇرىن كاسپي ماڭىنىڭ وسى زامانعى كوللەدجىن «قۇقىقتانۋشى» ماماندىعىن ءبىتىردى. كەيىن قارۋلى كۇشتەر قاتارىندا بورىشىن وتەدى. اسكەردەن ورالعان سوڭ ىشكى ىستەر دەپارتامەنتىنىڭ قۇرىلىمىندا تاعىلىمدامادان وتۋگە بەل بايلادى. ال 2017 جىلى ىشكى ىستەر مينيسترلىگىنىڭ م.بوكەنباەۆ اتىنداعى اقتوبە زاڭ ينستيتۋتىنا تىڭداۋشى بولىپ قابىلداندى.
ونىڭ ايتۋىنشا, پوليتسيا قاتارىنداعى قىزمەتى ميگراتسيا باسقارماسىنىڭ زاڭسىز ميگراتسياعا قارسى كۇرەس ۆزۆودىنىڭ كىشى ينسپەكتورى رەتىندە باستالىپتى. كەيىن اتىراۋ قالالىق پوليتسيا باسقارماسىنىڭ جول-پاترۋلدىك پوليتسيا باتالونىندا جالعاستىردى. قازىر اتالعان قۇرىلىمدا ينسپەكتور بولىپ جۇمىس ىستەيدى.
– بىلتىرعى 24 قازاندا تاڭەرتەڭ پوليتسيا كىشى سەرجانتى تالعات وتەشقاليەۆپەن بىرگە كەزەكشىلىكتە جۇرگەن ەدىك. اۆانگارد-2 شاعىن اۋدانىنداعى بەس قاباتتى تۇرعىن ۇيدەن شىققان ءورتتى بايقادىق. ءورت تۋرالى توتەنشە جاعدايلار دەپارتامەنتىنىڭ ديسپەتچەرلىك پۋلتىنە حابارلاپ, ادامداردى جەدەل قۇتقارۋعا ۇمتىلدىق. ءبىز كوپ قاباتتى ۇيگە كەلگەندە كىرەبەرىستى قويۋ قارا ءتۇتىن تۇمشالاپ تۇردى. سوعان قاراماستان ارىپتەسىممەن بىرگە ورتەنىپ جاتقان پاتەردەن ەكى ايەل مەن ءۇش بالانى امان الىپ شىقتىق, – دەپ ەسكە الادى پوليتسيا كىشى لەيتەنانتى الان تۇرلانوۆ.
ول بۇل ءىسىن ەرلىككە بالاعىسى كەلمەيدى. ءدال سول كۇنى 24 جاسقا تولعان ەدى. بىراق تۋعان كۇننەن بۇرىن ادامداردى ورتتەن قۇتقارۋدى عانا ويلادى.
اتىراۋ وبلىسى