قازاقستان سولتۇستىك ەۋروپا ينۆەستورلارىنىڭ نازارىندا

قازاقستاننىڭ فينليانديا, شۆەتسيا, دانيا جانە نورۆەگيامەن ينۆەستيتسيالىق جانە ساۋدا-ەكونوميكالىق ىنتىماقتاستىعىنىڭ مۇمكىندىكتەرى «قازاقستان - سولتۇستىك ەۋروپا» ىسكەر توپتارىنىڭ العاشقى ينۆەستيتسيالىق كەزدەسۋى اياسىندا تالقىلاندى.

ءىس-شاراعا سولتۇستىك ەۋروپانىڭ 200-دەن استام كومپانياسى قاتىستى. ءىس-شارادا قر سىرتقى ىستەر ءمينيسترىنىڭ ورىنباسارى الماس ايداروۆ, Danish Industry ديرەكتورى يەنس حولست-نيلسەن, قر-داعى ەۋروپالىق وداق دەلەگاتسياسىنىڭ باسشىسى سۆەن-ولوۆ كارلسسون, سونداي-اق ەكى ەلدىڭ بيزنەس-قوعامداستىعى, ساۋدا-ونەركاسىپ پالاتالارى, سالالىق مينيسترلىكتەر مەن كۆازيمەملەكەتتىك ورگاندار وكىلدەرى ءسوز سويلەدى.

ءىس-شارانى اشقان قر سىرتقى ىستەر ءمينيسترىنىڭ ورىنباسارى الماس ايداروۆ پاندەميانىڭ تەرىس اسەرىنە قاراماستان, قازاقستان ءوزارا ءتيىمدى ىنتىماقتاستىق ءۇشىن جاڭا مۇمكىندىكتەر ىزدەۋدى جالعاستىرىپ جاتقانىن اتاپ ءوتتى. وسىعان بايلانىستى ەل سولتۇستىك ەۋروپا ەلدەرىمەن سەرىكتەستىكتى كەڭەيتۋگە جانە تەرەڭدەتۋگە مۇددەلى.

«تاۋەلسىز قازاقستان تاريحىندا العاش رەت ءبىز سولتۇستىك ەۋروپا ەلدەرىنىڭ قاتىسۋىمەن ينۆەستفورۋم ۇيىمداستىرۋدامىز. ءبىزدىڭ ءوزارا ءىس-قيمىلىمىزدىڭ دەڭگەيى نەگىزسىز تومەن دەپ سانايمىن. ءبىزدىڭ ەلدەرىمىز ۇزاق مەرزىمدى ءوزارا ءتيىمدى ىنتىماقتاستىق ءۇشىن, اسىرەسە, بالىق پەن بيداي ءوسىرۋ جانە قايتا وڭدەۋ, جەك, مۇناي-حيميا جوبالارىنا ارنالعان جابدىقتار ءوندىرۋ, سونداي-اق تسيفرلاندىرۋ سياقتى ماڭىزدى سەكتورلاردا زور الەۋەتكە يە. ءبىزدىڭ ەلىمىز ينۆەستيتسيالىق احۋالدى جاقسارتۋعا باعىتتالعان رەفورمالاردى دايەكتى تۇردە دامىتىپ كەلەدى. ءبىز ۇكىمەت پەن ينۆەستورلار اراسىندا تىكەلەي جانە اشىق ديالوگتى, سونداي-اق جاڭا ينۆەستيتسيالاردى, وزىق تەحنولوگيالار مەن نوۋ-حاۋدى تارتۋ ءۇشىن ينفراقۇرىلىمدى ۇنەمى جاقسارتۋدى قامتاماسىز ەتەمىز», دەپ اتاپ ءوتتى الماس ايداروۆ.

«قازاقستان رەسپۋبليكاسىنىڭ ينۆەستيتسيالىق مۇمكىندىكتەرى» سەسسياسىندا ءسوز سويلەۋ بارىسىندا «KAZAKH INVEST» ۇك» اق باسقارما توراعاسى باۋىرجان سارتباەۆ شەتەلدىك بيزنەستى قولداۋ شارالارىمەن, سونداي-اق فورۋمعا قاتىسۋشىلاردى ەلدىڭ ينۆەستيتسيالىق الەۋەتىمەن تانىستىردى.

ونىڭ ايتۋىنشا, بۇگىندە كومپانيا قازاقستانعا ينۆەستيتسيا سالعىسى كەلەتىن ينۆەستورلارعا 100-دەن استام ينۆەستيتسيالىق ۇسىنىس ۇسىنۋعا دايىن. ينۆەستيتسيالىق ۇسىنىستارعا بيزنەس-جوسپار, قارجىلىق مودەل جانە الەۋەتتى جەرگىلىكتى سەرىكتەستى تاڭداۋ كىرەدى.

«KAZAKH INVEST جوبالاردى باسقارۋ جانە كەڭەس بەرۋ سالاسىندا كوپتەگەن قۇزىرەتتەرگە يە. بۇگىنگى كۇردەلى كەزەڭدە ينۆەستورلارعا بارلىق قاجەتتى قولداۋدى ۇسىنۋ ءبىزدىڭ باسىمدىعىمىز بولىپ تابىلادى», دەپ حابارلادى باۋىرجان سارتباەۆ.

سونىمەن قاتار, ءىس-شارا بارىسىندا «Aller Aqua» AS, «BTG Solenergy», «Arla Foods Amba» AS, «AF Gruppen», «ThermoSeed Global AB», «Trade Scandinavia» اۆ, «Geodesign Barriers», «Nord Development Consulting», «Swedavia Airports» جانە ت. ب. ءىرى كومپانيالارمەن ەكىجاقتى كەزدەسۋلەر ۇيىمداستىرىلدى.

ءىس-شارانى قر سىرتقى ىستەر مينيسترلىگى, قر شۆەتسياداعى (دانيا), نورۆەگياداعى جانە فينلياندياداعى ەلشىلىكتەرى, سونداي-اق «KAZAKH INVEST» ۇك» اق جانە وسلو قالاسىنىڭ ساۋدا پالاتاسى ۇيىمداستىردى.

ايتا كەتۋ كەرەك, 2005 جىلدان باستاپ شۆەتسيا, نورۆەگيا, دانيا جانە فينليانديا قازاقستان ەكونوميكاسىنا جالپى العاندا $2,4 ملرد-تان استام ينۆەستيتسيا سالدى, تەك سوڭعى 4 جىلدىڭ ىشىندە سولتۇستىك ەۋروپا مەن قازاقستان اراسىنداعى تاۋار اينالىمى $3 ملرد-تان استام سومانى قۇرادى, بۇگىندە قازاقستاندا الەمگە ايگىلى «Metso», «Wartsila», «Tikkurila», «Ericsson», «Scania», «ABB», «Electrolux», «H&M», «Novo Nordisk», «Castrol» سياقتى كومپانيالار تابىستى جۇمىس ىستەۋدە.