بۇگىندە تاراز قالاسىندا جەرگىلىكتى تۇرعىنداردى باسپانامەن قامتۋ ماقساتىندا جاڭادان 15-ىقشاماۋدانى بوي كوتەرۋدە. جىل سايىن تۇرعىن ءۇي كەزەگىندە تۇرعان جۇرتشىلىق باسپانالى بولۋدا. قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي اتالعان ىقشاماۋداندا ورنالاسقان №25 تۇرعىن ءۇي پايدالانۋعا بەرىلدى. جامبىل وبلىسىنىڭ اكىمى بەردىبەك ساپارباەۆ پاتەر كىلتتەرىن تاپسىرۋ سالتاناتىنا ارنايى قاتىسىپ, باسپانالى بولعان تۇرعىنداردى قۇتتىقتادى, دەپ حابارلايدى Egemen.kz.
«باسپانا – قاي ۋاقىتتا دا وزەكتى ماسەلە. قالا حالقىنىڭ سانىنىڭ وسۋىمەن تۇرعىن ۇيگە دەگەن سۇرانىس كولەمى دە ۇلعايۋدا. تاۋەلسىزدىك جىلدارى ەلىمىزدە ەلباسىنىڭ باسشىلىعىمەن قازاقستاندىقتاردى تۇرعىن ۇيمەن قامتاماسىز ەتۋ بويىنشا ۇلكەن جۇمىستار اتقارىلدى. مەملەكەتتىك باعدارلامالار جۇزەگە اسىرىلىپ, ناتيجەسىندە مىڭداعان, ميلليونداعان قازاقستاندىقتىڭ ارمانى اقيقاتقا اينالدى», دەدى بەردىبەك ساپارباەۆ.
سونىمەن قاتار وبلىس اكىمى ەلىمىزدە قولعا الىنعان تۇرعىنداردى قولجەتىمدى باسپانامەن قامتاماسىز ەتۋ باعىتىنداعى جۇمىستاردىڭ وڭىردە دە جەمىستى جۇزەگە اسىرىلىپ جاتقانىن, بيىلعى جىلدىڭ وزىندە 1000-عا جۋىق پاتەر ەل يگىلىگىنە بەرىلگەنىن جەتكىزدى. اۋليەاتا ايماعىندا الەۋمەتتىك قولداۋدى قاجەت ەتەتىن وتباسىلارعا ارنالعان 180 ورىندىق جاتاقحانا بوي كوتەرىپ, 180 تۇرعىن باسپانالى بولعان. ال, بۇگىندە وبلىس بويىنشا 65 تۇرعىن ءۇيدىڭ قۇرىلىسى جۇرگىزىلۋدە ەكەن. اعىمداعى جىلى 55 تۇرعىن ءۇيدىڭ قۇرىلىسى اياقتالادى دەپ جوسپارلانعان. سونداي-اق, اكىم بيىل ەڭ كەم دەگەندە 605 مىڭ شارشى مەتر تۇرعىن ءۇي پايدالانۋعا بەرىلەدى دەپ جوسپارلانعانىن, ول ءۇشىن بارلىق مۇمكىندىكتەر قاراستىرىلعانىن, وبلىستا الداعى ۋاقىتتا دا تۇرعىن ءۇي قۇرىلىسى قارقىن الا بەرەتىنىن ايتتى.
بۇگىندە تاراز قالاسىنىڭ وزىندە 32 مىڭ 121 تۇرعىن پاتەر كەزەگىندە تۇر ەكەن. كەزەكتە تۇرعان ازاماتتاردى باسپانامەن قامتۋ وبلىستاعى ماڭىزدى ماسەلەنىڭ ءبىرى. سوندىقتان دا «نۇرلى جەر» باعدارلاماسى اياسىندا 17,5 ميلليارد تەڭگەگە 48 كوپپاتەرلى تۇرعىن ءۇيدىڭ قۇرىلىسى جۇرگىزىلىپ, جىل سوڭىنا دەيىن 2 260 پاتەرلى 41 ءۇي ەل يگىلىگىنە تاپسىرىلاتىن بولادى.
سونداي-اق «7-20-25» باعدارلاماسى شەڭبەرىندە اعىمداعى جىلى ەكىنشى دەڭگەيلى بانكتەر ارقىلى وڭىردەگى 102 ازامات 668,4 ميلليون تەڭگەگە نەسيە راسىمدەپ, باسپاناعا قول جەتكىزگەن. ال, وبلىستا «باقىتتى وتباسى» باعدارلاماسى دا وڭ ناتيجەسىن بەرۋدە. «تاعى ءبىر ايرىقشا ايتا كەتەر جايت, 15-ىقشاماۋدان تۇرعىندارى تاراپىنان الەۋمەتتىك جەلىدە, باسپاسوزدە جول, جىلۋ, اۋلالاردى اباتتاندىرۋعا بايلانىستى كوپتەگەن ماسەلە كوتەرىلىپ جاتىر. ماسەلەنىڭ بار ەكەنىن ەشكىم جوققا شىعارا المايدى. الايدا, بارلىق نارسەنىڭ ءوز سەبەبى بار. ماسەلەن, جولعا بايلانىستى. قازىرگى تاڭدا اتالعان ىقشاماۋداندا قۇرىلىس جۇمىستارى قارقىندى جۇرگىزىلۋدە.
قۇرىلىس جۇمىستارىنا جۇمىلدىرىلعان تەحنيكالاردىڭ ول جولمەن كۇندەلىكتى سان مارتە وتۋىنە بايلانىستى, قازىر جاڭادان جول سالىنسا, ول كوپكە ۇزاماي جارامسىز كۇيگە تۇسەدى. سول سەبەپتى الداعى ۋاقىتتا بارلىق ماسەلە كەزەڭ-كەزەڭىمەن شەشىمىن تابادى. جىلۋ ماسەلەسى بويىنشا كەشە عانا اپپاراتتىق جيىندا جاۋاپتى مەكەمە باسشىلارىنا ناقتى تاپسىرمالار بەرىلدى», دەدى بەردىبەك ساپارباەۆ. سالتاناتتى شارا سوڭىندا باسپانالى بولعان تۇرعىندار اتىنان قالا تۇرعىنى اباي ءومىرتاي مەملەكەتتىڭ قولداۋى ءۇشىن العىس ءبىلدىردى.