«ەڭبەك» باعدارلاماسىنىڭ پايداسىن ەڭبەك ادامى كورەدى

بايتەرەك اۋدانىنا قاراستى ميچۋرين اۋىلى ورال قالاسىنىڭ ىرگەسىندە ورنالاسقان. كەنت دەسە دە بولادى. وسىنداي اۋىلدا ون شاقتى سيىر ساۋىپ, قايماق-ماي ساتىپ وتىرعان كوپ بالالى كەلىنشەك تۋرالى ەستىپ, ارنايى باردىق.

اۋلادان اتتاپ كىرگەندە ءبىزدى قاڭقىلداپ قاز قارسى الدى. بىلەگىن ءتۇرى­نىپ العان اقسارى كەلىنشەك مال سۋار­عالى ءجۇر ەكەن. جەراستى قۇ­دى­عىنان شىققان سۋدىڭ تۇتى­گىن اس­تاۋعا قويا سالىپ, ءبىزدى شارۋا­شى­لى­عىمەن تانىستىردى.

– 2018 جىلى اۋىل شار­ۋا­شىلىعىن قارجىلاي قول­داۋ قورىنا بارىپ, 4 ملن تەڭگە­نى 6 پا­يىزدىق وسىممەن الدىم. ول كەزدە 13 سيىر الىپ ەدىك. بيىل ءبىز سياقتى كوپ بالالى وتباسىنا, ءارى مۇمكىندىگى شەكتەۋلى بالا تاربيە­لەپ وتىرعان اناعا جەڭىلدىك بار ەكەنىن ەستىدىم. ءسويتىپ, الدىڭ­عى نەسيەمدى ەرتەرەك جاۋىپ, بيىل تاعى دا 4 ملن تەڭگە نەسيە الدىم. مۇنىڭ پايىزدىق ءوسىمى نە­بارى 4 پايىز. بۇل ءبىز ءۇشىن ۇلكەن كومەك قوي, – دەيدى نازيرا ساي­لاۋ­بايقىزى.

نازيرانىڭ مىنەزى اشىق, اڭگى­مەشىل ەكەن. تازا ەڭبەك ادا­مى­نىڭ اقجارقىن كورىنىسى. كۇيەۋى بولات «ورال – نۇر – سۇلتان» با­عىتىنداعى وتاربانىڭ جولسەرىگى ەكەن. ۇيدە بولعانىنان ساپاردا جۇرگەنى كوپ. ەكىنشى م­ۇش­ەل­گە تاياعان ۇلكەن ۇلى سا­عىنبەك اقساي قالاسىندا ۆاحتا­لىق ادىسپەن قىزمەت ەتەدى. سوندا ۇيدەگى شارۋاشىلىق تۇگەلدەي ءوزىنىڭ جانە 10 جاسار كەنجە ۇلى نۇرداۋلەتتىڭ موينىندا ەكەن.

– كۇندەلىكتى مال جايعاپ, استىن تازالاۋعا ابدەن ۇيرەندىك, اعا. فيتنەس قوي, – دەپ كۇلەدى نازيرا.

– كىشى بالاڭىز مالدىڭ سوڭىنا سالىپ قويدى دەپ رەنجىمەي مە؟ – دەپ سۇرايمىن ابايلاپ.

– جوعا, رەنجىمەيدى. وسى مال ارقىلى ەل قاتارلى كۇن كورىپ وتىر­مىز. بالالارىم اقىلى وقۋ­دا وقىدى. قازىر قىزىم باتىس قازاقستان مەملەكەتتىك ۋنيۆەر­سيتە­تىنىڭ حالىقارالىق قاتىناستار فاكۋلتەتىندە ءبىلىم الىپ ءجۇر. وسىنىڭ ءبارى ەشكىمگە قول جايماي, ادال ەڭبەك ەتكەنىمىزدىڭ ارقاسى, – دەيدى نازيرا.

نازيرا كۇن سايىن سيىرلارىن ساۋىپ, ءسۇتىن, قايماعىن, ىرىمشىگىن ساتىپ تابىس تاۋىپ وتىر ەكەن. قازىر قولىنداعى سۋالعالى تۇرعان 4 سيىردان كۇندەلىكتى 20-25 ليتردەي ءسۇت الىپ وتىر. «جاقىندا جەلىندەپ تۇرعان سيىرلاردى اۋىلدان الىپ كەلەمىز. كورىپ وتىرسىز, ورىن تار» دەيدى. شىنىندا دا نەبارى 14 سوتىق اۋلانىڭ ءار بۇرىشىن پايدالانىپ, بىرنەشە قورا سالىپ تاستاپتى. سيىر-تورپاقتان بولەك تاۋىق, كۇركەتاۋىق, قاز وسىرەدى. «بيىل ءشوپ قىمباتتاپ كەتتى. ءبىر ورامىن 7,5 مىڭ تەڭگەدەن الدىق. سونىڭ وزىندە ساپاسى ناشار ەكەن. جەمدى «تىرىلەي» الىپ, ءوزىم ۇيدەن تارتىپ الامىن» دەيدى شارۋاقور كەلىنشەك.

نازيرا الماتى وبلىسىنىڭ شەلەك اۋدانىندا تۋعان ەكەن. «رايىمبەك باتىر مەن مۇقاعالي­دىڭ تۋىسىمىن» دەپ قويادى. ورالداعى جوعارى وقۋ ورنىندا وقىپ, قارجىگەر ماماندىعىن الىپ شىققان. زاماننىڭ الاساپىران كەزىندە ساۋدامەن دە اينالىسىپتى. ءۇي شارۋاشىلىعىمەن, سونىڭ ىشىندە ءسۇت تاعامدارىن وندىرۋمەن 2007 جىلدان اينالىسا باستاعان.

– مەنى كاسىپكەر قىلعان – وسى بالام عوي! – دەپ مەيىرلەنىپ, مۇگە­دەك­تەر ارباسىندا وتىرعان ۇلىنىڭ بەتىنەن ءسۇيدى نازيرا ۇيگە كىرگەندە.

رامازان – بولات پەن نازيرانىڭ وتباسىنداعى ءۇشىنشى ءسابي ەكەن. دۇنيەگە كەلگەن بەيكۇنا پەرىشتەنىڭ ماڭدايىنا اۋىر ناۋقاس – بتسپ دياگنوزى جازىلىپتى. ۇلىن ەمدەتۋ ءۇشىن بايعۇس انانىڭ بارماعان جەرى جوق. قازىر دە كۇندەلىكتى كۇتىم, ۋاقتىلى ماسساج, ەم-دوم كەرەك. ءتۇرلى ءدارى, قوسپالار دا قىمبات.

– 2006-2007 جىلدان باستاپ سيىر الدىق, ەشكى ساۋدىق. ەم تابا الماي قينالدىق. اسىرەسە بالاما اق كەرەك بولدى. ءسويتىپ ءجۇرىپ وسى اۋىل شارۋاشىلىعىن قارجىلاي قولداۋ قورىنا كەز بولدىق قوي. سوڭعى 3-4 جىلدا كوپ بالالى انا­لار­عا, مۇمكىندىگى شەكتەۋلى بالا­لارعا كوزقاراس وزگەرىپ, ۇكىمەت تاراپىنان كوپ كومەك بولىپ جاتىر. وسىعان ريزامىز. شىنىمدى ايتسام, وسى نەسيەنى ەشقانداي تامىر-تانىسسىز, ءوزىم بارىپ الدىم. قور فيليالىنداعى ماماندار ۇيىمىزگە كەلدى, جاعدايىمىزدى كوردى. وزدەرى زىر جۇگىرىپ ءجۇرىپ قۇجاتتاردى رەتتەدى. 4 پايىزدىق جەڭىلدىك بار ەكەنىن ايتىپ, راسىمدەۋگە كومەك­تەس­كەن دە وزدەرى. مىڭ العىس ايتامىن ازاماتتارعا!, – دەيدى نازيرا.

ءبىر قىزىعى, نازيرا دايىنداعان ءسۇت ونىمدەرىن بازارعا شىعارمايدى, ەل ارالاپ ساتپايدى. ونىڭ قولىنان شىققان قايماق-مايدىڭ دامدىلىگىن بىلەتىن ادامدار ۇيدەن وزدەرى الىپ كەتەدى ەكەن. «اقتاۋ مەن اتىراۋدان كەلەتىن دە تانىستارىم بار. ولار كەلسە, ءتۇپ كوتەرىپ ساتىپ الادى» دەيدى نازيرا.

«ەڭبەك» مەملەكەتتىك باعدار­لا­ما­سى حالىقتى ناتيجەلى جۇمىسپەن قامتۋ جانە جاپپاي كاسىپكەرلىكتى دا­مىتۋ ءۇشىن 2017 جىلدان بەرى قول­عا الىنعان بولاتىن. بيىل اۋىل شارۋاشىلىعىن قارجىلاي قولداۋ قورىنىڭ باتىس قازاقستان فيليالىنا «ەڭبەك» باعدارلاماسى اياسىندا 3 ميلليارد تەڭگە بولىنگەن ەكەن.

– بۇل قارجىنىڭ 500 ميلليون تەڭگەسى ورال مەن اقساي قالا­لا­رىن­داعى كاسىپكەرلىكتى ۇلعاي­تۋعا باعىتتالدى. ءسويتىپ, وسى قارجىعا 755 جوبا قارجىلاندىرىلدى. مۇنىڭ 459 جوباسى – ستارتاپ. جال­پى نەسيە بەرىلگەن 149 جوبا كاسىپكەرلىككە باعىتتالسا, 603 جوبا مال شارۋاشىلىعىن دامىتۋعا ارنالعان. بيىل بەرىلگەن نەسيە­لەر نەگىزىندە جاڭادان 208 جۇمىس ورنى اشىلدى, – دەيدى اۋىل شارۋاشىلىعىن قارجىلاي قولداۋ قورى اق باتىس قازاقستان وبلىستىق فيليالىنىڭ ديرەكتورى ەربۇلان تۇشكەنوۆ.

كورىپ وتىرعانىمىزداي, اۋىل شارۋاشىلىعىن قارجىلاي قولداۋ قورىنىڭ كومەگىن, «ەڭبەك» باعدار­لا­ماسىنىڭ پايداسىن قاراپايىم ەڭبەك ادامدارى, نازيرا سايلاۋ­باي­قىزى سىندى قاجىرلى جاندار كورىپ جاتىر. ولاردىڭ ارقاي­سى­سىنىڭ ءوز تاعدىرى, ءوز تاريحى بار. «قارنى اشقان ادامعا بالىق بەرمە, قارماق بەر» دەگەن ساياساتتى ۇستانىپ وتىرعان مەملەكەتتىك باعدار­لامانىڭ دىتتەگەن جەرىنە جەتىپ, ەل يگىلىگىنە ارنالعانىنىڭ ءبىر دالەلى – ءدال وسى «رامازان» جە­كە كاسىپكەرلىگىنىڭ قوجاسى نازيرا سىدىقباەۆا دەر ەدىك.

باتىس قازاقستان وبلىسى