26 قاراشادا كەشكى ساعات 20.00 شاماسىندا الماتى وبلىسى تجد كەزەكشى پۋلتىنە تالدىقورعان قالاسىنىڭ ەركىن اۋىلى, قازاقستان كوشەسىنىڭ بويىنداعى جەكە تۇرعىن ۇيلەردىڭ بىرىندە شاعىن گاز باللونى (سىيىمدىلىعى 5 ليتر) جارىلدى دەگەن حابارلاما كەلىپ ءتۇستى. بۇل تۋرالى قر تجم رەسمي وكىلى تالعات ءۋالي حابارلادى.
جارىلىس سالدارىنان ءورت شىققان جوق. الايدا تۇرعىن ءۇيدىڭ قابىرعالارى مەن شاتىرى قيرادى.
جارىلىس سالدارىنان 8 ادام, ونىڭ ىشىندە 3 بالا زارداپ شەكتى. ولاردىڭ بارلىعى مەديتسينالىق مەكەمەلەرگە جەتكىزىلدى.
الدىن الا بولجام بويىنشا, تۇرمىستىق گاز باللونىن جىلىتۋ ءۇشىن پەشتىڭ جانىنا قويۋ جارىلىسقا سەبەپ بولعان.
وقيعا ورنىندا الماتى وبلىسى تجد 28 قىزمەتكەرى, 8 تەحنيكاسى, 8 جەدەل جاردەم بريگاداسى, پوليتسيا, گاز قىزمەتى جانە جەرگىلىكتى اتقارۋشى ورگانداردىڭ قىزمەتكەرلەرى جۇمىس ىستەدى. سونىمەن قاتار زارداپ شەگۋشىلەردىڭ تۋىستارىنا پسيحولوگيالىق كومەك كورسەتۋ ءۇشىن الماتى وبلىسى تجد-نىڭ ەكى پسيحولوگ مامانى جۇمىلدىرىلدى.
قر تجم ازاماتتاردان گاز باللوندارىن پايدالانۋ جانە قولدانۋ كەزىندە ساقتىق شارالارىن قاتاڭ ساقتاۋدى سۇرايدى.