كەشە ەلوردادا «سامۇرىق-قازىنا» ۇاق» اق باسقارۋشى ديرەكتورى نۇرجان بايداۋلەتوۆ «ەير استانا» اق قىزمەتىنە قاتىستى بريفينگ وتكىزدى. اتالعان باسقوسۋدا اۋە كومپانياسىنىڭ قىزمەتى مەن ونىڭ الداعى جىلداعى جوسپارلارى جايى ءسوز بولدى.
كەشە ەلوردادا «سامۇرىق-قازىنا» ۇاق» اق باسقارۋشى ديرەكتورى نۇرجان بايداۋلەتوۆ «ەير استانا» اق قىزمەتىنە قاتىستى بريفينگ وتكىزدى. اتالعان باسقوسۋدا اۋە كومپانياسىنىڭ قىزمەتى مەن ونىڭ الداعى جىلداعى جوسپارلارى جايى ءسوز بولدى.
«ەير استانا» اق-تىڭ بيىلعى جىلعى كىرىسى 143,8 ملرد. تەڭگە بولىپ, وتكەن جىلعى كورسەتكىشپەن سالىستىرعاندا ون پايىزعا ءوستى», دەدى ن.بايداۋلەتوۆ. سونداي-اق, ول كومپانيانىڭ اۋە كەمەلەر پاركى ۇلعايعانىن دا نازاردان تىس قالدىرمادى. 2002 جىلى ءۇش ۇشاق بولسا, 2013 جىلى مۇنىڭ سانى جيىرما توعىزعا جەتكەنىن جانە 2020 جىلى بۇل كورسەتكىش قىرىققا دەيىن جەتىپ, ونىڭ جارتىسى كومپانيا مەنشىگىندە بولاتىندىعىن ايتتى.
بريفينگ بارىسىندا ن.بايداۋلەتوۆ «ەير استانا» اق قىزمەت ساپاسىن, ونىڭ ىشىندە رەيستەردىڭ كەشىگۋى تۋرالى جولاۋشىلاردى ۋاقىتىندا حاباردار ەتۋ جۇيەسىن جاقسارتۋ ماسەلەلەرىنە دە توقتالدى. «الەمدىك دەڭگەيدەگى اۆياتسيالاردىڭ وزىندە كەشىگۋ بولىپ تۇرادى. بۇل جاعداي كوبىنەسە حالىقارالىق تالاپتارعا ساي, جولاۋشىلار قاۋىپسىزدىگىن قامتاماسىز ەتۋگە بايلانىستى تۋىندايدى. قاۋىپسىزدىك ماسەلەسى «ەير استانا» ءۇشىن دە وتە ماڭىزدى. سونىمەن قاتار, اۋا رايى جاعدايىن, ۇشۋعا دايىندىق كەزىندە كەيبىر جولاۋشىلاردىڭ تارتىپسىزدىگىن, جەردەگى ينفراقۇرىلىمداردىڭ كۇردەلى جۇمىسىن دا ەسەپكە الۋ كەرەك. وسى جايتتارعا قاراماستان, «ەير استانا» كورسەتكىشتەرى الەمدىك دەڭگەيگە جاقىن تۇر», دەگەن ول اۋە كومپانياسى جۇمىسىنا اسەر ەتەتىن بارلىق فاكتورلارعا تۇسىنىستىكپەن قاراي وتىرىپ, «سامۇرىق-قازىنا» قورى وسى ماسەلەدە «ەير استانا» كومپانياسىنان ۇلكەن جاۋاپكەرشىلىكتى تالاپ ەتەتىنىن, سەبەبى, كوپ جاعدايدا ۇشاقتاردى ساعاتتاپ كۇتۋ جولاۋشىلاردىڭ نارازىلىعىن تۋدىرىپ جاتاتىندىعىن دا تىلگە تيەك ەتتى. سونىمەن بىرگە, ول ەلىمىزدە «ەير استاناعا» بىلىكتى كادرلار دايىنداۋ ماسەلەسى توڭىرەگىندە جاسالىپ جاتقان جۇمىستار جايىنان دا حابار بەردى.
ءابدىراحمان قىدىربەك,
«ەگەمەن قازاقستان».