شىعىنعا باتقان كاسىپورىندارعا جەڭىل نەسيە بەرىلمەك

ۇلتتىق بانك پەن ۇلتتىق ەكونوميكا مينيسترلىگى بىرلەسە وتىرىپ, قىزمەت كورسەتۋ, وڭدەۋشى ونەركاسىپ سالاسىنداعى ءىرى كاسىپورىندار ءتىزىمىن بەكىتكەن. ءتارتىپ بويىنشا, ءبىر كاسىپورىنعا بەرىلەتىن شەكتى نەسيە كولەمى – 6 ملرد تەڭگە. ورتا جانە شاعىن بيزنەس ءۇشىن شەكتى مولشەر 3 ملرد تەڭگەدەن اسپاۋ كەرەك بولسا, جەكە كاسىپكەرلەر 50 ملن تەڭگەدەن ارتىق نەسيە الا المايدى.

توتەنشە جاعداي كەزىندە زارداپ شەككەن اگروونەركاسىپ كەشەنى كاسىپكەرلەرى مەن ءىرى كاسىپكەرلىك سۋبەكتىلەرىن نەسيەلەۋ ءۇشىن قوسىمشا 200 ملرد تەڭگە ءبولىنىپتى. 200 ملرد تەڭگەنىڭ 100 ميللياردى اگروونەركاسىپ كەشەنى ءۇشىن شەكتى مولشەر بولىپ بەكىتىلگەن. ونىڭ 70 ميللياردى ەكىنشى دەڭگەيلى بانكتەر ارقىلى, 30 ميللياردى «اگرارلىق نەسيە كورپوراتسياسى» اق ارقىلى بەرىلمەكشى. ءتىزىمنىڭ كەڭەيۋىنە بايلانىستى باعدارلاما اتاۋى كاسىپكەرلىك سۋبەكتىلەرىن جەڭىلدىكپەن نەسيەلەۋ باعدارلاماسى بولىپ وزگەرگەن. بولىنگەن قاراجات 2021 جىلدىڭ 31 ناۋرىزىنا دەيىن يگەرىلۋى ءتيىس.

ۇلتتىق بانك ۇسىنعان مالىمەت بويىنشا, ءدال قازىرگى ساتتە ەكىنشى دەڭگەيلى بانكتەر 567,4 ملرد تەڭگەگە 2311 ءوتىنىشتى ماقۇلداعان. 1370 شاعىن جانە ورتا بيزنەس سۋبەكتىسىنە 455,3 ملرد تەڭگە ءبولىنىپتى. ونىڭ 101,6 ميللياردى بۇرىن بەرىلگەن نەسيەلەردى قايتارۋ قاراجاتىنان الىنعان. بولىنگەن قاراجاتتىڭ كوپ بولىگى – ساۋدا (319 ملرد), قۇرىلىس (44,9 ملرد) جانە وڭدەۋشى ونەركاسىپتىڭ (39,8 ملرد) ەنشىسىندە.

اباي ايماعامبەت,

"Egemen Qazaqstan"

الماتى