ۇلى دالانىڭ مادەني جاۋھارلارى

بۇل ماڭىزدى ءىس-شارانى ۇلتتىق مۋزەي نۇر-سۇلتان قالاسى بويىنشا «رۋحاني جاڭعىرۋ» جوبالىق كەڭسەسىمەن بىرلەسىپ, مادەنيەت جانە سپورت مينيسترلىگى, نۇر-سۇلتان قالا­سى جانە شىعىس قازاقستان وبلىسى اكىم­دىكتەرىنىڭ قولداۋىمەن ۇيىمداستىردى.

سالتاناتتى شارادا بەتاشار ءسوزدى ۇلتتىق مۋزەي ديرەكتورى ارىستانبەك مۇحامەدي ۇلى سويلەدى.

«ۇلتتىق مۋزەيىمىز « ۇلى دالانىڭ ەجەلگى ونەرى مەن تەحنولوگيالارى» زالىن جاساقتاۋ ماقساتىندا كەشەندى عىلى­مي-زەرتتەۋ جۇمىستارىن جۇرگىز­گەن بولاتىن. اتاپ ايتقاندا, «التىن ادام», «تاقساي حانشايىمى», ء«ۇرجار حانشايىمى» سياقتى ايگىلى تاريحي ەسكەرتكىشتەر زەرتتەلىپ, ەسىك, بەرەل, تالدى, تاقساي, ەلەكە سازى جانە تاعى باسقا قورعانداردان تابىلعان جادىگەرلەر قايتادان قال­پىنا كەلتىرىلدى. مۇنىڭ بارلىعى ۇلت­تىق تاريحىمىز بەن مادە­نيەتىمىزدى جاڭعىرتۋ ءۇشىن جاسالىپ وتىر», دەدى ا.مۇحامەدي ۇلى.

جيىن بارىسىندا اقپارات جانە قوعامدىق دامۋ مينيسترلىگى «رۋحا­ني جاڭعىرۋ» باعىتىن ۇيلەستىرۋ دەپار­تامەنتىنىڭ جەتەكشىسى نۇرلان كۇن­تۋوۆ, تاريح عىلىمدارىنىڭ دوكتورى, پرو­فەسسور زاينوللا ساماشەۆ, نۇر-سۇل­تان قالاسى بويىنشا «رۋحاني جاڭ­عىرۋ» جوبالىق كەڭسەسىنىڭ ديرەكتورى اقەركە جۇمانباەۆا قۇتتىقتاۋ ءسوز سويلەپ, ۇلى دالا وركەنيەتىنىڭ مادەني جانە رۋحاني مۇرالارىن سارالاپ, ولار­دىڭ بۇگىنگى ۇرپاق ءۇشىن ماڭىزىن اتاپ ءوتتى.

زال ەكسپوزيتسياسىندا كوپشىلىككە ەسىك, بەرەل, تالدى, تاقساي جانە تا­عى باس­قا قورعان­داردان تابىلعان, «اڭ ستيلىن­دە» ورىندالعان سكيف-ساق كەزەڭىنىڭ بىرەگەي التىن بۇيىمدارى ۇسىنىلدى. سونىمەن قاتار شىعىس قازاقستان وبلىستىق تاريحي-ولكە­تانۋ مۋزەيى قو­رىنداعى التىن بۇيىم­دار كورمەسى قوسا ەكسپوزيتسيالاندى. بۇل 2019-2020 جىلدارى شىعىس قازاق­ستان وبلىسى تارباعاتاي اۋدانىنىڭ ەلەكە-سازى قورىمىنان بەلگىلى قازاقستاندىق ارحەولوگتەر ز.سا­ماشەۆ پەن ا.تولەۋ­باەۆ تاپ­قان, IV-V عاسىرلارعا جاتاتىن بىرە­گەي ارحەو­لوگيالىق ولجالار بولىپ تابىلادى.

زالدىڭ اشىلۋ سالتاناتىنا مەملەكەت جانە قوعام قايراتكەرلەرى, بەلگىلى عالىمدار, تاريحشىلار مەن ارحەولوگتەر قاتىستى.