قاراعاندىدا تۇراتىن قولونەر شەبەرى عابيت قاناتباەۆ وزبەكستاننىڭ ۇشقۇدىق اۋدانىنان وسىدان ون جەتى جىل بۇرىن كوشىپ كەلگەن. ءوزىنىڭ نەگىزگى ماماندىعى – كەن ينجەنەرى. الماتىداعى پوليتەحنيكالىق ينستيتۋتتا وقىپ, جوعارى ءبىلىم العان. الاتاۋدىڭ باۋرايىندا بولاشاق جارىن جولىقتىرىپ, ستۋدەنت كەزىندە وتاۋ قۇرىپتى. كەلىنشەگى ول كەزدە الماتىداعى ساۋدا تەحنيكۋمىندا وقىعان ەكەن.
ديپلومىن العاننان سوڭ, وزبەكستانعا, تۋعان اۋىلىنا ورالعان. جەرگىلىكتى كەن بايىتۋ كومبيناتىندا ماماندىعى بويىنشا جۇمىسقا تۇرىپتى. بىرىنەن سوڭ ءبىرى دۇنيەگە كەلگەن ەكى قىز, ءبىر ۇلدى اياعىنان تۇرعىزۋ ءۇشىن ءوندىرىستىڭ اۋىر جۇمىسىندا جان اياماي ەڭبەك ەتكەن.
ال ارقا توسىنە قونىس اۋدارعاننان كەيىن, اتا كاسىپتى قولعا العان. زادى, ول بۇل ونەرمەن جاسىنان اينالىسىپتى. اتادان دارىعان كاسىپ ەكەن.
بۇگىندە شەبەردىڭ كەنشىلەر استاناسىنداعى «ويماق» اتتى وتباسىلىق شەبەرحاناسى اياعىنان نىق تۇرعان. «قاراعاندى قالاسىندا ۇلتتىق بۇيىمدار ساتاتىن دۇكەنىمىز بار. مۇندا كيىزدەن, قايىستان, تەرىدەن, اعاشتان, تەمىردەن جاسالعان ۇلتتىق ناقىشتاعى بۇيىمدارىمىز ساتىلادى. ءتورت قاناتتىدان ون التى قاناتتىققا دەيىنگى ارالىقتاعى كيىز ۇيلەردى جاسايمىز. ونىڭ ىشكى قۇرال-جابدىقتارىن ايەلىم جانە قىزدارىم دايىندايدى», دەيدى شەبەر.
«ويماق» شەبەرحاناسىندا جاسالعان كيىز ۇيلەر ەلىمىزدىڭ بارلىق وڭىرىنە, سونىمەن قاتار الەمنىڭ وننان اسا مەملەكەتىنە ساتىلعان ەكەن. ال وسى ءىستىڭ ۇيىتقىسى بولىپ جۇرگەن عابيت قاناتباەۆ الداعى ۋاقىتتا قازاق حالقىنىڭ ءۇي جيھازدارىنا قاتىستى جاڭا ۇلگىلەرىن جاساۋدى ويلاستىرىپ ءجۇر.
قازىرگى ۋاقىتتا قولى التىن ءھام ىسكەر جان قۇرعان شەبەرحانا قاناتىن كەڭگە جايعان. مايقۇدىقتاعى تىگىن تسەحىندا التى شەبەر ەڭبەك ەتەدى, بۇل ىسكە زايىبى باس-كوز بولىپ ءجۇر. ال بالاسى التاي جانىنا ءۇش جىگىتتى الىپ, ۇلتتىق ناقىشتاعى ءتۇرلى بۇيىمدار جاساۋمەن اينالىسادى.
قاراعاندى وبلىسى