اتىراۋدا "سارايشىق" ادەبي-مادەني, تاريحي-تانىمدىق جۋرنالىنىڭ العاشقى ءنومىرى جارىققا شىقتى.
«اتىراۋ-اقپارات» جشس ديرەكتورى ىسقاق ەگەمبەرديەۆتىڭ مالىمەتىنشە, جاڭا باسىلىم وبلىس اكىمى ماحامبەت دوسمۇحامبەتوۆتىڭ قولداۋىمەن جارىق كورىپ وتىر. «سارايشىق» –اتىراۋداعى ادەبي-مادەني, تاريحي-تانىمدىق باعىتتاعى تۇڭعىش باسىلىم. «اتىراۋ-اقپارات» مەدياحولدينگى جانىنان ايىنا ءبىر رەت شىعادى. العاشقى ءنومىرىنىڭ تارالىمى – 500 دانا.
«جۋرنالدىڭ «سارايشىق» اتالۋىنىڭ وزىندىك سيمۆوليكالىق ءمانى بار. كەزىندە وركەنيەتتىڭ باستاۋى بولعان شاھار ۇلى جىبەك جولى بويىنداعى ۇلتتىق تاريحىمىز بەن مادەنيەتىمىزدىڭ مايەگىنە, رۋحانياتىمىزدىڭ عاجايىپ وشاعىنا اينالعان. سول سەبەپتەن, شەجىرەلى شاھار اتاۋىمەن ۇلتتىق سانانى جاڭعىرتاتىن ادەبي-مادەني, تاريحي-تانىمدىق باسىلىمدى شىعارۋدى ءجون كوردىك» دەيدى ىسقاق ەگەمبەرديەۆ.
ونىڭ ايتۋىنشا, باسىلىمنىڭ اقىلداستار القاسىندا اقىن, قازاقستان جازۋشىلار وداعىنىڭ توراعاسى ۇلىقبەك ەسداۋلەت, جازۋشى, مەملەكەتتىك سىيلىقتىڭ يەگەرى دۋلات يسابەكوۆ, اقىن, حالىقارالىق «الاش» ادەبي سىيلىعىنىڭ لاۋرەاتى عالىم جايلىباي, كومپوزيتور, جازۋشى, ونەر زەرتتەۋشىسى يليا جاقانوۆ, عالىم, فيلولوگيا عىلىمدارىنىڭ دوكتورى عاريفوللا انەس سەكىلدى قازاقتىڭ كورنەكتى قالامگەرلەرى مەن عالىمدارى بار.
«جۋرنالدىڭ بەتاشارى تۇڭعىش پرەزيدەنت – ەلباسى ن.نازارباەۆتىڭ, مەملەكەت باسشىسى ق.توقاەۆتىڭ ۇلت رۋحانياتى تۋرالى ورامدى ويلارىمەن اشىلدى. اتىراۋ وبلىسىنىڭ اكىمى م.دوسمۇحامبەتوۆ جاڭا باسىلىمعا اقجولتاي تىلەگىن ارنادى. اقىن ع.جايلىبايدىڭ الەمدى ءدۇر سىلكىندىرگەن پاندەميا تۋرالى شىعارماشىلىق ىزدەنىستەن تۋعان «؟» (سۇراق بەلگىسى) ولەڭدەر توپتاماسى, جازۋشى ز.جۇمانوۆانىڭ ءومىر شىندىعىن شىنايى سۋرەتتەگەن پروزالىق شىعارمالارى, ابايدىڭ 175 جىلدىعىنا وراي جاريالانعان جازۋشى, ابايتانۋشى م.مىرزاحمەت ۇلىنىڭ «ابايدىڭ ءال-ءفارابيدى تانۋى», جازۋشى ق.ءجۇسىپتىڭ «جۇمەكەن باللادالارى» دەگەن تاقىرىپتاعى زەرتتەۋ ماقالالارى, جازۋشى س.دۇيسەنبيەۆتىڭ «جاپىراقتار دا جىلايدى» اڭگىمەسى, ادەبيەت سىنشىسى ا.كەڭشىلىك ۇلىنىڭ «تاعدىرمەن بەتپە-بەت» تاقىرىبىنداعى زەرتتەۋ ماقالاسى, سۋرەتكەر ر.سەيسەنباەۆتىڭ شەتەل كلاسسيكتەرىنىڭ شىعارمالارىنا تالداۋ جاساعان «قۇداي تاۋبەسىنە تۇسكەن كۇن» اتتى زەرتتەۋ ماقالاسى, تۇركىستاندىق عالىم, سازگەر ب.سەردالىنىڭ «تۇركىستان مەن سارايشىق» تاريحى تاعدىرلاس, تامىرلاس» دەپ اتالاتىن قوس قالانىڭ قازاق وركەنيەتىندە الار ورنى تۋرالى تاريحي تولعانىسى جاريالاندى. سونداي-اق, جازۋشىلار س.لاتيەۆا مەن م.ءتاج-مۇراتتىڭ شىعارمالارىنا ورىن بەرىلدى» -دەيدى «اتىراۋ-اقپارات» جشس ديرەكتورى ىسقاق ەگەمبەرديەۆ.