كوروناۆيرۋس پاندەمياسىنا بايلانىستى ونلاين-فورماتتا وتەتىن 18-ءشى "Junior Eurovision" حالىقارالىق ءان بايقاۋىنىڭ گراند-فينالىنا 10 كۇن قالدى. بيىلعى جىلى بايقاۋدا الەمنىڭ 12 ەلىنەن 9-14 جاس ارالىعىنداعى جاس ۆوكاليستەر باق سىنايتىن بولادى. فينالدىق شوۋدى 29 قاراشا كۇنى ساعات 22.00-دە "حابار" ارناسى تىكەلەي ەفيردە كورسەتەدى, دەپ حابارلايدى Egemen.kz
بيىل سايىستا قازاقستاننىڭ نامىسىن الماتى وبلىسى, رىسقۇلوۆ اۋىلىنان كەلگەن 12 جاسار قاراقات باشانوۆا قورعايدى. ول قىركۇيەك ايىندا وتكەن ۇلتتىق ىرىكتەۋ كەزەڭىندە قازىلار القاسىنىڭ باعالاۋ قورىتىندىسى جانە تەلەكورەرمەندەردىڭ SMS-داۋىس بەرۋ ناتيجەلەرى بويىنشا جەڭىسكە جەتتى.
قاراقات ءان ايتۋدى 5 جاسىنان باستاعان, 9 جاسىنان ۆوكالمەن كاسىبي تۇردە شۇعىلدانادى. بۇگىنگى تاڭدا كۇلاش بايسەيىتوۆا اتىنداعى دارىندى بالالارعا ارنالعان مەكتەپتە وقيدى. ول كوپتەگەن رەسپۋبليكالىق بالالار بايقاۋىنىڭ جەڭىمپازى اتانعان, سكريپكا مەن پيانينو اسپاپتارىندا وينايدى.
Junior Eurovision سايىسىنىڭ گراند-فينالىندا جاس ءانشى بەس جىل بۇرىن باقيلىق بولعان اكەسىنە ارنايى شىعارىلعان "Forever" ءانىن ورىندايدى. كومپوزيتسيانى ەرجان ماكسيمنىڭ "ارمانىڭنان قالما" اتتى ءانىنىڭ اۆتورى, اتاقتى سازگەر حاميت شانعاليەۆ جازدى. ال, ءاننىڭ بەينەبايانىنىڭ اۆتورى اتاقتى قازاقستاندىق ستسەناريست جانە رەجيسسەر مالىك زەڭگەر.
2020 جىلعى Junior Eurovision سايىسىنا بەلارۋس, فرانتسيا, گرۋزيا, قازاقستان, مالتا, نيدەرلاندى, رەسەي, سەربيا, يسپانيا, ۋكراينا, پولشا جانە گەرمانيا ەلدەرىنىڭ انشىلەرى قاتىسادى.
18-ءشى «Junior Eurovision» ءان بايقاۋىنىڭ جەڭىمپازى قازىلار القاسىنىڭ داۋىس بەرۋى جانە ونلاين-داۋىس بەرۋ ارقىلى انىقتالادى. داۋىس بەرۋ جۇيەسى قالىپتاسقان ءداستۇر بويىنشا: 50% قازىلار القاسىنىڭ شەشىمى جانە 50% ونلاين داۋىس بەرۋ ارقىلى جۇزەگە اسادى. داۋىس بەرۋ تەگىن نەگىزدە 2 كەزەڭنەن تۇرادى.
داۋىس بەرۋدىڭ ءبىرىنشى كەزەڭى 28 قاراشادا ساعات 01:00-دە اشىلادى جانە 29 قاراشادا كونكۋرس فينالىنىڭ تىكەلەي كورسەتىلىمى باستالعانعا دەيىن جالعاسادى.
داۋىس بەرۋدىڭ ەكىنشى كەزەڭى بارلىق قاتىسۋشىلاردىڭ قويىلىمىنان كەيىن باستالىپ, 15 مينۋتقا سوزىلادى.
كورەرمەندەردىڭ داۋىس بەرۋى ءۇشىن كەلەسى ارەكەتتەردى ورىنداۋ قاجەت:
junioreurovision.tv نەمەسە www.jesc.tv سايتىنا كىرۋ; بايقاۋدىڭ بارلىق قاتىسۋشىلارىنىڭ كومپوزيتسيالارىمەن قىسقاشا بەينەروليكتى قاراپ شىعۋ; بەينەروليكتى كورگەننەن كەيىن داۋىس بەرۋ تەرەزەسى اشىلادى. ءسىزدىڭ پىكىرىڭىزشە ەڭ ۇزدىك بولعان ءۇش قاتىسۋشىنى تاڭداۋ; پاراقشانىڭ سوڭىنداعى "مەنىڭ داۋىستارىمدى قابىلداۋ" نەمەسە "Submit my votes" بەلگىشەسىن باسۋ.قازاقستان العاش رەت "بالالار ەۆروۆيدەنيەسى" اتتى تانىمال ءان بايقاۋىنا قاتىسۋعا جولدامانى 2018 جىلى العانىن ەسكە سالا كەتەيىك. حالىقارالىق بايقاۋداعى قازاقستاننىڭ دەبيۋتى التىنشى ورىنعا يە بولعان جاس ءانشى دانەليا تولەشوۆانىڭ "وزىڭە سەن" انىنەن باستاۋ الدى. 2019 جىلى ەرجان ماكسيم "ارمانىڭنان قالما" انىمەن ەكىنشى ورىندى (قازىلار القاسىنىڭ شەشىمى بويىنشا ءبىرىنشى) يەلەندى. قازاقستاننىڭ بۇل حالىقارالىق بايقاۋعا ءۇشىنشى رەت قاتىسۋى "حابار" اگەنتتىگىنىڭ ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولۋىنىڭ ارقاسىندا مۇمكىن بولدى.