باتىس قازاقستان وبلىسىنىڭ اكىمى عالي ەسقاليەۆ وڭىردەگى نەگىزگى ماسەلەنىڭ ءبىرى – مەملەكەتتىك قىزمەتشىلەردىڭ جۇمىس ساپاسىن ارتتىرۋ, حالىققا كورسەتىلەتىن قىزمەتتىڭ ساپاسىن كوتەرۋ دەپ ەسەپتەيدى.
– وكىنىشكە قاراي, كۇندەلىكتى ومىردە بىرقاتار مەملەكەتتىك فۋنكتسيالار ءوز دارەجەسىندە اتقارىلماي, ساپاسىز جانە ءتيىمسىز بولىپ تۇر. مەنىڭشە, بۇل ماسەلەنى شەشۋدىڭ ەكى جولى بار, – دەدى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا جۋرناليستەر ساۋالىنا جاۋاپ بەرگەن ءوڭىر باسشىسى.
وبلىس اكىمى اتاپ وتكەندەي, مۇنى شەشۋدىڭ ءبىرىنشى جولى – ءوڭىردىڭ قاۋىپسىزدىگىن قامتاماسىز ەتەتىن نەمەسە ستراتەگيالىق بولىپ سانالمايتىن مەملەكەتتىك فۋنكتسيانىڭ ءبارىن جەكە سەكتورعا تاپسىرۋ.
تۇرعىندارعا كورسەتىلەتىن قىزمەت ساپاسىن ارتتىرۋ جانە ءوڭىر كاسىپكەرلەرىن ۇزاقمەرزىمدى قولداۋ ماقساتىندا بيىل سەرۆيس جانە جاڭا تەحنولوگيالار كوللەدجى, ورال قالاسىنداعى ورتالىق ستاديون سياقتى بىرقاتار نىساندار جەكە كاسىپكەرلەردىڭ سەنىمگەرلىك باسقارۋىنا ءوتتى.
اكىم ايتقان ەكىنشى جول – قازىر قىزمەتتە جۇرگەن مەملەكەتتىك قىزمەتشىلەردى ىنتالاندىرۋ جانە جاڭا كرەاتيۆتى مەنەدجەرلەردى قىزمەتكە تارتۋ ارقىلى مەملەكەتتىك قىزمەتتىڭ بەدەلى مەن ساپاسىن ارتتىرۋ.
– 2021 جىلدىڭ 1 شىلدەسىنەن باستاپ فاكتورلى-بالل جۇيەسىن ەنگىزۋ تۋرالى مەملەكەت باسشىسىنىڭ شەشىمى قىزمەتكەردىڭ جالاقىسىن 2-3 ەسە وسىرۋگە مۇمكىندىك بەرەدى. بۇل مەملەكەتتىك قىزمەتشىلەردىڭ قىزمەت ساپاسىن ارتتىرۋىنا شىنايى ستيمۋل عوي, – دەدى وبلىس اكىمى.
ناتيجەسىندە, بۇل ىستەردىڭ يگىلىگىن تۇرعىندار مەن بيزنەس وكىلدەرى كورەتىنى انىق.