باتىس قازاقستان وبلىسى ۇشجىلدىق بيۋدجەتكە ەنگىزىلگەن يميدجدىك شارالاردى وتكىزۋدەن باس تارتتى. «ناتيجەسىندە, ءبىز 2020 جىلى – 395,4 ملن تەڭگە, 2021 جىلى – 352,9 ملن تەڭگە, 2022 جىلى – 356,4 ملن تەڭگەنى ۇنەمدەدىك. ۇنەمدەلگەن 1 ملرد تەڭگەدەن استام قارجى ءوڭىردىڭ وزەكتى الەۋمەتتىك ماسەلەلەرىن شەشۋگە جۇمسالادى» دەيدى وبلىس اكىمى عالي ەسقاليەۆ.
دوتاتسيالىق ءوڭىر بولىپ سانالاتىن باتىس قازاقستان وبلىسى ءۇشىن مەملەكەتتىك ينۆەستيتسيانىڭ تيىمدىلىگىن ارتتىرۋ – نەگىزگى باسىمدىقتىڭ ءبىرى. ءوڭىر باسشىسى عالي ەسقاليەۆتىڭ وسى قىزمەتكە تاعايىندالعالى قولعا العان ىرگەلى جۇمىستارىنىڭ ءبىرى وسى.
– ءبىز بيۋدجەت قارجىسىن ۇنەمدەپ, ءتيىمدى پايدالانۋىمىز كەرەك. سول ءۇشىن بيىلدان باستاپ مەملەكەتتىك ساتىپ الۋ جانە قىزمەت كورسەتۋ سالاسىن ۇشجىلدىق قارجىلاندىرۋعا كوشتىك, – دەگەن ەدى ءوڭىر باسشىسى.
اكىمنىڭ ايتۋىنشا, مۇنىڭ ءبىرشاما ءتيىمدى تۇستارى بار. ماسەلەن, ورال قالاسىندا بەينەباقىلاۋ جۇيەسىن ورناتۋ ءۇشىن 2,3 ملرد تەڭگە جۇمساۋ جوسپارلانعان ەكەن. ۇنەمدەۋ ناتيجەسىندە بۇل جوبا وبلىس بيۋدجەتىنە 700 ملن تەڭگەگە ءتۇستى. مۇنىڭ ىشىنە جۇيەگە ءۇش جىل قىزمەت كورسەتۋ دە كىرەدى.
بۇل جەردە قاراجات قانا ەمەس, ۋاقىت تا ۇنەمدەلەدى. مەردىگەرلەردىڭ جاۋاپكەرشىلىگى ارتىپ, ۇزاقمەرزىمدى جانە تۇراقتى كەلىسىمشارتتارعا يە بولادى. ەڭ باستىسى, سىبايلاس جەمقورلىق قاۋپى ازايادى.
بيىلدىڭ وزىندە «جاستار» ستاديونى, سەرۆيس جانە جاڭا تەحنولوگيالار كوللەدجى, پروتەزدىك-ورتوپەديالىق شەبەرحانانىڭ اپاتتى جاعدايدا تۇرعان عيماراتى, «ەل ىرىسى» كوممۋنالدىق بازارى جانە قاڭعىباس يتتەر مەن مىسىقتاردى اۋلاۋ قىزمەتى جەكەگە بەرىلگەن.
ساراپتاماعا قاراعاندا, مەملەكەت باسشىسىنىڭ پاندەميا كەزىندە ۇسىنعان بيزنەستى قولداۋ شارالارىنىڭ ناتيجەسىندە باتىس قازاقستان وبلىسىنىڭ 12 مىڭنان استام كاسىپكەرى 6 ملرد تەڭگەگە جۋىق قاراجات ۇنەمدەپتى.
«بيزنەستىڭ جول كارتاسى – 2025» مەملەكەتتىك باعدارلاماسى اياسىندا شاعىن جانە ورتا بيزنەس سۋبەكتىلەرىنە قولداۋ كورسەتىلدى. ناتيجەسىندە, جىل باسىنان بەرى 270 جۇمىس ورنى قۇرىلىپ, 2875 جۇمىس ورنى ساقتالعان.
«قاراپايىم زاتتار ەكونوميكاسى» باعدارلاماسى بويىنشا 19 ملرد تەڭگەگە 217 جوبا قارجىلاندىرىلدى.
– پرەزيدەنتىمىز ءوز جولداۋىندا: «مەملەكەت شارۋاشىلىقتى ءتاۋىر جۇرگىزە المايدى دەگەن قاعيدا اكسيوماعا اينالدى» دەگەن بولاتىن. سول سەبەپتى ءبىز وبلىس بيۋدجەتى شىعىندارىن وڭتايلاندىرۋ جانە كاسىپكەرلەرگە قولداۋ جاساۋ ماقساتىندا كوممۋنالدىق نىسانداردى سەنىمگەرلىك باسقارۋعا بەرۋ جۇمىستارىن جۇرگىزۋ ۇستىندەمىز, – دەيدى ءوڭىر باسشىسى.
مىسال ءۇشىن ايتا كەتسەك, كوممۋنالدىق «ەل ىرىسى» بازارىن العان ينۆەستور 500 ملرد تەڭگە قاراجات ءبولىپ, بازاردىڭ ينفراقۇرىلىمىن رەتتەپ جاتىر. سونداي-اق قوسىمشا تاعى 15 جۇمىس ورنى اشىلدى. وسىلايشا جەكە سەكتور – كاسىپكەرلەر وزدەرىنە بەرىلگەن م ۇلىكتى ءتيىمدى پايدالانۋمەن قاتار, ودان تيىسىنشە پايدا تاۋىپ, سالىق تولەپ, جۇمىس ورىندارىن ساقتاپ وتىرعانىن كورسەتەدى.
ەل ىشىندە ءتۇرلى پىكىر ايتىلعانىمەن, باتىس قازاقستان وبلىسىندا مەملەكەت قاراجاتىن ۇنەمدەۋ شارالارىنىڭ بىرقاتارى سپورت سالاسىن وڭتايلاندىرۋ تۇرىندە كورىنىس تاپتى.
– ءبىز ءوڭىردىڭ سپورت سالاسى قىزمەتىنە تولىق تالداۋ جاسادىق. ءسويتىپ بيىل دەنە شىنىقتىرۋ مەن سپورت سالاسى بويىنشا 57,5 شتاتتىق بىرلىك قىسقارتىلدى. قىسقارتىلعانداردىڭ 30 پايىزى – اكىمشىلىك قىزمەتكەر بولسا, قالعانى – تەحنيكالىق قىزمەت كورسەتۋشى پەرسونال. ناتيجەسىندە, بيىلدىڭ وزىندە 28 ملن تەڭگەدەن استام قارجى ۇنەمدەلەدى. وسى ۇنەمدەلگەن قاراجات جاتتىقتىرۋشىلاردىڭ نەمەسە وزگە دە قىزمەتكەرلەردىڭ ەڭبەكاقىسىن وسىرۋگە, سپورت ۇيىمدارىنىڭ ماتەريالدىق بازاسىن نىعايتۋعا جوسپارلانىپ وتىر, – دەيدى باتىس قازاقستان وبلىستىق دەنە شىنىقتىرۋ جانە سپورت باسقارماسىنىڭ باسشىسى قايمەن ەسەندياروۆ.
پرەزيدەنت ءوز جولداۋىندا: «قارجى جەتىسپەۋشىلىگى جاعدايىندا كاسىبي سپورت كلۋبتارىن تولىقتاي بيۋدجەت قاراجاتى ەسەبىنەن ۇستاۋدىڭ ماڭىزدىلىعى جوق» دەگەن بولاتىن. باتىس قازاقستان وبلىسىندا «اقجايىق» فۋتبول كلۋبى, «اقجايىق» دوپتى حوككەي كلۋبى جانە ۆولەيبول كومانداسى سەكىلدى 3 كاسىبي سپورت كلۋبى بار. قازىر اتالعان كاسىبي كلۋبتاردىڭ بيۋدجەتىن قىسقارتىپ, ۇنەمدەلگەن قاراجاتتى بالالار مەن جاسوسپىرىمدەر سپورتىن ىلگەرىلەتۋ, بۇقارالىق سپورتتى دامىتۋ, سونىڭ ىشىندە اۋدان سپورتىنىڭ قاجەتىنە جۇمساۋ قاراستىرىلىپ جاتىر.