كەشە وبلىسقا ءبىر كۇندىك جۇمىس ساپارىمەن ەلىمىز پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ كەلدى.
كەشە وبلىسقا ءبىر كۇندىك جۇمىس ساپارىمەن ەلىمىز پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ كەلدى.
باقىتجان ساعىنتاەۆ جۇمىس ساپارىن ەكىباستۇزداعى ءوندىرىس ورىندارىن ارالاۋدان باستادى. الدىمەن «وريكا قازاقستان» اق-تا بولدى. بۇل ءوندىرىس وشاعى وندىرىسكە قاجەت جارىلعىش زاتتاردى, ياعني ەمۋلسيالىق ماتريتسا وندىرەدى. جالپى جوبالىق قۋاتى جىلىنا 21 توننا. بيىلعى جىلى 10 مىڭ 500 توننانىڭ ءونىمىن شىعارعان كاسىپورىن 2015 جىلى ءوڭىر بوزشاكول تاۋ كەن بايىتۋ كومبيناتى ىسكە قوسىلعان كەزدە تولىق قۋاتىنا شىعا الادى. قازىر «وريكانىڭ» ونىمدەرىن «بوگاتىر-كومىر», «شىعىس», «مايكوبە» كومىر كەنىشتەرى پايدالانۋدا.
بۇل زاۋىتتىڭ اشىلۋى قازىرگى زامانعى تەحنولوگيالاردى پايدالانىپ ءونىم كولەمىن ارتتىرۋعا, يننوۆاتسيانى تەرەڭىرەك يگەرۋگە, جارىلىس كەزىندە قورشاعان ورتاعا تيگىزەتىن زيان كولەمىن ازايتۋعا, تاسىمالداۋ, قۋاتتاۋ كەزىندە جارىلعىش زاتتاردىڭ قاۋىپسىزدىگى مەن ساقتالۋ ساپاسىن ارتتىرۋعا مۇمكىندىك بەرەدى.
بۇدان كەيىن ءبىرىنشى ۆيتسە-پرەمەر باقىتجان ساعىنتاەۆ ءۇيد باعدارلاماسى بويىنشا ىسكە اسىپ جاتقان «پرومماشكومپلەكت»» جشس-دا بولدى. بۇل سەرىكتەستىك تەمىرجول دوڭعالاقتارىن جاساپ شىعارادى. وتكەن جىلى ءبىرىنشى كەزەڭى ىسكە قوسىلعان جوباعا تارتىلعان قارجى 9,5 ملرد. تەڭگە. كاسىپورىننىڭ جىلدىق جوبالىق قۋاتتىلىعى – 1 مىڭ باعىتتامالى بۇرما, 1 مىڭ ايقاستىرما, 48 مىڭ دوڭگەلەكتى كەشەندى جوندەۋ جانە وڭدەۋ. زاۋىت ءونىمى تاجىكستان, قىرعىزستان مەن وزبەكستانعا ەكسپورتتالۋدا. ءوندىرىس ورنىندا وزىق تەحنولوگيالار مەن قۇرىلعىلار قولدانىلادى. ولار يتاليا, گەرمانيا, رەسەي, ۋكراينادان اكەلىنگەن. بۇگىندە ءوندىرىس ورنىندا 469 جۇمىسشى ەڭبەك ەتۋدە.
باقىتجان ساعىنتاەۆ بىلتىر اشىلعان ەلباسىنىڭ تىكەلەي تاپسىرماسى بويىنشا بيزنەستىڭ الەۋمەتتىك جاۋاپكەرشىلىگى شەڭبەرىندە جۇزەگە اسقان مۋزىكالىق مەكتەپتە ءبىلىم الىپ جاتقان بالالارمەن دە كەزدەستى.
كەلەسى كەزەكتە وبلىس ورتالىعىنداعى «مۇناي حيميا زاۋىتى» اق-قا بارىپ, الداعى جىلدارعا ارنالعان زاۋىتتى جاڭعىرتۋ جۇمىسىمەن تانىستى. زاۋىت رۋمىندىق «SR Rominserv SRL» كومپانياسىمەن بىرلەسىپ قۇرىلىس-مونتاج جۇمىستارى ءوندىرىسىن قۇرۋ جونىندەگى كەلىسىمگە قول قويعان. بۇل كەلىسىم ىسكە اسىرىلۋ ۇستىندە.
ءبىرىنشى ۆيتسە-پرەمەر «پاۆلودار» ارنايى ەكونوميكالىق ايماعىندا بولدى. ايماقتا قازىر 2 زاۋىت سالىنىپ, تاعى سەگىز جوبانى ىسكە قوسۋ جۇمىستارى جۇرگىزىلۋدە. مۇندا باقىتجان ساعىنتاەۆ «ۋپنك-پۆ» جشس مۇنايلى كوكس وندىرەتىن زاۋىت قۇرىلىسىمەن تانىستى. مۇنداعى مۇنايلى كوكس وتاندىق شيكىزاتتى قولدانۋ ارقىلى الىنادى. ال, بۇل جوبا ىسكە اسىرىلعاننان كەيىن ەلىمىزدىڭ قالايى ءوندىرۋ سالاسى العا باسارى ءسوزسىز.
جۇمىس ساپارىنىڭ سوڭىندا ەلىمىزدىڭ پرەمەر-ءمينيسترىنىڭ ءبىرىنشى ورىنباسارى «پاۆلودار» ەركىن ەكونوميكالىق ايماعىن دامىتۋ بويىنشا كەڭەس وتكىزدى. كەڭەس قورىتىندىسىندا وبلىس اكىمدىگىنە ارنايى ەكونوميكالىق ايماقتىڭ جوباسىن ىسكە اسىرۋ بويىنشا جۇمىستى جانداندىرۋدى جانە بەلگىلەنگەن مەرزىمدە كاسىپورىندى ىسكە قوسۋ ءۇشىن بارلىق شارالاردى قولعا الۋدى تاپسىردى. كاسىپكەرلىكتى قولداۋ شارالارىن كۇشەيتۋدى, وبلىستاعى دامۋ جانە قارجى ينستيتۋتتارى قىزمەتىن جانداندىرۋدى مىندەتتەدى.
فاريدا بىقاي,
«ەگەمەن قازاقستان».
پاۆلودار وبلىسى.