الەۋمەتتىك جەلىدە تاراعان "باتىس قازاقستان وبلىسىنىڭ تاسقالا اۋدانىندا قۇلدىقتا بولىپ, قاشىپ شىقتىم" دەگەن قىرعىز ازاماتىنىڭ اۋديوجازباسى بقو پوليتسيا دەپارتامەنتىن اياعىنان تىك تۇرعىزدى, دەپ حابارلايدى Egemen.kz.
"قىرعىزستان ازاماتى حالىقارالىق جانجال تۋدىرا جازدادى. ول تىركەۋ مەرزىمى تاۋسىلۋىنا بايلانىستى دەپورتاتسيالانۋدان قورقىپ, وسىنداي ارەكەتكە بارعان. ول ءوزىن "باتىس قازاقستان وبلىسىنىڭ ءبىر اۋىلىندا مەنى كۇشپەن ۇستاپ, قۇل رەتىندە پايدالاندى" دەپ مالىمدەگەن", دەيدى باتىس قازاقستان وبلىستىق پوليتسيا دەپارتامەنتى تاراتقان ءباسپاسوز مالىمدەمەسىندە.
WhatsApp جەلىسى ارقىلى تاراعان اۋديوجازبادا: "اسسالاۋماعالايكۋم, قىرعىز ەلىم! مەنىڭ اتى-ءجونىم ازاتبەك اميروۆ, مەن ۋرالسك دەگەن شااردان قاچىپ كەلەاتامىن. ۋرالسك دەگەن شاار, رايون تاسقالا, ايىلدىڭ ەسكى اتى ۆاۆيلنىي, جاڭا اتى – باستاۋ. وشۋل جەردە قازاقتىڭ قولىندا قۇل بولىپ توعىز اي ىچتەدىم. ءازىر قاچىپ كەتىپ باراتامىن. قىزى ارقىلى قاچىپ چىقتىم. انى سول جەردە ءوزىمىزدىڭ تاعى 4 قىرعىزىمىز قالدى. ەڭ چوڭى – تەمىر دەگەن كىسى, جاسى التمىشتارعا بارىپ قالعان. قاراسۋدىڭ كەڭساي ايىلىنان بولادى. ەكىنچىسى دە سول قاراسۋدىڭ كەڭسايىنان. ءتورت قىرعىز جاران قالدى. ەكى بالا ءبىرىنچى ماي دەگەن ايىلدان بولادى. اتى-ءجونى – ەميل, قانىبەك. قىرعىز ەلى, شىعارىپ كەتەلى, قالىپ كەتتى بالدار 8 جىلدان بەرى قۇلشىلىقتا جۇرگەن", دەيدى ەر ادام داۋىسى.
بۇل اقپارات تاسقالا اۋداندىق پوليتسيا بولىمىنە 14 قاراشادا بەلگىلى بولعان. سول مەزەتتە وبلىستىق پوليتسيا دەپارتامەنتىنەن ارنايى جەدەل توپ قۇرىلىپ, ايتىلعان جەرگە اتتانعان. الايدا دابىل جالعان بولىپ شىققان. كۇشتەپ ۇستالعان شەتەل ازاماتتارى تابىلماعان.
– 1982 جىلى تۋعان قىرعىزستان ازاماتىنىڭ اۋديوجازباسى تەكسەرىلدى. اتالعان جەردەگى شارۋا قوجالىعىنىڭ بىرىندە ول ازاماتتىڭ جۇمىس ىستەگەن راس ەكەن. بىراق ول جالعىز بولعان. اۋىلدا باسقا شەتەل ازاماتى بولماعانىن جەرگىلىكتى حالىق تا راستايدى. اۋىلدا ول ازامات ەركىن جۇرگەن. جاز بويى بولعان ازامات قاراشا ايىنىڭ باسىندا الماتى قالاسى ارقىلى ءوز ەلىنە اتتانعان. شارۋا قوجالىعى باسشىسى وعان ەڭبەكاقى جانە جول شىعىنى ءۇشىن 100 مىڭ تەڭگە بەرگەن. تەكسەرۋ كەزىندە قىرعىز ازاماتىنىڭ تىركەۋ مەرزىمى اياقتالعانى, سوندىقتان كۇشتەپ دەپارتاتسياعا ۇشىراماس ءۇشىن وسىنداي وتىرىك قۇراستىرعانى بەلگىلى بولدى, - دەيدى باتىس قازاقستان وبلىستىق پوليتسيا دەپارتامەنتىنىڭ رەسمي وكىلى بولاتبەك بەلگىبەكوۆ.
پوليتسيا وكىلىنىڭ ايتۋىنشا, باتىس قازاقستان وبلىسىندا شالعايداعى ەلدى مەكەندەر مەن شارۋا قوجالىقتارىندا ەڭبەك ميگرانتتارىن زاڭسىز ۇستاۋ فاكتىلەرى ۇنەمى تەكسەرىلىپ وتىرادى.
بىزگە بەلگىلىسى, ازاتبەك اميروۆ 15 قاراشا كۇنى قىرعىزستان رەسپۋبليكاسىنىڭ كونسۋلى بەرگەن انىقتاما ارقىلى مەملەكەتتىك شەكارادان ءوتىپ, ءوز ەلىنە جەتكەن.
اۋديوجازبادا ايتىلعان دوستىق اۋىلدىق وكرۋگىنىڭ اكىمى حافيز مارات ۇلىنا تەلەفونمەن حابارلاستىق.
- ءيا, وسى وقيعا بويىنشا كوشى-قون پوليتسياسىنىڭ وكىلدەرى كەلىپ, اۋىلدا ارنايى تەكسەرىس جۇرگىزدى. ايتىلعان سوزدەر دالەلدەنبەدى. باستاۋ اۋىلى – شاعىن عانا ەلدىمەكەن, 26 ءۇيدىڭ 16-سىندا عانا تۇرعىن بار. وكرۋگ ورتالىعىنان 7 شاقىرىم جەردە ورنالاسقان, باستاۋىش مەكتەبىندە 7 بالا وقيدى. اۋىلدا ءبىر مال وسىرەتىن شارۋا قوجالىعى, كارتوپ ەگۋمەن اينالىسقان «يساعاليەۆ» جەكە كاسىپكەرلىگى بار. ءساۋىر ايىندا قىرعىز ازاماتى كەلگەنى راس, جاز بويى ەرلان يساعاليەۆتىڭ كارتوپ القابىنا كومەكتەسكەن. بۇل ءوزى 1 گەكتارعا جەتپەيتىن شاعىن ەگىستىك. قازاقى اۋىلدا بىرەۋ بىرەۋدەن ەشتەڭە جاسىرا المايدى عوي. شەتەل ازاماتتارى كۇشپەن ۇستالىپ, قۇل بولىپ جاتىر دەگەن جالعان ءسوز. ويتكەنى ءوزىم دە وسى اۋىلدا تۋىپ-ءوستىم. قازىر سايلاۋدىڭ قارساڭى, سايلاۋشىلار ءتىزىمىن تەكسەرۋ, تۇرعىلىقتى جەرىن انىقتاۋ ءجۇرىپ جاتىر. مىسالى, باستاۋ اۋىلىندا 31 سايلاۋشى بار. قىرعىز ازاماتىنىڭ نەگە بۇلاي ەلدى دۇرلىكتىرگەنىن بىلمەيمىن. مۇمكىن جالاقىعا نارازى بولدى ما ەكەن؟ بۇل ماسەلەنى جەكە كاسىپكەرگە جولىعىپ, ءوزىم دە انىقتاپ كورمەكپىن, - دەيدى حافيز مارات ۇلى.
P.S. باتىس قازاقستان وبلىستىق پوليتسيا دەپارتامەنتى تاراتقان اقپاراتقا قاراعاندا, بيىلعى مامىر-قىركۇيەك ايلارى ارالىعىندا سىرىم اۋدانىنداعى شارۋا قوجالىقتارىنىڭ بىرىندە 1963 جىلى تۋعان ازامات ەركىنەن تىس زاڭسىز ۇستالعان. وسىعان سايكەس پوليتسيا قىزمەتكەرلەرى قىلمىستىق كودەكستىڭ 126-بابى 1-تارماعى بويىنشا تەرگەۋ جۇرگىزۋدە.
باتىس قازاقستان