مىسىردا وتە قۇندى جادىگەرلەر تابىلدى. ولاردىڭ قاتارىندا ەكى جارىم مىڭ جىلدان استام ۋاقىت ساقتالعان جۇزدەن استام ساركوفاگ, جەرلەۋ ورىندارى مەن ونداعان ءمۇسىن بار.
تاريحي ورىندا قازبا جۇمىستارىن جۇرگىزگەن عالىمدار تەرەڭدىگى شامامەن 12 مەترلىك ءۇش مازاراتتى قازعان. پالەنباي جىل وتكەنىنە قاراماستان, جادىگەرلەر وتە جاقسى ساقتالعان ەكەن.
عالىمداردىڭ بولجامىنا سۇيەنسەك, بۇل جەردە جەرگىلىكتى اعاشتان جاسالعان ساركوفاگتى شىعاراتىن ۇلكەن شەبەرحانا بولۋى مۇمكىن. ازىرگە زەرتتەۋشىلەر ونى ىزدەستىرۋىن جالعاستىرا بەرمەك. الدا-جالدا تابىلا قالسا, وتە قۇندى ارتەفاكتكە اينالماق.
ماماندار پيراميدالاردان وڭتۇستىككە قاراي 16 شاقىرىم جەردە ورنالاسقان ساككارانىڭ الىپ قورىمىندا بىرنەشە اي بويى جۇرگىزىپ جاتقان قازبا جۇمىستارىن توقتاتقان جوق. ول جەرگە جاقىن ماڭدا وسى وركەنيەتتىڭ گۇلدەنۋى كەزىندە ەجەلگى مىسىردىڭ استاناسى بولعان مەمفيس ورنالاسقان. عالىمداردىڭ ايتۋىنشا, ازىرگە ساككارادا جاسىرىنىپ جاتۋى مۇمكىن ارتەفاكتىلەردىڭ تەك ءبىر پايىزى عانا تابىلعان.