شالعايداعى مەديتسينالىق مەكەمە

– بۇرىنعى عيمارات ەسكى بول­عان­دىق­تان, كوپ قيىندىق كوردىك. اسىرە­سە رەانيماتسيالىق كومەكتى قاجەت ەتەتىن ناۋ­قاستاردى ەكىنشى قاباتقا قول­مەن كوتەرىپ شىعاراتىن ەدىك. جاڭا اۋرۋ­حا­ناعا ارنايى ليفت ورناتىلدى. بۇل قىزمەتكەرلەرىمىزدىڭ جۇمىسىن جەڭىل­دە­تەدى. ەسكى اۋرۋحاناداعى وپەرا­تسيا­لىق كابينەت ءبىر ادامعا ارنالعان بولسا, ەندى مۇندا ەكى ناۋقاسقا ءبىر مەزگىلدە وتا جاساۋعا مۇمكىندىك بار. پەرزەنتحانا بولىمشەسى اناعا رەانيماتسيالىق كومەك كورسەتۋگە, نارەستەنىڭ جۇرەك سوعىسىن تەكسەرۋگە, شالا تۋعان نارەستەلەردى باقىلاۋعا ارنالعان كيۋۆەزدەرمەن قام­تىلدى, – دەيدى قۇرمانعازى اۋداندىق ورتالىق اۋرۋحاناسىنىڭ ديرەكتورى گۇلسارا نۇرماعانبەتقىزى.

اۋداندا قاۋىپتى ىندەتتىڭ ەكىنشى تولقىنىنا دايىندىق قولعا الىنىپ وتىر. سوعان وراي جاڭا اۋرۋحانانىڭ حيرۋرگيا ءبولىمى پروۆيزورلىق ستاتسيونار رەتىندە جاساقتالدى. اۋرۋحاناداعى بولىمشەلەرگە 63 وتتەگى نۇكتەسى قوسىلدى. وتتەگىنى بەرۋ پروتسەسى ءبىر ورتالىقتان باسقارىلادى. پروۆيزورلىق ستاتسيونارعا ديرەكتوردىڭ ەمدەۋ ءىسى جونىندەگى ورىنباسارى, حيرۋرگ نۇرعيسا شولپانوۆ جەتەكشىلىك ەتەدى.

– ءار پالاتاعا ءۇش وتتەگى نۇكتەسى جۇر­گىزىلدى. سونداي-اق اۋرۋحانا 9 وكپەگە جاساندى تىنىس بەرۋ اپپاراتىمەن قامتىلدى. رەانيماتسيالىق 3 توسەكتىك ورىن بار. ەكى ينتەنسيۆتى تەراپيا كەرەۋەتى جاساقتالدى. رەانيماتولوگ-دارىگەرلەر سوڭعى ەمدەۋ حاتتاماسى بويىنشا ونلاين وقۋ كۋرستارىنان ءوتتى. قازىرگى اۋرۋحانانىڭ پروۆيزورلىق بولىمشەسىندە 28 ورىن دا­يىندالدى. ناۋقاس سانى كوبەيەتىن بولسا, ونى 40-قا دەيىن ۇلعايتۋعا مۇمكىندىك بار, – دەيدى حيرۋرگ ن.شولپانوۆ.

قۇرمانعازى اۋدانى اكىمىنىڭ ورىنباسارى جاستىلەك حاسانوۆتىڭ ايتۋىنشا, مۇندا ورتالىق اۋرۋحانادان وزگە, ورتالىق ەمحانا, 16 امبۋلاتوريا, 2 سەلولىق اۋرۋحانا, 8 مەديتسينالىق پۋنكت بار. بۇلاردا 63 دارىگەر, 336 ورتا بۋىن قىزمەتكەرى تۇرعىنداردىڭ دەنساۋلىعىن قورعاۋعا جۇمىلىپ وتىر. ال جاڭا اۋرۋحانادا 13 جوعارى, 49 ورتا, 36 كىشى بۋىن قىزمەتكەرى جۇمىس ىستەيدى.

اتىراۋ وبلىسى,

قۇرمانعازى اۋدانى