ەرلىك – اركىمنىڭ بويىنا ۇيا سالا بەرمەيتىن قاسيەت. قاس-قاعىم ساتتە جۇرەگىنىڭ امىرىنە جۇگىنىپ, وزگەلەر ءۇشىن باسىن بايگەگە تىگەتىن, پارىزى مەن قارىزىن ادال اتقاراتىن ناعىز ازاماتتار عانا تاۋەكەلگە بارا الادى. حالىق قاھارمانى, كاپيتان عازيز بايتاسوۆ وسىنداي ازامات ەدى. ول بەيبىت حالىقتى تەرروريستەن قورعاپ قالۋ ءۇشىن تۋرا كەلگەن اجالدى قايمىقپاي قارسى الدى.
وسىدان 9 جىل بۇرىن, 2011 جىلعى 12 قاراشادا تاراز قالاسىندا بولعان قانقۇيلى شابۋىل وبلىس تۇرعىندارىن عانا ەمەس, بۇكىل ەلدى ءدۇر سىلكىندىردى. ءوزىن جيحادتىڭ جولىن ۇستاۋشىمىن دەپ سانايتىن تەرروريست ايدىڭ-كۇننىڭ امانىندا ەش جازىعى جوق جەتى ادامدى, ونىڭ ىشىندە ىشكى ىستەر ورگاندارىنىڭ 3 پوليتسەيى مەن ۇلتتىق قاۋىپسىزدىك كوميتەتىنىڭ 2 قىزمەتكەرىن مەرت قىلدى. ءۇش قوعام ساقشىسى جاراقاتتاندى.
تۇلا بويدى تۇرشىكتىرەر وسى وقيعا كەزىندە تارازدىق بەيبىت تۇرعىنداردىڭ ءومىرىن ساقتاۋ ءۇشىن قاراقشى اتقان وق كەۋدەسىن تەسىپ وتكەنىنە قاراماستان, جارىلىس جاساعان تەرروريستى دەنەسىمەن جاپقان جول پوليتسياسىنىڭ كاپيتانى عازيز بايتاسوۆ ەرلىكپەن قازا تاپتى. ەر ەل ءۇشىن تۋادى جانە ەل ءۇشىن باسىن بايگەگە تىگەدى.
قارۋلى قىلمىسكەردى قۇرىقتاۋ بارىسىندا ع.بايتاسوۆتان باسقا مامانداندىرىلعان كۇزەت قىزمەتى باسقارماسى جەدەل دەن قويۋ ۆزۆودىنىڭ قىزمەتكەرلەرى, پوليتسيا اعا سەرجانتى پولات ايانقۇلوۆ پەن پوليتسيا سەرجانتى جاقسىبەك بايسەيىتوۆ تە ەرلىكپەن قازا تاپتى. ولار ومىرلەرىنىڭ سوڭعى ءساتى سوققانشا, ەل الدىنداعى انتىن ادال ورىنداپ, ەرلىكپەن كوز جۇمدى. ەشكىم دە ەرلىكتى باتىر بولامىن, تاريحتا قالامىن دەپ, ەسەپپەن جاسامايدى. ناعىز ادال ازامات ەل تىنىشتىعىنا, بەيبىت ادامدار ومىرىنە قاۋىپ تونگەن ساتتە تاۋەكەلگە باس تىگەدى. مۇنداي ساتتە ەردىڭ ەرى, ءتىپتى ارانىن اشقان اجالعا دا تايسالماي قارسى تۇرادى. تارازداعى قاندى وقيعا كەزىندە جول پوليتسياسى كاپيتانى ع.بايتاسوۆ سونداي بيىكتەن تابىلدى.
كاپيتان عازيز تاراز قالاسىندا ابدىبەك بايتاسوۆ پەن گۇلزات شىركەەۆانىڭ وتباسىندا دۇنيەگە كەلگەن. مەكتەپتى جۋالى اۋدانى تۇيمەكەنت اۋىلىندا ءبىتىردى.مەكتەپتەن كەيىن عازيز بايتاسوۆ كەڭەس اسكەرىنىڭ قاتارىنا شاقىرىلدى. 1992 جىلى جەزقازعان پوليتەحنيكالىق ۋنيۆەرسيتەتىنىڭ قاراتاۋ فيليالىنىڭ سىرتتاي بولىمىنە «اۆتوكولىك شارۋاشىلىعى» فاكۋلتەتىنە وقۋعا تۇسەدى. كەشكى بولىمدە وقىپ ءجۇرىپ جۇمىسقا تۇرادى. اكەسىنىڭ قايتىس بولۋىنا بايلانىستى تاراز قالاسىنا اۋىسىپ كەلىپ, سىرتتاي قاراتاۋ تەحنيكالىق كوللەدجىن ءتامامدايدى. كەيىنىرەك ءال-فارابي اتىنداعى قازاق ۇلتتىق ۋنيۆەرسيتەتىن زاڭگەر ماماندىعى بويىنشا اياقتايدى.
ەڭبەك جولىن 1993 جىلى جامبىل وبلىستىق ءىىب ۋاقىتشا ۇستاۋ يزولياتورىنىڭ ايداۋىل قىزمەتىندە باستادى. فاكۋلتەتتەگى وقۋىنا بايلانىستى 1996 جىلى جول پوليتسياسىنىڭ ينسپەكتورى قىزمەتىنە اۋىسقان ەدى. 2010 جىلى جامبىل وبلىسى ءىىد ءىىبب 1-ۆزۆود كومانديرى بولىپ تاعايىندالدى. پوليتسيا كاپيتانى قىزمەتى بارىسىندا قىلمىسكەرلەردى ۇستاۋ كەزىندە شەبەر ءىس-ارەكەتتەرى جانە جۇمىستاعى جاقسى كورسەتكىشتەرى ءۇشىن ءىىد باسشىلىعىنىڭ العىس حاتتارىمەن, باعالى سىيلىقتارمەن بىرنەشە رەت ماراپاتتالعان.
اناسى گۇلزاتتىڭ ايتۋىنشا, عازيز مەكتەپتە وتە بەلسەندى بولىپتى. ءاربىر وتىلەتىن ءىس-شارانىڭ باسى-قاسىندا قىزىل گالستۋك تاعىپ, جالاۋىن جەلبىرەتكەن عازيز جۇرەدى ەكەن. جاستايىنان ەلىنە, جەرىنە دەگەن سەزىمى ەرەكشە, ءوز جانىن ادامگەرشىلىك, ادىلدىك جولىندا ايامايتىن جان ەدى دەيدى اعايىن-تۋىستارى. وتباسىنىڭ جالعىز ۇلى ارتىنان ەرگەن ءۇش قارىنداسىن جەتىلدىرىپ, اياعىنان تۇرىپ كەتۋىنە كوپ كومەك كورسەتكەن.
ەلى ءۇشىن ەڭبەك ەتىپ جۇرگەن باتىر ۇل قايعىلى وقيعا بولاتىن كۇنى دە تاڭەرتەڭ ەرتە تۇرىپ, جۇمىسىنا اسىعىپ كەتكەن ەكەن. ۇيدەن شىعار الدىندا ادەتتەگىدەي ءتاتتى ۇيقى قۇشاعىندا جاتقان 11 جاستاعى ارمانجانى مەن 3 جاسار ءادىلجاننىڭ ماڭدايىنان قۇشىرلانا ءبىر يىسكەيدى. ەندى قۇداي قالاسا, ونشاقتى كۇننەن كەيىن كىشى ۇلىنىڭ سۇندەت تويىن جاسايدى. دوستارى مەن تۋىستارىنا شاقىرۋ بيلەتىن ءوز قولىمەن تاراتىپ شىققان ەدى.
كۇندەلىكتى قاربالاس تىرلىك مويىن بۇرۋعا مۇرشا بەرمەيدى. قىستىڭ ىزعارى بىلىنە باستاسىمەن جول بويىندا, كوشەدە كولىك قوزعالىسى قيىنداي باستايدى. بۇل جاۋاپكەرشىلىكتى بۇرىنعىدان دا كۇشەيتە ءتۇسۋدى تالاپ ەتەدى. جۇمىسىن جاقسى بىلەتىن كاپيتاندى جامبىل وبلىسى جول پوليتسياسى جەكە باتالونىنىڭ ۆزۆود كومانديرى ەتىپ تاعايىنداعان بولاتىن.
سول كۇنى تۇسكە تامان قاسىندا تاجىريبەدەن ءوتىپ جۇرگەن رۋسلاندى تاماقتانۋعا جىبەرگەن. كەنەت راتسيادان ورتالىق پاركتە اتىس بولعانىن, قازا تاپقاندار بار ەكەنىن ەستىپ, دەرەۋ وقيعا ورنىنا كەلىپ جەتتى. قىلمىستى ءىستىڭ بايىبىنا بارىپ ۇلگەرگەن بايتاسوۆ ءدال سول كەزدە سودىر باعىت العان تۇستىڭ الدىن وراۋعا تىرىستى. قازىبەك بي مەن اباي كوشەلەرىنىڭ قيىلىسىندا قارۋلى قىلمىسكەردى بايقاپ قالدى. قارسى الدىنان تىم جاقىن كەلىپ قالعان جول پوليتسياسى قىزمەتكەرىن كورگەن قانىشەر ويلانباستان اۆتوماتتان وق جاۋدىردى. عازيز ماشيناسىنان تۇسە سالا, وعان قارسى وق اتىپ, ونى اياعىنان جارالادى. قىلمىسكەر كوشەدە تۇرعان ماشينالاردىڭ ارتىنا تىعىلىپ, قاشا جونەلدى. كوز جازىپ قالماۋعا تىرىسىپ ەدى, كەنەت كوزى قاراۋىتىپ كەتتى. ارقاسىنا بىرەۋ ءبىر نارسە تىعىپ العانداي بولىپ, كۇيدىرىپ بارادى. بۇرىلىپ قاراسا, قىلمىسكەر قارۋ كەزەنىپ تۋ سىرتىندا تۇر. ءبىر قولىندا گراناتا. ودان ءارى ويلاناتىن ۋاقىت تا بولمادى. ارىستانشا اتىلىپ بارىپ, باس سالدى. قانىشەردى استىنا باسىپ الىپ, قولىن قايىرۋعا تىرىسقان... امال قانشا... ءوزىن-ءوزى جارىپ جىبەرگەن لاڭكەس, ەر جىگىتتى مەرت قىلدى.
حالىق قاھارمانى ع.بايتاسوۆتىڭ ەرلىگىن ۇلىقتاۋ ماقساتىندا ەلىمىزدىڭ تۇكپىر-تۇكپىرىندە جىل سايىن ەسكە الۋ كۇنىنە ارنالعان سالتاناتتى ءىس-شارا ءوتىپ كەلەدى. بيىل دا بۇل ءداستۇر جالعاسىن تاپتى.
جامبىل وبلىسى پوليتسيا دەپارتامەنتى 12 قاراشادا حالىق قاھارمانى ع.بايتاسوۆتى ەسكە الدى. ءىس-شاراعا جامبىل وبلىسى پوليتسيا دەپارتامەنتىنىڭ باسشىلىعى, ع.بايتاسوۆتىڭ تۋىستارى, جامبىل وبلىسى مەملەكەتتىك ورگاندارىنىڭ وكىلدەرى, ىشكى ىستەر ورگاندارىنىڭ ارداگەرلەرى قاتىستى.
سالتاناتتى ميتينگ حالىق قاھارمانى عازيز بايتاسوۆتىڭ ەسكەرتكىشىنە گۇل شوقتارىن قويۋمەن باستالدى. سالتاناتتى گۇل شوقتارىن قويۋ راسىمىنەن كەيىن, باتىردى ءبىر مينۋت ۇنسىزدىكپەن ەسكە الىپ, ءۇش دۇركىن سالتاناتتى ساليۋت اتىلدى.
«حالىق قاھارمانى, ىشكى ىستەر ورگاندارىنىڭ ۇزدىك قىزمەتكەرلەرىنىڭ ءبىرى – ءىىد جول پوليتسياسى جەكە باتالونى 1-ۆزۆودىنىڭ كومانديرى, پوليتسيا كاپيتانى عازيز بايتاسوۆتىڭ قازا بولعانىنا بيىل 9 جىل تولدى. از عانا عۇمىرىندا اسقان ەرلىگىمەن وتانعا, تۋعان جەرگە دەگەن سۇيىسپەنشىلىكتىڭ بيىك ولشەمىن كورسەتكەن قاھارمان ارىپتەسىمىزدىڭ ەرلىگى وسكەلەڭ ۇرپاققا ۇلگى ەكەنى داۋسىز. تەك ناعىز پاتريوت ءوزىنىڭ ءومىرى تۋرالى ويلاماي, ەرلىككە بارا الادى. جادىمىزدا ماڭگى ساقتالاتىن ءوزىنىڭ پاتريوت ۇلدارىن وتانىمىز ەشقاشان ۇمىتپايدى», دەدى جامبىل وبلىسىنىڭ پوليتسيا دەپارتامەنتى باستىعى جانات سۇلەيمەنوۆ.
ع.بايتاسوۆتىڭ جۇبايى گۇلجان تاجيەۆا ءوز سوزىندە جامبىل وبلىسىنىڭ پد باسشىلىعى مەن جەكە قۇرامىنا وتباسىنا جاساعان قامقورلىعى ءۇشىن العىسىن ءبىلدىردى. ءىس-شارا بارىسىندا وبلىستىق تاريحي-ولكەتانۋ مۋزەيىندە حالىق قاھارمانى ع.بايتاسوۆقا ارنالعان ستەند اشىلدى.
سونداي-اق اقتوبەلىك ءتارتىپ ساقشىلارى دا باتىر پوليتسەيدى ەسكە الدى. عازيز بايتاسوۆ – «حالىق قاھارمانى» اتاعىنا يە بولعان قازاقستانداعى العاشقى پوليتسەي. «كاپيتان بايتاسوۆ – ءاربىر پوليتسيا قىزمەتكەرى مەن قاراپايىم ازاماتتار ءۇشىن ەرلىك پەن ابىروي ۇلگىسى», دەپ ەسەپتەيدى اقتوبەلىك ءتارتىپ ساقشىلارى.
ز ۇلىمدىققا كەۋدەسىن توسەپ, جانىن پيدا ەتكەن عازيزدەي ەرلەر بولماسا, قوعام قايتەر ەدى؟! نەگىزى باتىرلىقتى باعالاۋ ارقىلى بوزداقتاردىڭ ەسىمىن ارداقتاپ, ەلدىگىمىزدىڭ كوشىن تۇزەيتىن ۇرپاققا ۇلگى ەتەمىز. ولار ماڭگىلىك ساپارعا اتتانسا دا, حالقىنا قىزمەت ەتە بەرەدى. كاپيتان بايتاسوۆ — سولاردىڭ ءبىرى.