تۇركيادا كوروناۆيرۋس جۇقتىرۋ جاعدايلارى كوبەيۋىنە بايلانىستى كوپشىلىك جۇرەتىن كوشەلەردە جانە قوعامدىق كولىك ايالدامالارىندا تەمەكى شەگۋگە تىيىم سالىندى. بۇل تۋرالى رەسپۋبليكانىڭ ءىىم نۇسقاۋحاتىندا ايتىلعان, دەپ حابارلايدى Egemen.kz Tengrinews.kz سايتىنا سىلتەمە جاساپ.
"وسىعان دەيىن جاريالانعان نۇسقاۋحاتتا بارلىق قوعامدىق جەرلەردە (تۇرعىن ۇيلەردەن باسقا) ازاماتتار بەتپەردە تاعۋعا مىندەتتەلگەنى تۋرالى جازىلعان ەدى. بىراق ادامدار تەمەكى شەگۋ ءۇشىن بەتپەردەسىن شەشىپ, نە تومەن ءتۇسىرىپ تاستايتىن بولعان, بۇل دەگەنىمىز ونى دۇرىس تاقپاۋ. وسىعان بايلانىستى 12 قاراشادان باستاپ بارلىق پروۆينتسيادا كوپشىلىك ورىنداردا جانە قوعامدىق كولىك ايالدامالارىندا تەمەكى شەگۋگە تىيىم سالىندى", دەلىنگەن نۇسقاۋحاتتا.
"تىنىس الۋ ارقىلى وڭاي جۇعاتىن كوروناۆيرۋستىڭ تاراتپاۋ ءۇشىن بەتپەردە تاعۋدى ۇنەمى قاداعالاۋ قاجەت" ەكەنى ايتىلادى.وسىعان دەيىن دەنساۋلىق ساقتاۋ ءمينيسترى فاحرەتتين كودجا تۇركيادا كوروناۆيرۋس پاندەمياسى ەكىنشى شىڭىنا جەتكەنىن ايتتى. سارسەنبىدە تۇركيادا كوروناۆيرۋس ينفەكتسيان جۇقتىرعاندار سانى 2693-كە جەتتى, بۇل 29 ساۋىردەن بەرگى ەڭ ۇلكەن كورسەتكىش. جۇقتىرعانداردىڭ جالپى سانى 400 مىڭنان, ال قايتىس بولعاندار سانى 11 مىڭنان استى.