جاياۋ ءجۇرۋ, جاياۋ الىس ساپارلارعا شىعۋ – ءارى دەنساۋلىقتىڭ, ءارى ەل تانىپ, جەر تانۋدىڭ كەپىلى. «ەر ازىعى مەن ءبورى ازىعى – جولدا» دەمەكشى, جاياۋلاتا ساپارعا شىققان جولاۋشىنى قارسى الىپ, قۇرمەت كورسەتۋ – قوناقجاي حالقىمىزعا ءتان قاسيەت.
قيىرلارعا جاياۋ جول تارتا ساپار شەگەتىن ءداستۇردى جاڭعىرتۋشى جانكەشتى جانداردىڭ ءبىرى – شاپشاڭ جۇرۋدەن سپورت شەبەرى, كاراتەشى, رۋحاني ىزدەنۋشى اقتوبەلىك سارسەنباي سامەت ۇلى ەرقاسىموۆ. ءال-ءفارابيدىڭ 1150 جىلدىعى, ءپىر بەكەت اتانىڭ 270 جىلدىعى, اباي قۇنانباي ۇلىنىڭ 175 جىلدىق مەرەيتويى قۇرمەتىنە ارناعان كەزەكتى «قاسيەتتى ساپار» اتتى جاياۋ ەكسپەديتسياسىنىڭ 80%-ىن ءجۇرىپ وتكەن ول ماڭعىستاۋ وڭىرىنە تابان تىرەدى. قازاق جەرىندەگى قاسيەتتى جەرلەردى ارالاپ دۇعا ەتۋ, ەل مەن جەردىڭ اماندىعى مەن بۇتىندىگى, جارقىن بولاشاعى ءۇشىن تىلەك تىلەۋ, قازاق حالقىنىڭ رۋحاني تانىمدارىن سانادا جاڭعىرتۋ, كيەلى ورىندار مەن تاريحي تۇلعالاردى ۇلىقتاۋ, بەيىتتەرىنە زيارات ەتۋ جانە جاس ۇرپاققا ادام بويىنداعى جان مەن ءتاننىڭ مۇمكىندىگىن كورسەتۋ, سونداي-اق ەلىمىزدەگى رۋحاني-مادەني تۋريستىك ورىندارعا سەرپىن بەرۋ, نازار اۋدارتۋ ماقساتىنداعى «قاسيەتتى ساپار» شاراسى قازاقستان استاناسى مەن ءتورت وبلىسى – نۇر-سۇلتان قالاسى, تۇركىستان, قىزىلوردا, اقتوبە, ماڭعىستاۋ اۋماعىن قامتيتىن جوبا.
ءابۋ ناسىر ءال-فارابي تۋعان جەر – تۇركىستان وبلىسىنىڭ ءشاۋىلدىر اۋدانىنا, ودان وتىرار اۋدانىنداعى ارىستان باب مازارىنا زيارات ەتىپ, تۇركىستان قالاسىنداعى قوجا احمەت ياساۋي كەسەنەسى ارقىلى قىزىلوردا وبلىسى, قارماقشى اۋدانى, جوسالى كەنتىندەگى قورقىت اتا كەشەنىنە جەتىپ, ودان اقتوبە وبلىسى, شالقار اۋدانىنىڭ بوزوي كەنتىنە, ودان ماڭعىستاۋ وبلىسى, بەينەۋ اۋدانى ەسكى بەينەۋدەگى بەكەت اتا مەشىتىنە دەيىن جەتەتىن ساپاردىڭ جول ۇزاقتىعى شامامەن 1 500 شاقىرىمدى قامتىپ, 1 اي ۋاقىتقا سوزىلادى دەپ ەسەپتەلگەن.
بۇعان دەيىن سارسەنباي 1999 جىلى ءپىر بەكەت اتانىڭ 250 جىلدىعى اياسىندا اقتوبە وبلىسى, بەكقۇل اۋليە – تاما ەسەت كوكى ۇلى – دوسجان حازىرەت – كوك ەتىك اۋليە – ءداۋىمشار باتىر – اسان قوجا – بازار قوجا – اتىراۋ وبلىسى, بەكەتا اتا اقمەشىتى, قۇلسارى قالاسى – ماڭعىستاۋ وبلىسى, ەسكى بەينەۋدەگى جانە وعىلاندىداعى بەكەت اتا مەشىتتەرى بويىنشا ساپارلاپ, 1 440 شاقىرىم جولدى جاياۋ باعىندىرعان. اراعا ون جىل سالىپ, ياعني 2009 جىلى ول ءپىر بەكەت اتانىڭ 260 جىلدىعىنا وراي ماڭعىستاۋ وبلىسىنداعى ماڭعىستاۋ اۋدانى «اداي اتا – وتپان تاۋ» تاريحي-مادەني كەشەنى – قاراقيا اۋدانى شوپان اتا مەشىتى – وعىلاندىداعى بەكەت اتا مەشىتىنە دەيىن 250 شاقىرىمدى ءجۇرىپ وتكەن بولاتىن.
ساعاتىنا 7-8 شاقىرىم شاپشاڭ ءجۇرۋدى, كاراتە سپورتىنان ەڭ جوعارعى كورسەتكىشى – قابىرعامەن جۇگىرۋدى مەڭگەرگەن, رۋحاني ىزدەنۋ ناتيجەسى – ادامدى كوسموينفو-ەنەرگەتيكالىق كارتاسىن جاساۋ ارقىلى تازارتۋ جورالعىسىن مەڭگەرگەن ول 1992-2001 جىلدارى جاستاردىڭ دەنە ءبىتىمىنىڭ دۇرىس جەتىلۋى مەن ولاردى رۋحاني دامىتۋدى تۇتاستىرۋ ماقساتىندا جاسوسپىرىمدەردىڭ «اقسارباز» رۋحاني كلۋبىن قۇردى.
«قاسيەتتى ساپار» اكتسياسى دەپ اتالعان جاياۋ ەكسپەديتسياسىنىڭ ماقساتىن «جاياۋ ساپارعا شىعۋ – ەرىككەنىڭ ءىسى ەمەس. ساپار بارىسىندا ەجەلگى رۋحاني دالا ساپارى قايتا جاڭعىرتىلىپ, ەلدىڭ اماندىعى مەن بۇتىندىگى رۋحاني قۇندىلىققا اينالىپ, جۇرت جۇمىلادى جانە جەرگىلىكتى قاسيەتتى مەكەندەردى ۇلىقتاۋ ناسيحاتتالادى. سونىمەن قاتار شاپشاڭ جاياۋ ءجۇرۋ سپورتىن ناسيحاتتاۋ, قازاقستاندىق رۋحاني تۋريستىك مارشرۋتتاردى اشۋ ماقسات ەتىلەدى», دەپ تۇسىندىرەتىن سارسەنباي ەرقاسىموۆ تۇركىستان, قىزىلوردا, اقتوبە, ماڭعىستاۋ وبلىستارى اۋماعىن ءجۇرىپ ءوتىپ, دۇيسەنبى كۇنى بەينەۋ اۋدانىنا امان-ەسەن جەتكەن بولاتىن. جولاۋشىنى ماڭعىستاۋ وبلىستىق ءماسليحاتىنىڭ دەپۋتاتى راببيم بوراشوۆ ارنايى ىزدەپ بارىپ, قۇرداسى سارسەنباي سامەت ۇلىمەن تانىسىپ, قولداۋ كورسەتۋ ءۇشىن تۇرىش ەلدى مەكەنىنەن باستاپ, جولدا امانتۇرلى باتىر ەسكەرتكىشىنە زيارات ەتىپ, بەينەۋگە دەيىن ۆەلوسيپەدپەن قاتار ءجۇرىپ كەلگەن. ودان كەيىنگى ماڭداي تىرەر تۇس – ەسكى بەينەۋدەگى ءپىر بەكەت اتا مەشىتى.
ەل تانىپ, جەر تانىپ, كۇزدىڭ قارا سۋىعىندا جاياۋ ساپارلاپ جۇرگەن جولاۋشىنىڭ رۋحاني ىزدەنىسى تاعىلىمدى, كورگەن-بىلگەنى قىزىقتى ەكەنى انىق.
ماڭعىستاۋ وبلىسى