بەلگىلى قارجى ساراپشىسى, «بالالار مەن جاسوسپىرىمدەرگە ارنالعان قارجىلىق ساۋات» كۋرسىنىڭ اۆتورى انەل شاكەنوۆا حالىقارالىق ينۆەستورلار اپتالىعىنىڭ سپيكەرى رەتىندە وتباسىلىق قاراجات تۋرالى ماڭىزدى اقپاراتپەن ءبولىستى. بۇل تۋرالى «استانا» حالىقارالىق قارجى ورتالىعى حابارلادى.
انەل شاكەنوۆانىڭ ايتۋىنشا, بۇگىندە تاڭدا بالالار ءۇشىن اقشا تاقىرىبى وتە قىزىقتى. قارجىگەر قازاقستاندىق وتباسىلاردا اقشا جانە قاراجات تۋرالى اقپارات كوپ تالقىلانبايتىنىن ايتادى. الايدا بالالار ەرەسەكتەر اراسىندا ءجيى تالقىلاناتىن دوللار باعامى مەن اقشانىڭ قۇنسىزدانۋى تۋرالى بىلگىسى كەلەدى.
– سوندىقتان اتا-انالار ۇيدە ۇل-قىزدارىنا قاراجات, ينفلياتسيا جانە ەموتسيونالدى ساۋدانىڭ نە ەكەنىن ايتىپ, ءتۇسىندىرىپ وتىرعانى دۇرىس, – دەدى ا.شاكەنوۆا.
قارجىلىق ساۋات كۋرسىنىڭ اۆتورى ءوز وتباسىندا قاراجات جاراتۋدىڭ ءىس جۇزىندە قالاي ورىندالاتىنىن ءتۇسىندىردى. اتا-انا رەتىندە ول جۇبايىمەن ۇيدەگى شارۋالار مەن وقۋىن جاقسى وقىعانى ءۇشىن بالالارىنا ەڭبەكاقى بەرىپ وتىراتىنىن جەتكىزدى. بۇعان قوسا وليمپيادا مەن ءتۇرلى جارىستارعا قاتىسىپ جۇلدەگەر اتانعانى ءۇشىن, سونداي-اق ءبىر توقساندا ۇزدىكتەر قاتارىنان ورىن العانى ءۇشىن بالالار قارجىلاي بونۋس الادى ەكەن. ەرەكشەلىگى سول, كۋرس اۆتورى جولداسى ەكەۋى ەڭبەكاقى مەن بونۋستى بالالارىنىڭ قايدا جۇمساعانى تۋرالى سۇرامايدى. ياعني قاراجاتتى يگەرۋ قۇقىعى تولىقتاي بالالاردىڭ ءوز ەركىندە. ماماننىڭ سوزىنە سۇيەنسەك, وسىلايشا جاس بۋىنىڭ قارجىلىق جاۋاپكەرشىلىگى قالىپتاسادى.
ال ولاردى ەرەسەك ومىرگە دايىنداۋ رەتىندە بيزنەسكە نەمەسە جۇمىسقا تارتۋ دا بالاعا ۇلكەن ءارى ماڭىزدى تاجىريبە بولادى.
– ۇلكەن بالالارىمدى بيزنەسىممەن تانىستىرۋ ەكى جاققا دا پايداسىن تيگىزدى, –دەدى قارجى ساراپشىسى.
ماماننىڭ ايتۋىنشا, جاستاردىڭ تەحنولوگيا مەن شەت ءتىلىن تەز مەڭگەرۋ قابىلەتى ولارعا كوپ ارتىقشىلىق بەرەدى. وسىلايشا, كىشكەنتايىنان جاڭا كاسىپتى كرەاتيۆتى باعىتتا دامىتۋعا بولاتىنىن, الايدا قاراجات جاعىندا تۇراقسىزدىق بولۋى مۇمكىن ەكەنىنە ولار ەرتە باستان كوز جەتكىزەدى.
ال بەلگىلى ءبىر قىزمەتكە ورنالاسۋ قاراجات جاعىنان قولايلى بولعانىمەن, تۇلعالىق قابىلەتتى تانىتۋدا كۇردەلى بولىپ كەلەتىنىن ءجىتى تۇسىنەتىن بولادى دەدى كۋرس اۆتورى.
قارجىگەردىڭ تاجىريبەسى كورسەتكەندەي بالالارعا ەڭبەكاقى ءبولۋ, ولاردى قاس قاقپاي باقىلاپ وتىرۋدى توقتاتۋ كومەكتىڭ ءبىر تەتىگى بولسا, بيزنەسپەن تانىستىرۋ, ءيا بولماسا جۇمىس بارىسىن كورسەتۋ ومىرگە دايىندىق جولىنىڭ تاعى ءبىر باسپالداعى بولاتىنى كۇمانسىز.