بۇرىندا دا دارىگەر قادىرلى ماماندىقتىڭ ءبىرى ەدى. ال جاھاندى جايلاعان كوروناۆيرۋس ينفەكتسياسىمەن كۇرەستە ادام جانىنا اراشا بولۋدى تاڭداعان جانداردىڭ قادىرى تىپتەن ارتا ءتۇستى. ارىنا دا, اق حالاتىنا دا قىلاۋداي داق تۇسىرمەگەن دارىگەرلەر حالىقتىڭ دەنساۋلىعىن ساقتاۋ ءۇشىن وتباسىنا بارماي, قاۋىپتى ىندەتپەن كۇرەستىڭ بەل ورتاسىندا ءجۇردى. جاقىندا ءومىر مەن ءولىم ءۇشىن ارپالىسقان ناۋقاستارعا جان جىلۋىن اياماي, جىلى سوزىمەن دە, شيپالى ەمىمەن دە دەم بەرگەن 70 قىزمەتكەرگە «حالىق العىسى» مەدالى بەرىلدى.
وبلىس اكىمىنىڭ ورىنباسارى باقىتگۇل حامەنوۆانىڭ ايتۋىنشا, وڭىردە 7 995 مەديتسينا قىزمەتكەرى جۇمىس ىستەيدى. سونىڭ ىشىنەن كوروناۆيرۋس ينفەكتسياسىمەن كۇرەسكە 2 480 قىزمەتكەر جۇمىلدىرىلدى. ولاردىڭ اراسىندا قاۋىپتى ىندەتتى جۇقتىرىپ, ءتىپتى قايتىس بولعانى بار.
– بۇل ىندەت تۇتاس الەم ءۇشىن دە, قازاقستان ءۇشىن دە ۇلكەن سىناققا اينالدى. سول سىناقتا مەديتسينا سالاسىنىڭ, قارۋلى كۇشتەر, پوليتسيا قىزمەتكەرلەرىنىڭ, ەرىكتىلەردىڭ ەرلىككە بەرگىسىز كۇندەلىكتى ىسىنە ەل كۋا بولدى. اسىرەسە دارىگەرلەردىڭ ولشەۋسىز ەڭبەگى بار. ولار سىرقاتتاردى ەمدەۋمەن شەكتەلىپ قانا قويماي, ۆيرۋستىڭ كەڭ تاراماۋى ءۇشىن ايانباي ەڭبەك ەتتى, – دەيدى وبلىس اكىمىنىڭ ورىنباسارى.
«حالىق العىسى» مەدالىن قاۋىپتى ىندەتتىڭ ءبىرىنشى تولقىنىندا الدىڭعى شەپتە جۇمىس ىستەپ, ينفەكتسيادان كوز جۇمعان مەديتسينا قىزمەتكەرلەرىنە دە بەرۋ ۇيعارىلعان ەكەن. ويتكەنى ومىردەن وتكەن دارىگەرلەردىڭ ەڭبەگىن ەل ءبىلۋى ءتيىس. ۋاقىتپەن ساناسپاي, ءار ناۋقاستىڭ ءومىرى ءۇشىن كۇرەسكەن جوعارى ءبىلىمدى دارىگەردىڭ ءبىرى – ناريمان اقپانوۆ. اتىراۋداعى ەپيدەميالىق احۋال ۋشىققان تۇستا رەنتگولوگ ۆيرۋس جۇقتىرعانداردى رەنتگەنگە تۇسىرگەن. الايدا دارىگەردىڭ ءوزى كوروناۆيرۋس ينفەكتسياسىن جۇقتىرىپ, توتەلەي كەلگەن تاجالدىڭ قاقپانىنا قۇتىلا العان جوق. سول سەبەپتەن «حالىق العىسى» مەدالى مارقۇمنىڭ ايەلى داريعا مۇسلىموۆاعا تابىستالدى.
ال زەمفيرا ەربولاتقىزى قاۋىپتى ىندەتكە شالدىققانداردىڭ باسىم بولىگى ەمدەلگەن №2 وبلىستىق اۋرۋحانادا جۇمىس ىستەيدى. ورتا بۋىن قىزمەتكەرى ارىپتەستەرى سەكىلدى ءۇش اي بويى وتباسىنا بارماي, ىندەت وشاعىندا بولدى. ءسويتىپ, ءوزى تاڭداعان ماماندىعىنا ادالدىعىن تانىتىپ, حالىقتىڭ دەنساۋلىعىن قورعاۋ جولىنداعى مىندەتىن ءمىنسىز اتقاردى. قاۋىپتى ينفەكتسيا سالدارىنان قوس وكپەسى قىسىلىپ, دەم جەتپەگەندەرگە وتتەگى اپپاراتىن قوسىپ, مىڭداعان ناۋقاستىڭ ءومىرىن اراشالاپ قالعانىن ماقتان تۇتادى.
اتىراۋ وبلىسى