باتىس قازاقستان وبلىسىنىڭ قازتالوۆ اۋدانىنداعى مەكتەپتەرىندە وقۋشىلاردىڭ قاشىقتان وقۋىنا كومەك ءۇشىن 200 پلانشەت, 150 كومپيۋتەر بەرىلگەن بولاتىن. بۇعان قوسىمشا جاقىندا تاعى 1 100 نوۋتبۋك جەتكىزىلەتىن بولدى. بۇل – ەلىمىزدىڭ ءبىلىم جانە عىلىم مينيسترلىگىنىڭ قولداۋىمەن اۋىل وقۋشىلارىنا كورسەتىلىپ وتىرعان جۇيەلى كومەكتىڭ ناتيجەسى.
قازتالوۆ اۋدانى اكىمى البەرت ەساليەۆتىڭ ايتۋىنشا, بۇگىندە اۋدان اۋماعىنداعى 38 مەكتەپتە 5 306 وقۋشى ءبىلىم الادى. بيىلدىڭ وزىندە عانا اۋدانعا 46 جاس مۇعالىم كەلگەن. «كارانتين شەكتەۋلەرىنە سايكەس, 4 مەكتەپتە وقۋ قاشىقتان جۇرگىزىلۋدە. 34 مەكتەپ وقىتۋدىڭ ءداستۇرلى فورماتىنا كوشتى. اۋدان مەكتەپتەرىنىڭ ءبىلىم دەڭگەيى جامان ەمەس. بىلتىرعى وقۋ جىلىندا مەكتەپ بىتىرگەن 293 تۇلەكتىڭ 102-ءسى جوعارى وقۋ ورىندارىنىڭ گرانتىنا يە بولدى. 28 وقۋشى «التىن بەلگى» يەگەرى اتاندى», دەيدى ا. ەساليەۆ.
ايتا كەتەيىك, اۋداندا عيماراتى اپات جاعدايىندا دەپ تانىلعان الما ورازباەۆا اتىنداعى مەكتەپ عيماراتى جاڭادان سالىنىپ جاتىر. بۇيىرسا, كەلەر جىلى پايدالانۋعا بەرىلمەك. ال بولاشاق اۋىلىنداعى احمەت بايتۇرسىن ۇلى اتىنداعى مەكتەپ عيماراتىنا كۇردەلى جوندەۋ جاساۋ ءۇشىن 396 ملن 874 مىڭ تەڭگە بەرىلىپ, يگەرىلدى.