ناۋقاستاردىڭ قاۋىپتى ۆيرۋستى قايدان جۇقتىرعانى دا تەكسەرىلىپ جاتىر. كوپ جاعدايدا سالعىرتتىق سالقىنى سەزىلەدى. مىسالى, ءبىر ازامات وسكەمەن قالاسىنا ساداقا-جيىنعا بارىپ, سول جاقتان ۆيرۋس جۇقتىرىپ كەلگەن. تاعى ءبىر ناۋقاس نۇر-سۇلتان قالاسىندا تۇراتىن بالاسىنا بارعان. سونداي-اق ناۋقاستاردىڭ كوپشىلىگى قوعامدىق كولىكپەن جۇرگەنىن ايتادى. كەي زەينەتكەر دۇكەنگە, دارىحاناعا عانا بارىپتى.
– ناۋقاستاردىڭ ءبىرازى ۆيرۋستى قايدان جۇقتىرعانىن ايتا المايدى. سوندىقتان كوپشىلىك ورىنداردا سانيتارلىق تالاپتاردى ساقتاۋ قاجەتتىگىن حالىققا قايتا-قايتا ەسكەرتۋ قاجەت, – دەيدى وبلىس اكىمى عالي ەسقاليەۆ.
وبلىستا سovid-19-دى پتر-تەستىلەۋ ارقىلى انىقتايتىن 7 زەرتحانا بار. ءبىر اپتادا وسى زەرتحانالاردان 9 مىڭعا جۋىق ادام وتكەن. تەستىلەۋ قۇنى باتىس قازاقستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ارنايى زەرتحاناسىندا 8 220 تەڭگە تۇرادى, جەكەمەنشىك زەرتحانالاردا 9 مىڭ تەڭگەدەن اسپايدى. پتر-تەست وتۋشىلەردىڭ 70 پايىزى جولدامامەن, تەگىن وتكىزىلگەن.
– رەسەيدەگى احۋالعا بايلانىستى شەكاراداعى باقىلاۋ كۇشەيتىلدى. ءبىزدىڭ ماماندار شەكارا بەكەتىندە, ءتورت اۆتووتكەلدە كۇنى-ءتۇنى جۇمىس ىستەپ جاتىر. سوڭعى ءبىر اپتادا شەكارادان 1 158 جاياۋ جۇرگىنشى وتكەن. ونىڭ 1 044-ىندە پتر-تەستىلەۋ انىقتاماسى بولعان. ال انىقتاماسىز وتكەن 114 ادام كارانتينگە جاتقىزىلىپ, ونىڭ ۇشەۋىندە پتر-تەستىلەۋ ناتيجەسى وڭ ناتيجە كورسەتتى. رەسەي فەدەراتسياسىنىڭ 19 ازاماتىن قۇجاتى بولماۋىنا بايلانىستى شەكارادان وتكىزبەدىك, – دەيدى وبلىستىق باس سانيتارلىق دارىگەرى.
شتاب وتىرىسىندا بەلگىلى بولعان ءبىر ماسەلە – وبلىس اۋماعىنا شەكارادان وتكەن ترانزيتتىك جۇرگىزۋشىلەرگە قاتىستى. حالىقارالىق كەلىسىمدەرگە سايكەس, ترانزيتتىك كولىكتەر شەكارادان كەدەرگىسىز وتەدى. سوڭعى ءبىر اپتانىڭ ىشىندە 2 300-گە جۋىق ترانزيتتىك جۇرگىزۋشى وبلىس ارقىلى وتكەن. ولاردىڭ اراسىندا ۆيرۋس تاسىمالداۋشىلارى دا بولۋى مۇمكىن.
شەكارادان وتەتىن جۇرگىزۋشىلەردىڭ كوپشىلىگى پتر-تەستسىز, انىقتاماسىز كەلەدى. ولاردىڭ ىشىندە 8 ادامنان كوروناۆيرۋس انىقتالعان.
– ءبىز 19 قازاننان باستاپ ترانزيتتىك كولىكتەردى شەكارادان كۇتىپ الىپ, پوليتسيانىڭ جەتەگىمەن الىپ جۇرەمىز. اقتوبە, اتىراۋ, تاسقالا, سامارا جاعىنان كۇندىز ءتورت ەكيپاج, تۇندە ءتورت ەكيپاج وسى قىزمەتتە ءجۇر. وسى جەردە ءبىر ماسەلە تۋىندايدى: كەيبىر ترانزيتتىك كولىكتەر قالا ىشىندەگى كەمپينگتەرگە ايالداپ, توقتاپ قالادى. ولاردى قاشان قالادان شىعىپ كەتكەنشە باقىلاپ ءجۇرۋ مۇمكىن ەمەس. سوندىقتان قالا ىشىندەگى كەمپينگتەردىڭ ترانزيتتىك كولىكتەرگە قىزمەت كورسەتۋىن شەكتەيتىن ءتارتىپ كەرەك. وبلىستىڭ باس سانيتار دارىگەرى وسى ماسەلەگە ارنايى قاۋلى شىعارسا, – دەگەن ۇسىنىسىن ءبىلدىردى باتىس قازاقستان وبلىستىق پوليتسيا دەپارتامەنتى باستىعىنىڭ ورىنباسارى جانبولات جانشين.
ال ع.ەسقاليەۆ كەيبىر تۇرعىنداردان ارىز تۇسكەنىن, شەكارادان ءوتىپ جاتقان ترانزيتتىك كولىكتەردىڭ ىشىندە كولىككە, جۇككە قاتىسى جوق رەسەيلىك ازاماتتار بولۋى مۇمكىن ەكەنىن العا تارتتى.
– مۇنداي ارىز بولعانىمەن, ازىرگە دالەلدەنگەن جوق. رەسەيدەن كەلەتىن جۇك كولىگىندە ەكىنشى جۇرگىزۋشى بولادى. ولاردىڭ كەيبىرىندە سول كولىكتى جۇرگىزۋگە رۇقسات بەرەتىن ءتيىستى كاتەگوريا بولماعان وقيعا كەزدەستى. وسىعان قاراپ, شەكارادان ءوتىپ كەتۋ ءۇشىن ولار جۇرگىزۋشىمەن قانداي دا ءبىر سوماعا كەلىسىپ الۋى مۇمكىن دەگەن كۇمان تۋادى. بىراق مۇنى تەكسەرۋ قيىن, – دەدى شەكارا قىزمەتىنىڭ وكىلى.
ع.ەسقاليەۆ بۇل ماسەلەنى رەسپۋبليكالىق دەڭگەيدە كوتەرۋدى تاپسىردى.