بەيسەنبى كۇنى پارلامەنت ءماجىلىسىنىڭ دەپۋتاتى قۋانىش سۇلتانوۆتىڭ توراعالىق ەتۋىمەن قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن وتىرىسى بولىپ ءوتتى.
بەيسەنبى كۇنى پارلامەنت ءماجىلىسىنىڭ دەپۋتاتى قۋانىش سۇلتانوۆتىڭ توراعالىق ەتۋىمەن قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن وتىرىسى بولىپ ءوتتى.
وندا ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگى مەن ونىڭ اۋماقتىق ورگاندارىنىڭ مۇگەدەكتەردىڭ قۇقىقتارىن قامتاماسىز ەتۋدەگى قىزمەتى تالقىلاندى. كوميسسيا جۇمىسىنا قازاقستاننىڭ زاڭ شىعارۋشى, اتقارۋشى جانە سوت تارماقتارى ورگاندارىنىڭ وكىلدەرى, ادۆوكاتتار, قۇقىقتانۋشى عالىمدار, حالىقارالىق جانە ۇكىمەتتىك ەمەس قۇقىق قورعاۋ ۇيىمدارىنىڭ, حالىقتى الەۋمەتتىك قورعاۋ ۇيىمدارىنىڭ مۇشەلەرى قاتىستى.
وتىرىس بارىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءسوز الىپ, كۇن تارتىبىنە قويىلعان ماسەلە توڭىرەگىندە اڭگىمە قوزعادى. سونداي-اق, جيىن اياسىندا مۇمكىندىگى شەكتەۋلى جانداردىڭ قۇقىقتارىن قورعاۋ سالاسىنداعى زاڭناماعا جانە قۇقىق قولدانۋ تاجىريبەسىن جەتىلدىرۋ سالاسىنا قاتىستى ماڭىزدى ماسەلەلەر تالقىلانىپ, پىكىر الماسىلدى.
وتىرىسقا قاتىسۋشىلار قامكوڭىل جانداردىڭ قۇقىقتارىن قامتاماسىز ەتۋدە كەزدەسەتىن تۇيتكىلدەردى شەشۋ تەك ۆەدومستۆولىق مىندەت ەمەستىگىن, بۇل بيلىكتىڭ بارلىق تارماقتارىنىڭ ازاماتتىق قوعام ينستيتۋتتارىمەن ءوزارا تىعىز ءىس-قيمىلىن تالاپ ەتەتىنىن اتاپ ءوتتى. بۇل رەتتە, ادام قۇقىقتارى جونىندەگى كوميسسيا مۇشەلەرى مۇمكىندىكتەرى شەكتەۋلى ازاماتتاردى مەملەكەتتىك بيلىكتىڭ وكىلەتتى ورگاندارىنا سايلاۋ جانە سايلانۋى تۋرالى كونستيتۋتسيالىق قۇقىقتارىن ىسكە اسىرۋ ماقساتىندا ساياسي پارتيالارعا مۇگەدەكتەردى ءوز قاتارلارىنا تارتۋدى ۇسىندى. سونداي-اق, ولار قامكوڭىل جانداردىڭ مەملەكەتتىك قىزمەتكە قولجەتىمدىلىگىن قامتاماسىز ەتۋدە ولارعا ءتيىستى كۆوتانى زاڭنامالىق تۇرعىدا بەلگىلەۋ قاجەتتىگىنە نازار اۋداردى.
وتىرىستا ادام قۇقىقتارى جونىندەگى كوميسسيانىڭ حاتشىسى تاستەمىر ابىشەۆ ادام قۇقىقتارىنىڭ جالپىعا ورتاق دەكلاراتسياسىنىڭ قابىلدانۋىنىڭ 65 جىلدىعىنا جانە حالىقارالىق ادام قۇقىعى كۇنىنە ارنالعان ءىس-شارالار تۋرالى بايانداپ بەردى.
ال كوميسسيا وتىرىسىندا قابىلدانعان ۇسىنىستار تىزبەسى مەملەكەت باسشىسىنىڭ, قازاقستان پارلامەنتى مەن ۇكىمەتىنىڭ قاراۋىنا جىبەرىلەتىن بولادى.
ءلايلا ەدىلقىزى,
«ەگەمەن قازاقستان».