مەملەكەت باسشىسى نۇرسۇلتان نازارباەۆتىڭ اتىنا شىعىس قازاقستان وبلىسىنىڭ اكىمى بەردىبەك ساپارباەۆتىڭ ەسەبى كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆتىڭ اتىنا شىعىس قازاقستان وبلىسىنىڭ اكىمى بەردىبەك ساپارباەۆتىڭ ەسەبى كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
ءوز ەسەبىندە ب.ساپارباەۆ «بيزنەستىڭ جول كارتاسى-2020» جانە «جۇمىسپەن قامتۋ جول كارتاسى-2020» باعدارلامالارىنىڭ وڭىردەگى ءىسكە اسىرىلۋ بارىسى جونىندە مالىمدەگەن.
شىعىس قازاقستان وبلىسىنىڭ اكىمى وبلىستا «بيزنەستىڭ جول كارتاسى-2020» باعدارلاماسى اياسىندا 3 مىڭ جاڭا جۇمىس ورنى اشىلعانىن, سونداي-اق, 10 مىڭنان استام جۇمىس ورنى ساقتالعانىن اتاپ وتەدى.
2013 جىلى جالپى قۇنى 4,1 ملرد. تەڭگە نەسيەنىڭ سىياقى ءمولشەرلەمەسىن سۋبسيديالاۋعا 60 ءوتىنىم ماقۇلداندى. كەپىلدىك ۇسىنۋعا قۇنى 1,2 ملرد. تەڭگە 8 نەسيەلىك وتىنىمگە قولداۋ كورسەتىلدى.
جالپى, بيىل وبلىستا باعدارلامانى ىسكە اسىرۋعا 2,8 ملرد. تەڭگە, سونىڭ ىشىندە يندۋستريالىق ينفراقۇرىلىم قالىپتاستىرۋعا 1,1 ملرد. تەڭگە بولىنگەن.
بيزنەستى مەملەكەتتىك قولداۋدىڭ باعىتتارى تۋرالى كاسىپكەرلەردى اقپاراتتاندىرۋ ءجونىندەگى جۇمىسقا وڭىردە ايتارلىقتاي كوڭىل ءبولىنىپ وتىر. مىسالى, بيىل كاسىپكەرلەردى قولداۋ جانە قىزمەت كورسەتۋ ورتالىقتارى ارقىلى 2256 شاعىن جانە ورتا بيزنەس سۋبەكتىسىنە 3463 اقپاراتتىق-كونسۋلتاتسيالىق قىزمەت كورسەتىلدى.
ەسەپكە سايكەس, «جۇمىسپەن قامتۋ جول كارتاسى-2020» باعدارلاماسى بويىنشا 2011 جىلدان قازىرگى ۋاقىتقا دەيىن 4 مىڭنان استام ادام قۇنى 9,7 ملرد. تەڭگەدەن ارتىق سوما كولەمىندە شاعىن نەسيە الدى.
شىعىس قازاقستان وبلىسىنىڭ اكىمى كەلەشەگى جوق اۋىلداردان ازاماتتاردى كوشىرۋ ءۇشىن ەكونوميكالىق دامۋ نۇكتەلەرىندە تۇرعىن ءۇي قۇرىلىستارى ءجۇرىپ جاتقانىن ءمالىم ەتتى. مىسالى, زىريانوۆ قالاسىندا 60 پاتەرلى ءۇيدىڭ, كوكجايىق اۋىلىندا ەكى پاتەرلى 10 ءۇيدىڭ جانە وسكەمەن قالاسىنىڭ شىعىس كەنتىندە 114 جەكە تۇرعىن ءۇيدىڭ قۇرىلىسى اياقتالدى.
سونداي-اق, بولىنگەن بيۋدجەتتىك قاراجاتتار ەسەبىنەن 68 الەۋمەتتىك سالا نىساندارىندا, 37 تۇرعىن ءۇي-كوممۋنالدىق شارۋاشىلىق نىساندارىندا جانە جەرگىلىكتى ماڭىزى بار 66 شاقىرىم جولعا جوندەۋ جۇمىستارى جۇرگىزىلدى.
2011 جىلدان باستاپ جۇمىسپەن قامتۋ باعدارلاماسى اياسىندا 31 مىڭنان استام ادام جۇمىسپەن قامتىلدى, ونىڭ 60%-ى – جاستار. جۇمىسسىزدىق دەڭگەيى 2013 جىلدىڭ 3 توقسانىنىڭ قورىتىندىسى بويىنشا 2010 جىلعى 5,7 %-دان 5,0 %-عا دەيىن تومەندەدى.
ب.ساپارباەۆ ەسەبىنىڭ سوڭىندا مەملەكەتتىك باعدارلامالار ءوڭىر تۇرعىندارىنىڭ ءتۇرلى توپتارى تاراپىنان جان-جاقتى قولداۋ تاۋىپ وتىرعانىن حابارلاعان. شىعىس قازاقستان وبلىسىنىڭ اكىمى بۇل باعدارلامانى ودان ءارى ىسكە اسىرۋ قوعامدا الەۋمەتتىك تۇراقتىلىقتى ساقتاۋعا جانە ازاماتتاردىڭ ءال-اۋقاتىنىڭ ارتۋىنا سەپتىگىن تيگىزەتىنىن اتاپ وتكەن.