قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» تۇراقتى بىرىنشىلىكتىڭ كەزەكتى تۋرىندا ريگانىڭ «ديناموسىن» قابىلدادى.
نۇر-سۇلتاندا وتكەن باسەكەدە «بارىستىڭ» باسىمدىعى ەش كۇمان تۋعىزعان جوق. ءبىرىنشى كەزەڭ شيەلەنىستى وتكەنىمەن, ەكى كوماندا بىرازعا دەيىن ءبىر-ءبىرىنىڭ وسال تۇسىن تابا المادى. تەك كەزەڭنىڭ اياقتالۋىنا ساناۋلى سەكۋندتار قالعاندا لينۋس ۆيدەلل ەسەپ اشتى. بۇل – 35 جاستاعى شۆەتسيالىق شابۋىلشىنىڭ قحل-داعى 100-گولى. كوماندالار ۇزىلىستەن شىققان بەتتە ايدىن يەلەرى ەكىنشى شايبانى قاقپاعا ەنگىزدى. بۇل جولى ۆيكتور سۆەدبەرگتىڭ وڭتايلى پاسىنان كەيىن كەرتيس ۆولك نىسانانى ءدال كوزدەدى. ويىننىڭ 25-مينۋتىندا مەتت فرەتتين جەرگىلىكتى جانكۇيەرلەردى تاعى ءبىر قۋانتتى. وسىلايشا, بۇل كەزدەسۋ 3:0 ەسەبىمەن اياقتالدى.
ەندى ءوزىنىڭ الداعى ءۇش كەزدەسۋىن «بارىس» سىرتتا وتكىزەدى. اتاپ ايتساق 8 قاراشادا چەرەپوۆەتستە «سەۆەرستالمەن» وينايدى. ال 10 جانە 12 قاراشا كۇندەرى ءياروسلاۆلدىڭ «لوكوموتيۆ» جانە نيجنەكامسكىنىڭ «نەفتەحيميگىمەن» كۇش سىناسادى.