بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ بيۋرو وتىرىسى ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى, دەپ حابارلايدى Egemen.ءkz ماجىلىستىڭ ءباسپاسوز قىزمەتىنە سىلتەمە جاساپ.
دەپۋتاتتار ءبىرىنشى وقىلىمدا ەكونوميكالىق ءوسۋدى قالپىنا كەلتىرۋ ماسەلەلەرىنە قاتىستى زاڭ جوباسىن تالقىلايدى. زاڭ جوباسى قولدانىستاعى زاڭنامانى جەتىلدىرۋگە باعىتتالعان جانە ونى قابىلداۋ COVID-19 پاندەمياسىنان زارداپ شەككەن ەكونوميكا سالالارىن دامىتۋدى ىنتالاندىرۋعا مۇمكىندىك بەرەدى.
سونىمەن قاتار ءبىرىنشى وقىلىمدا دەپۋتاتتارعا قوعامدىق كەڭەستەردىڭ قىزمەتىنە قاتىستى زاڭنامالىق تۇزەتۋلەر جوباسىن دا قاراۋ ۇسىنىلادى. زاڭ جوباسىندا قوعامدىق كەڭەستەردىڭ وڭتايلى مودەلىن قالىپتاستىرۋ ۇسىنىلىپ, ولاردىڭ ۇيىمداستىرۋشىلىق تيىمدىلىگىن, دەموكراتيالىلىعىن, جاريالىلىعىن, اشىقتىعىن قامتاماسىز ەتپەك.
سونداي-اق الداعى جالپى وتىرىستا ەۋرازيالىق ەكونوميكالىق وداققا مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ تۋرالى كەلىسىمدى راتيفيكاتسيالاۋ تۋرالى زاڭ جوباسى ۇسىنىلادى.
كۇن ءتارتىبىنىڭ جوباسىندا پالاتانىڭ بەيىندى كوميتەتتەرىنە بىرقاتار جاڭا راتيفيكاتسيالىق زاڭ جوبالارىن جۇمىسقا الۋ كوزدەلەدى. ولار: ەاەو تۋرالى شارتتارعا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىندە) وزگەرىستەر ەنگىزۋ تۋرالى حاتتامانى جانە وسى شارتقا ارمەنيا مەن قىرعىز رەسپۋبليكالارىنىڭ قوسىلۋلارىنا بايلانىستى وزگەرىستەر ەنگىزۋ تۋرالى حاتتامالاردى راتيفيكاتسيالاۋ تۋرالى زاڭ جوبالارى.