تۇركياداعى «فەرفير» باسپالار توبى تاراپىنان اي سايىن شىعاتىن «تەمرين» ادەبي جۋرنالىنىڭ كەزەكتى سانى مەملەكەت جانە قوعام قايراتكەرى تۇرار رىسقۇلوۆقا ارنالدى.
«تۇركى الەمىنىڭ تەمىرقازىعى: ت.رىسقۇلوۆ» اتتى تاقىرىپپەن جارىق كورگەن جۋرنالعا قازاقتىڭ «قىزىل جەبەسى» اتانعان تۇرار رىسقۇلوۆتىڭ ومىربايانىمەن قوسا, تاۋەلسىزدىك جولىنداعى كۇرەسكەرلىگى مەن قايراتكەرلىگى, ادامدىق قاسيەتى مەن تۇلعالىق پورترەتى, تاريحي شىندىق پەن زامانا اقيقاتى تۋرالى ءسوز قوزعايتىن زەرتتەۋلەر مەن ماقالالار توپتاماسى ەندى.
اتاپ ايتقاندا, بەلگىلى قازاق ادەبيەتتانۋشىسى, عالىم, اۋدارماشى اشۋر وزدەميردىڭ «التى الاشتىڭ الىبى تۇرار رىسقۇلوۆ» اتتى زەرتتەۋ ەڭبەگى جانە اتاقتى «قىزىل جەبە» رومان-ەپوپەياسى مەن ونىڭ اۆتورى – جازۋشى شەرحان مۇرتازا تۋرالى «ەكى ۇلى تۇلعا – ءبىر ۇلى تۋىندى» اتتى كولەمدى ماقالاسى جارىق كوردى. سونداي-اق اتالعان توپتاماعا ت.رىسقۇلوۆ تۋراسىندا قالام تەربەتكەن بەلگىلى تاريحشى دارحان قىدىرالىنىڭ «ۇلتشىل كۇرەسكەر» اتتى ماقالاسى, كورنەكتى قالامگەرلەر كولباي ادىربەك ۇلى مەن مولديار سەرىكباەۆتىڭ «تاعى دا رىسقۇلوۆ حاقىندا» جانە «ع.مۇسىرەپوۆتىڭ تاپسىرماسى», عالىمجان ەلشىبايدىڭ «اۋەزوۆتى اباقتىدان اراشالاپ قالعان تۇرار رىسقۇلوۆ» اتتى ماقالالارى جانە ادەبيەتتانۋشى سەردار اجاردىڭ اۋدارماسىمەن ت.رىسقۇلوۆتىڭ ستالينگە جازعان حاتى ەنىپ, تۇرىك وقىرمانىنا جەتتى. ماقالالاردى تۇرىك تىلىنە اۋدارعان سەلما بالىكچى مەن ءمولدىر يلگيشەۆا.