ونلاين وقۋ اسىرەسە عالامتور جەلىسى تولىق جەتپەگەن ەلدى مەكەندەردە وڭايعا سوعىپ تۇرعان جوق. وقۋ جىلى باستالا سالىسىمەن وبلىس ورتالىعىنا تاياۋ جەردەگى ۇلان اۋدانىنا قاراستى بەستەرەك, ىزعۇتتى ايتىقوۆ اۋىلدارىنىڭ ستۋدەنتتەرى مەن وقۋشىلارى ونلاين وقۋدان وقشاۋلانىپ قالعان.
بەستەرەكتەگى عاداس سالىقوۆ اتىنداعى مەكتەپتىڭ ديرەكتورى روزا مۋگۋليەۆانىڭ ايتۋىنشا, دايارلىق سىنىبىنان باستاپ 9-سىنىپ ارالىعىنداعى 38 وقۋشىنىڭ ءبارى سانيتارلىق تالاپتاردى ساقتاي وتىرىپ, كادىمگىدەي مەكتەپ قابىرعاسىندا وقىپ جاتىر. دايارلىق توبىن قوسا ەسەپتەگەندە ءتورت سىنىپ تۇسكە دەيىن, ءۇش سىنىپ تۇستەن كەيىن وقيتىن كورىنەدى.
– وتكەن وقۋ جىلىنىڭ ءتورتىنشى توقسانى قيىن بولدى. بىراق تىعىرىقتان شىعۋدىڭ جولىن تاپقان ەدىك. ەكى مۇعالىم بۇيرىقپەن كۋرەر بولىپ بەكىتىلىپ, وقۋشىلاردىڭ ۇيىنە تاپسىرما تاسىدى. كۋرەر تاپسىرمالاردى وقۋشىلاردىڭ ۇيىندەگى پوشتا جاشىگىنە سالىپ, ەرتەڭىندە ورىندالعان تاپسىرمانى مۇعالىمدەرىنە جەتكىزىپ ءجۇردى, – دەيدى روزا تىلەسقىزى.
ال ستۋدەنتتەر كەيدە Wi-Fi جەلىسىنە قوسىلۋ ءۇشىن مەكتەپتىڭ ماڭىنا باراتىن. ەندى جاڭا وقۋ جىلىنان باستاپ باسقا مەكتەپتەردە وقيتىن اۋىلدىڭ بالالارىنا دا جاعداي جاسالىپ, مەكتەپتەن ينتەرنەت جەلىسى بار ارنايى كابينەت ۇسىنىلعان. ولارعا اراقاشىقتىقتى ساقتاي وتىرىپ, ونلاين وقۋلارىنا مۇمكىندىك جاسالعان.
– ستۋدەنتتەر, وقۋشىلار مەكتەپ ءىشىن ارالاپ جۇرمەي, سىرتقى ەسىكتەن تۋرا كىرەدى. ولاردىڭ ساباعىن كەزەكشى مۇعالىم قاداعالايدى. اتا-اناسى ءوتىنىش جازىپ, ساباق كەستەسى بويىنشا عانا مەكتەپ قابىرعاسىندا بولادى. اۋداننىڭ ءار مەكتەبىندە وسىنداي سىنىپتار بار. بىراق نوۋتبۋك, كومپيۋتەر بەرمەيمىز. تەك Wi-Fi ءپارولىن عانا ۇسىنامىز. ال از قامتىلعان نەمەسە كوپبالالى وتباسىنان شىققان وقۋشىلارعا وزدەرى وقىپ جاتقان ءبىلىم مەكەمەسى تەحنيكا جاعىنان كومەكتەسەدى, – دەدى ۇلان اۋداندىق ءبىلىم ءبولىمىنىڭ باسشىسى قۋات وقاسوۆ.
مەكتەپ قابىرعاسىنان ارنايى كابينەتتىڭ اشىلعانىنا اۋىلداعى ستۋدەنتتەر, گيمنازيا وقۋشىلارى قۋاندى. ينتەرنەتى جوق اۋىلداردا ونلاين وقۋ كۇرمەۋى قيىن ماسەلە ەدى. ەندى قاشىقتان وقۋ مۇلدە قيىندىق تۋعىزبايتىن سياقتى. ويتكەنى اتالعان ەكى اۋىلعا دا ينتەرنەت جەلىسى تارتىلدى.
– و باستا ونلاين وقۋ وڭاي بولمادى. اسىرەسە وقۋ جىلى سوڭىندا قينالدىق. كۇن سۋىقتا دالادان ينتەرنەت نۇكتەسىن ىزدەپ جۇرەتىنبىز. بيىل جاڭا وقۋ جىلىندا اۋىل مەكتەبىنەن ارنايى كابينەت اشىپ بەردى. ەندى ساباعىمىزدى جىلى جەردە وتىرىپ, ونلاين وقىپ ءجۇرمىز, – دەگەن ەدى وسكەمەندەگى دارىندى بالالارعا ارنالعان جامبىل اتىنداعى مەكتەپ-گيمنازياسىنىڭ 11-سىنىپ وقۋشىسى اقگۇل جەڭىسحانقىزى.
كوپ ۇزاماي حالىقتىڭ مۇڭ-مۇقتاجىنا قۇلاق تۇرگەن ۇلان اۋدانىنىڭ باسشىلىعى «قازاقتەلەكوم» اق بىرلەسىپ, ىزعۇتتى ايتىقوۆ پەن بەستەرەك اۋىلدارىنداعى بيىك توبەلەرگە ينتەرنەت قۇرىلعىلارىن ورناتقان. جىلدامدىعى جوعارى ينتەرنەت جەلىسىنە ەڭ الدىمەن اۋىلدارداعى وقۋشىلار مەن ستۋدەنتتەر قول جەتكىزدى.
سونىمەن قاتار ينتەرنەت جەلىسىن تارتۋ جۇمىستارى بوزانباي اۋىلىنان باستاپ, اسۋبۇلاق اۋىلىنا دەيىن اياقتالىپ قالدى. كەڭ جولاقتى ينتەرنەت رەتتەلگەن سوڭ بارلىق تۇرعىندار ەش كەدەرگىسىز ءۇيدى-ۇيىنە ورناتا الادى.
ينتەرنەتى ءالسىز مەكتەپتەردىڭ قاتارىنا جوعارى تايىنتى, جانتاس, ماناپ اۋىلدارىنىڭ مەكتەپتەرى دە كىرەدى. ترويتسك, پرولەتاركا اۋىلدارىنداعى مەكتەپتەردە دە ينتەرنەت جۇيەسى ناشار. سوندىقتان دا بۇل اتالعان مەكتەپتىڭ وقۋشىلارى قاشىقتان ەمەس, شتاتتى رەجىمدە ءبىلىم الۋدا.
شىعىس قازاقستان وبلىسى