داۋرەن ادىلبەكوۆتىڭ توراعالىق ەتۋىمەن ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى بولىپ, وندا "كەمە قاتىناسى تۋرالى كەلىسىمدى راتيفيكاتسيالاۋ تۋرالى" زاڭ جوباسى قارالدى. بۇل تۋرالى سەناتتىڭ ءباسپاسوز قىزمەتى حابارلادى.
سەناتور سۇيىندىك الداشەۆ زاڭ جوباسىنىڭ ماقساتى ەاەو ەلدەرى اراسىنداعى سۋ كولىگى سالاسىنداعى ىنتىماقتاستىقتى نىعايتۋ ەكەنىن ايتتى. ول زاڭ جوباسىندا ەاەو-عا قاتىسۋشى ەلدەردىڭ ىشكى سۋ جولدارىندا كەمەلەردىڭ كەدەرگىسىز قوزعالىسى ءۇشىن قۇقىقتىق نەگىز قالىپتاستىرۋ, پورتتاردىڭ قىزمەتتەرىنە تەڭدەي قول جەتكىزۋ, قازاقستاندىق كەمە يەلەرى مەن كەمەلەر ەكيپاجدارى مۇشەلەرىنىڭ مۇددەلەرىن قورعاۋ كوزدەلگەنىن اتاپ ءوتتى.
سەنات دەپۋتاتتارى زاڭ جوباسى قابىلدانعاندا تاراپتاردىڭ ىشكى سۋ جولدارى ارقىلى كەمەلەردىڭ ترانزيتتىك وتۋىنە رۇقسات بەرۋ ءتارتىبىن جەڭىلدەيتىنى, ەكى جاقتى تاسىمال كەزىندە حابارلاما جاساۋ ءتارتىبىن ەنگىزۋ جانە كەمەلەردىڭ وتۋىنە رۇقسات بەرۋ مەرزىمدەرى قىسقاراتىنى تۋرالى ايتتى.
سونداي-اق زاڭ جوباسىندا تاراپتاردىڭ كەمەلەرى ءۇشىن پورتتاردىڭ قىزمەتتەرىنە قول جەتكىزۋدىڭ تەڭدەي جاعداي ۇسىنۋ, ونىڭ ىشىندە كەمەلەر ەكيپاجى مۇشەلەرىنىڭ جەكە باسىن كۋالاندىراتىن قۇجاتتاردى, كەمە قۇجاتتارى مەن تەڭىزشىلەردىڭ بىلىكتىلىك قۇجاتتارىن ءوزارا تانۋ كوزدەلىپ وتىر.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى زاڭ جوباسىن سەنات وتىرىسىنىڭ قاراۋىنا ەنگىزدى.