وسىدان ءبىر جىل بۇرىن بىرىككەن ۇلتتار ۇيىمى تاراپىنان باقىلاۋشى-مەملەكەت ستاتۋسىن العان پالەستينا, ەندى, مىنە, اتالعان ۇيىمنىڭ باس اسسامبلەياسى قۇرامىندا داۋىس بەرۋ قۇقىعىنا يە بولدى. بۇل تۋرالى يتار-تاسس حابارلادى.
حالىقارالىق تريبۋنالدا بۇرىنعى يۋگوسلاۆيانىڭ ۇستىنەن قارالىپ جاتقان ءبىر ىسكە بايلانىستى داۋىس بەرۋگە پالەستينا دا قاتىستىرىلدى. بۇل – پالەستينا ءۇشىن وتە ماڭىزدى تاريحي وقيعا بولدى. ويتكەنى, پالەستينا ءوزىنىڭ تاريحىندا العاش رەت بىرىككەن ۇلتتار ۇيىمى باس اسسامبلەياسى ساپىندا داۋىس بەرۋگە مۇمكىندىك الدى.
باس اسسامبلەيانىڭ ۇلكەن زالىندا وتىرعان 193 ەلدىڭ وكىلدەرى پالەستينالىقتاردىڭ بۇل جەتىستىگىنە قولداۋ ءبىلدىرىپ, ۇزاق قول شاپالاقتادى.
پالەستينانىڭ بىرىككەن ۇلتتار ۇيىمىنداعى تۇراقتى باقىلاۋشى-وكىلى رياد مانسۇر باس اسسامبلەيا تورىندە تۇرىپ: «بۇل ءبىزدىڭ بوستاندىققا, تاۋەلسىزدىككە, سونداي-اق, بىرىككەن ۇلتتار ۇيىمىنا تولىققاندى مۇشە بولۋعا ۇمتىلعان ماڭىزدى قادامىمىز», – دەدى.
الايدا, رياد مانسۇردىڭ ءسوزى, پالەستينانىڭ داۋىس بەرۋ قۇقىنا يە بولۋى يزرايلدىكتەردى قۋانتا قويمادى. ويتكەنى, ءيزرايلدىڭ پالەستينانى مەملەكەت رەتىندە مويىنداماي كەلە جاتقانى بەلگىلى.
باس اسسامبلەيا جيىنىنان سوڭ جۋرناليستەر قورشاۋىندا قالعان رياد مانسۇر داۋىس بەرۋ ءراسىمى ءساتتى وتكەنىن, پالەستينا حالقىنا ىستىق ىقىلاس بىلدىرىلگەنىن ايتتى.
پالەستينا باقىلاۋشى-مەملەكەت ستاتۋسىن 2012 جىلدىڭ 29 قاراشاسىندا العان بولاتىن. دەگەنمەن, بۇل ستاتۋس پالەستيناعا كوپ مۇمكىندىكتەر بەرە قويماعان... ال حالىقارالىق تريبۋنالدا قارالعان ماسەلەلەرگە بايلانىستى داۋىس بەرۋ قۇقىنا يە بولۋ ءۇشىن الدىمەن بىرىككەن ۇلتتار ۇيىمىنا, ونىڭ قاۋىپسىزدىك كەڭەسىنە تولىققاندى مۇشە بولۋ كەرەك.
جولدىباي بازار.