نازارباەۆ ۋنيۆەرسيتەتىنىڭ عالىمدارى انا ءتىلىمىزدى تسيفرلاندىردى

بۇل داۋىس كومەكشىلەرىنە مەملەكەتتىك ءتىلىمىزدى ءتۇسىنۋدى ۇيرەتىپ قانا قويماي, قازاق تىلىنە باسقا دا جاڭا تەحنولوگيالاردى ەنگىزۋگە مۇمكىندىك بەرەدى.

قازاق ءتىلىن دامىتۋ ءۇشىن ءوز داۋسىن جازۋعا كەلگەندەر بۇكىل قازاقستان بويىنشا الەۋمەتتىك جەلىلەر, بلوگەرلەر جانە مەديا ارقىلى جينالدى. وسىنىڭ ارقاسىندا نۋ اقىلدى جۇيەلەر جانە جاساندى ينتەللەكت ينستيتۋتىنىڭ (ISSAI) عالىمدارى ەكى مىڭ ادامدى جازا الدى. ولار بىرگە قازاق تىلىندە 300 ساعات 154 مىڭ سويلەم ايتقان.

نازارباەۆ ۋنيۆەرسيتەتىنىڭ عالىمدارى الىنعان اۋقىمدى داۋىس دەرەكتەرىنىڭ بازاسىندا العاش رەت قازاق ءتىلىنىڭ كورپۋسىن قۇردى, ياعني جاساندى ينتەللەكتىنى ءتىلدى تانۋعا, ماعىنالىق بايلانىستارىن, سوزدەردىڭ ايتىلۋ ەرەكشەلىكتەرىن جانە ءارتۇرلى ماعىناسىن تۇسىنۋگە ۇيرەتتى. تەحنولوگيانى مىنا جەردەن تەكسەرۋگە بولادى. سىلتەمە ارقىلى دا دەرەكقورعا كىرە الاسىز.

قازاق ءتىلىن تانۋ جۇيەسى Siri, Alexa, اليسا جانە Cortana سياقتى ۆيرتۋال كومەكشىلەردى جاسايتىن ادامدارعا قىزىق بولۋى مۇمكىن, بۇل ءارتۇرلى اقىلدى ءۇي تەحنولوگيالارى مەن اۆتوموبيلدەردە قازاق تىلىندەگى كوماندالاردى تۇسىنۋگە مۇمكىندىك بەرەدى.

بۇل تەحنولوگيانى قولدانۋ اياسى شەكسىز, سەبەبى عالىمدار ءوز قوسىمشالارىندا قازاق ءتىلىن ەنگىزگىسى كەلەتىندەردىڭ بارلىعىنا جاڭالىعىن تەگىن بولىسەدى. ايتپاقشى, ادەتتە مۇنداي جوبالاردى ءىرى كومپانيالار جۇزەگە اسىرادى, ال كەيىن ءوز قىزمەتىن كوممەرتسيالاندىرادى.

الايدا نازارباەۆ ۋنيۆەرسيتەتى عالىمدارىنىڭ ارقاسىندا بۇل بازانى KaspiBank, Beeline, BTS Digital, Yandex جانە Silero Speech ءسوزدى تانۋ جۇيەسى, سونداي-اق بىرنەشە ۋنيۆەرسيتەت, سونىڭ ىشىندە اقش-تاعى سۋورتمور جەكە گۋمانيتارلىق كوللەدجى, قازاقستان-بريتان تەحنيكالىق ۋنيۆەرسيتەتى, الماتى ەنەرگەتيكا جانە بايلانىس ۋنيۆەرسيتەتى, الماتىداعى ساتپاەۆ اتىنداعى تەحنيكالىق ۋنيۆەرسيتەت تەگىن الدى. 

ايتا كەتەيىك, 2018 جىلى Yandex "اليسانى" قازاق تىلىنە ۇيرەتۋدى جوسپارلاپ وتىرعانىن حابارلاعان بولاتىن, بىراق كومپانيا ازىرگە ءوزىنىڭ داۋىستىق كومەكشىسىنىڭ جاڭارعان نۇسقاسىن ۇسىنعان جوق. مۇمكىن عالىمداردىڭ جۇمىسى بۇل پروتسەستى جىلدامداتاتىن شىعار.