شوق جۇلدىزداي شاعىن تەرىساققان اۋىلىنىڭ تۇرعىندارى اۋىز سۋدىڭ ازابىن تارتقالى نە زامان. ەندى بۇرىن-سوڭدى وڭىردە قولعا الىنباعان جاقسى جاڭالىقتىڭ ارقاسىندا ەرنىمىزگە تازا سۋ تيەدى دەپ ۇمىتتەنىپ وتىر.
اۋىل العاشقى قازىعىن قاققاننان بەرى قۇدىق سۋىن ءىشىپ كەلەدى. بۇل وڭىردە جەراستى سۋى تاپشى. قانشا قازساڭىز دا تۇزدى سۋ شىعادى. مەيىرىڭ قانىپ ىشە المايسىڭ. بۇعان دەيىن قازىلعان قوس قۇدىقتىڭ ءدامى وسىنداي. ونىڭ ۇستىنە ساپاسى دا كۇماندى. ايتسە دە اۋىل تۇرعىندارى كوندىگىپ كەلگەن. ەندى مىنە, ءۇمىت وتى جانعالى تۇر. ەلدى مەكەندە اۋىز سۋدى تاسىمالدايتىن جانە تازارتاتىن بىرىكتىرىلگەن بلوك-مودۋل ىسكە قوسىلماق. بۇرىنعى قۇدىقتارعا قاراعاندا, الدەقايدا قۋاتتى. سوندىقتان ءساتىن سالسا تازا سۋعا قارىق قىلماق. بۇرىنعى قۇدىقتار قاۋعانى بىرەر رەت سالعان سوڭ تايىزدالىپ, سۋى سارقىلىپ, ءتۇبى كورىنىپ قالاتىن. مامانداردىڭ ايتۋىنا قاراعاندا, جاڭا مودۋل اۋىز سۋدى مولىنان بەرەتىن كورىنەدى. ەڭ باستىسى, وسى تاجىريبە وڭ ناتيجە بەرسە, توڭىرەكتەگى سۋ تاپشىلىعىن تارتىپ وتىرعان ەلدى مەكەندەرگە دە ورناتىلماق.
اۋىل تۇرعىندارىنىڭ ايتۋىنا قاراعاندا, تازا سۋمەن قامتۋدىڭ ەكى جولى بولعان كورىنەدى. ءبىرىنشىسى, تاعى دا تەرەڭىرەك قۇدىق قازۋ, ەكىنشىسى, سۋ تازالايتىن سۇزگى قويۋ. اۋىلدىق كەڭەس وتىرىسىندا ەل اقساقالدارى ەگجەي-تەگجەيلى اقىلداسا كەلە, سۇزگى قوياتىن بولىپ شەشىپتى. ويتكەنى ءدال وسى وڭىردە تاپ باسىپ تازا سۋ كوزىن تاپقان ەشكىم جوق. بەينەتتەنىپ قۇدىق قازىپ, ونىڭ سۋى تاعى دا اششى بولىپ شىقسا, قانشاما قاراجات جەلگە ۇشادى. ودان دا بار سۋدى سۇزگىدەن وتكىزىپ, تازالاعان دۇرىس.
نىساندى ەلوردالىق مەردىگەر كومپانيا قولعا العان. قۇرىلىسىنا اۋداندىق بيۋدجەتتەن 12 ملن تەڭگە قاراجات بولىنگەن. قازىر ارتەزيان قۇدىقتار دايىن. نوۆوكيەنكا اۋىلىنداعى ورتالىقتاندىرىلعان سۋمەن جابدىقتاۋ تەحنيكالارىن ورناتۋ جۇمىسى اياقتالۋعا تاياۋ. ءساتىن سالسا بۇل باستاما توڭىرەكتەگى قانشاما حالىقتىڭ قاجەتىن وتەۋگە سەپتىگىن تيگىزەتىن ءتۇرى بار.
اقمولا وبلىسى,
جاقسى اۋدانى