جاھاندى جايلاعان كوروناۆيرۋس ىندەتىمەن كۇرەسۋ ماقساتىندا جامبىل وبلىسىندا كارانتين تالاپتارى قايتا كۇشەيتىلدى. بۇل ورايدا, وبلىس اكىمىنىڭ ورىنباسارى ەرجان جىلقىباەۆ جەرگىلىكتى جۇرتشىلىقتى ساقتىق شارالارىن بارىنشا ساقتاۋعا شاقىرعان ەدى. ءوزى دە وبلىس اكىمى بەردىبەك ساپارباەۆتىڭ تاپسىرماسىمەن قۇرىلعان ارنايى توپپەن بىرگە تاراز قالاسىنداعى بىرقاتار مەيرامحانانى ارالاپ, توي جانە تويحانا يەلەرىنە جيىن-تويلاردى توقتاتۋ كەرەكتىگىن ايتىپ, ءتۇسىندىرۋ جۇمىستارىن جۇرگىزگەن بولاتىن.
«بارلىعىمىز بۇقارالىق اقپارات قۇرالدارىنىڭ بەتتەرىنەن وقىپ, حاباردار بولىپ وتىرمىز. بۇگىندە كورشىمىز رەسەيدە كۇن سايىن 15 مىڭداي ادام كوروناۆيرۋس پەن پنەۆمونيا جۇقتىرىپ جاتىر. ەلىمىزدىڭ سولتۇستىك, ورتالىق, باتىس وڭىرلەرىندە دە ىندەتكە بايلانىستى كارانتيندىك شارالار قايتا كۇشەيدى. دەمەك ءبىز دە ساقتانۋىمىز كەرەك. سوندىقتان دا وبلىس اكىمىنىڭ تاپسىرماسىمەن قۇرىلعان, قۇرامىندا توتەنشە جاعداي, پوليتسيا, بۇقارالىق اقپارات قۇرالدارى سىندى ورگانداردىڭ وكىلدەرى بار ارنايى توپ كۇن سايىن رەيدتەرگە شىعىپ, مەيرامحانالار مەن تويحانالاردى ارالاپ ءجۇر. وكىنىشكە قاراي, ءتارتىپتى بۇزىپ, جاسىرىنىپ توي جاساپ جاتقان ازاماتتارىمىز كوپ. مەن بەس تويحاناعا باس سۇعىپ, 100-120 ادامدى قامتىعان جيىن, تويدىڭ ۇستىنەن ءتۇستىم. سونشا قوناقتىڭ بىرەۋى دەرتتى بولسا, تويعا كەلگەندەردىڭ كەم دەگەندە جارتىسىنا جۇقتىراتىنى انىق», دەيدى ول.
وڭىردە العاش رەت توي ۇيىمداستىرعاندارعا ەسكەرتۋ بەرىلگەن بولسا, ال قايتالاعاندارعا 640 مىڭ تەڭگە كولەمىندە ايىپپۇل سالىنعان. جالپى, تاراز قالاسى بويىنشا بۇگىنگە دەيىن 1 284 نىسان تەكسەرىلىپ, 94 حاتتاما تولتىرىلعان. ايىپپۇلدىڭ جالپى كولەمى 10 972 120 تەڭگەنى قۇراپتى. ەندى تۇرعىنداردىڭ قاۋىپسىزدىگىن قامتاماسىز ەتۋ ماقساتىندا جامبىل وبلىسىندا قاۋىپتى ىندەتتىڭ تارالۋىن تەجەپ, تۇراقتى سانيتارلىق-ەپيدەميالىق احۋالدى ساقتاۋ ءۇشىن ستراتەگيالىق جوسپار ازىرلەنىپ, بەكىتىلىپ وتىر. اتالعان جوسپار ارنايى قىزمەتتەر مەن مەكەمەلەردىڭ شەكتەۋ شارالارىنىڭ تومەن, ورتاشا جانە جوعارى دەڭگەيىنە ازىرلىگىن قامتاماسىز ەتەدى. بەكىتىلگەن جوسپاردىڭ ورىندالۋ بارىسى تۋرالى وڭىرلىك جەدەل شتابتىڭ كەزەكتى وتىرىسى دا ءوتتى.
وبلىس بويىنشا تاۋارلار مەن كورسەتىلەتىن قىزمەتتەردىڭ قاۋىپسىزدىگى جانە ساپاسىن باقىلاۋ دەپارتامەنتى باسشىسىنىڭ مىندەتىن اتقارۋشى نەيليا مۋليكوۆا اۋقىمدى اقپاراتتىق-ناسيحاتتىق جۇمىستار جۇرگىزۋ كەرەكتىگىن باسا ايتۋدا.
«تۇرعىندار ۆيرۋستىڭ ءالى دە قاۋىپتى ەكەنىن ءتۇسىنۋى كەرەك. قاتاڭ شەكتەۋ شارالارىن ۇستانۋ ارقىلى عانا ءبىز ءوزىمىز بەن جاقىندارىمىزدى قورعاي الامىز. حالىقتان مەديتسينالىق ماسكا تاعۋ رەجىمىن ۇستانىپ, الەۋمەتتىك اراقاشىقتىقتى ساقتاۋدى تالاپ ەتۋ كەرەك. جوسپارلانعان بارلىق شارادان باس تارتقان ءجون», دەيدى ن. مۋليكوۆا.
وڭىردە جيىن-تويلاردى بولدىرماۋ, ءىس-شارالارعا توقتاۋ سالۋ سياقتى قاجەتتى جۇمىستار جۇرگىزىلۋدە. بۇل رەتتە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ باستى ماقسات – ىندەتتىڭ جاپپاي تارالۋىنا جول بەرمەۋ ەكەنىن ايتادى.
«دارىگەرلەر كوروناۆيرۋس ينفەكتسياسىنىڭ تارالۋى مۇمكىن ەكىنشى تولقىنىنا دايىندىقتى مىقتاپ قولعا الدى. سول سياقتى تۇرعىندار دا ىندەتتىڭ اسقىنىپ كەتۋ قاۋپىن تومەندەتۋگە قام جاساۋى كەرەك», دەدى ول.
قازىرگى تاڭدا وڭىردە بارلىعى 2 530 توسەكتىك ورىن دايىندالعان. ونىڭ ىشىندە رەانيماتسيالىق بولىمدەردە 253 توسەك بار. ال مەديتسينالىق مەكەمەلەردە وكپەنى جاساندى تىنىستاندىرۋعا ارنالعان 253 اپپارات, 706 وتتەگى باللونى, 542 وتتەگى كونتسەنتراتورى, 1 009 پۋلسوكسيمەتر, 19 تسيفرلىق رەنتگەن اپپاراتى, 10 كومپيۋتەرلىك توموگراف جانە 7 ماگنيتتى-رەزونانستى توموگراف دايىندالعان. تاعى دا قوسىمشا 74 وكپەنى جاساندى تىنىستاندىرۋ اپپاراتى, 7 كومپيۋتەر توموگرافى, 4 تسيفرلىق رەنتگەن اپپاراتى, 4 وتتەگى ستانساسى, 74 سانيتارلىق اۆتوكولىك, 8 جىلجىمالى مەديتسينالىق كەشەن جانە 100 كوپفۋنكتسيونالدى توسەك جەتكىزىلەتىن بولادى. ال قاۋىپتى ىندەتپەن كۇرەسكە 4 410 مەديتسينالىق قىزمەتكەردى جۇمىلدىرۋ جوسپارلانۋدا ەكەن. ءوڭىردىڭ باس دارىگەرىنىڭ ايتۋىنشا, جەكە قورعانىش قۇرالدارىنىڭ جەتكىلىكتى مولشەرى جاساقتالعان. مونيتورينگتىك توپتار 3 ءىرى اۋرۋحانادا دارىلەردىڭ تاپشىلىعىن انىقتاعان. بەرىلگەن وتىنىمدەرگە ساي «سق-فارماتسيا» جشس مەديتسينالىق پرەپاراتتاردى جەتكىزىپ بەرەدى. ال بۇل ورايدا «سق-فارماتسيا» جشس-نىڭ وڭىردەگى وكىلى ايجان تورتاەۆا دارىلەردى ۋاقتىلى جەتكىزۋدى كومپانيا باستى نازاردا ۇستايتىنىن ايتتى.
بۇگىنگى تاڭدا ايماقتا كوروناۆيرۋس ىندەتىنەن ساقتانۋ ءۇشىن بارىنشا جۇيەلى جۇمىس جۇرگىزىلۋدە. وبلىس اكىمى ب.ساپارباەۆ جەرگىلىكتى دەنساۋلىق ساقتاۋ باسقارماسىنىڭ باسشىسى ءا.قاليەۆكە بارلىق رەانيماتسيالىق توسەكتەردىڭ وكپەنى جاساندى تىنىس الدىرۋ اپپاراتىمەن قامتىلۋىن باقىلاۋعا الۋدى تاپسىرعان بولاتىن. سونداي-اق وبلىس اكىمى اۋدان اكىمدەرىنە دە اۋرۋحانالاردى ارالاپ, مەديتسينالىق ينفراقۇرىلىمنىڭ كوروناۆيرۋس ىندەتىنىڭ بولۋى مۇمكىن كەزەكتى تولقىنىنا دايىندىعىن تەكسەرۋدى مىندەتتەدى. دەگەنمەن قازىرگى كەزدە وبلىستا ادامداردىڭ قاۋىپسىزدىگى ءۇشىن بارلىق مۇمكىندىك جاسالۋدا. دەنساۋلىق ساقتاۋ باسقارماسىنىڭ باسشىسى ءا.قاليەۆتىڭ ايتۋىنشا, بۇگىندە تۇماۋعا قارسى ەكپە 243 278 ادامعا ەگىلگەن. بۇل جۇمىستار ءارى قاراي دا جالعاسادى.
جامبىل وبلىسى