الدە كوزسىز قۇشتارلىق, الدە تەگىن ولجاعا قارىق بولۋدى كوكسەگەندىكتەن بە ەكەن, وڭىردە زاڭسىز اڭ جانە بالىق اۋلاۋ وقيعالارى تيىلماي تۇر.
زەرەندى اۋداندىق پوليتسيا ءبولىمىنىڭ قىزمەتكەرلەرى ءتۇن جامىلىپ اڭعا شىعىپ, زاڭ بۇزعانداردى ۇستادى. ولاردىڭ كولىگىنەن ەكى ەلىك تابىلعان. سونداي-اق, تىركەلمەگەن اڭشى مىلتىعى مەن 26 وق تاركىلەندى. ەن دالانىڭ ەركە اڭىنا سۋىق قارۋ كەزەنگەندەر زاڭ بويىنشا جاۋاپ بەرەتىن بولادى. ءبىر وكىنىشتىسى, وسى تاراپتا قانشاما تۇسىنىك جۇمىستارى جۇرگىزىلىپ, زاڭ بۇزعاندار جازاعا تارتىلىپ جاتسا دا, ەل ىشىندە مىلتىق اسىنىپ, تابيعاتقا تاعىلىق جاسايتىندار ايىلدارىن جياتىن ەمەس. وسى اۋدانداعى ايدابول كولىندە زاڭسىز بالىق اۋلاعان زەرەندى اۋىلىنىڭ تۇرعىنىنىڭ ارەكەتى اشكەرە بولدى. براكونەر بالىقشىدان اق بالىقتىڭ 164 كەلىسى تاركىلەندى.
–زاڭسىز بالىق اۋلاۋدان تابيعاتقا كەلگەن زالال 627 مىڭ تەڭگە دەپ باعالانىپ وتىر. بۇل ءىس بويىنشا ماتەريالدار زەرەندى اۋداندىق پوليتسيا بولىمىنە جىبەرىلدى, – دەيدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ءبولىم باسشىسى سانسىزباي ىدىرىسوۆ, – اكىمشىلىك-قۇقىق بۇزۋشىلىق تۋرالى كودەكستىڭ 393-بابى بويىنشا شارا قولدانىلادى.
جوعارىدا ايتىلعان ەكى وقيعادان كەلگەن شىعىن ءبىر جارىم ميلليون تەڭگەدەن اسادى ەكەن. ەندى مىنا ءبىر دەرەككە نازار اۋدارالىق, وبلىس اۋماعىندا وتكىزىلىپ جاتقان «براكونەر» جەدەل الدىن الۋ شاراسى بارىسىندا بالىق اۋلاۋ ەرەجەلەرىن بۇزعان 190, زاڭسىز اڭ اۋلاۋدىڭ 251 وقيعاسى ورىن العان.
–نەبارى 9 كۇن ىشىندە 129 زاڭ بۇزۋشىلىق انىقتالدى, 20 قارۋ تاركىلەندى, – دەيدى وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى باستىعىنىڭ ورىنباسارى رۋسلان مۋساەۆ, – ولاردىڭ بارلىعى اكىمشىلىك جاۋاپكەرشىلىككە تارتىلادى.
ءبىر اپتاداعى زاڭ بۇزۋشىلىق دەرەگى وسىنداي بولسا, تابيعاتتىڭ ەن بايلىعىنا سۇقتانعان «قىزىل كوزدەردىڭ» قىرعىنىن كوز الدىڭىزعا ەلەستەتۋدىڭ ءوزى قيىن.
اقمولا وبلىسى