«ماماندىعىم – قۇتقارۋشى!»

كەڭەس وكىمەتى ىدىراعان كەزدە قازاقستاننىڭ ورتكە قارسى قىزمەتى ماتەريالدىق جاعىنان دا, تەحنيكالىق جاراقتاندىرىلۋى جاعىنان دا قيىن جاعدايدا تۇرعان قۇرىلىم بولاتىن. بولىمشەلەردە ءورت ءسوندىرۋ تەحنيكاسى كونەرگەن, زاماناۋي اپاتتىق-قۇتقارۋ جابدىعى جەتىسپەدى. ەكونوميكالىق قيىندىقتارعا بايلانىستى تەحنيكانى جوندەۋ, قوسالقى بولشەك ساتىپ الۋ, ءتىپتى جانار-جاعارماي ساتىپ الۋعا قارجى بولىنبەدى. تەك مەملەكەت بىرتە-بىرتە اياعىنا نىق تۇرعان سوڭ عانا جاعداي وزگەردى.

بۇگىندە باتىس قازاقستان وبلىسى اۋماعىندا 3 مامانداندىرىلعان ءورت ءسوندىرۋ ءبولىمى, سونداي-اق 9 ءورت ءسون­دىرۋ ءبولىمى جانە 16 ءورت ءسوندىرۋ بەكەتى جۇمىس ىستەيدى. قىزمەت بولىم­شە­لەرىندە بارلىعى 197 تەحنيكا بار. مۇنىڭ 75-ءى – ءورت ءسوندىرۋ كولىگى. جالپى ءورت ءسوندىرۋ قىزمەتىندە 951 ادام قىزمەت ەتەدى.

ارينە, دابىل سوعىلعاندا كۇن دەمەي, ءتۇن دەمەي باسىن قاتەرگە تىگىپ, ءتىلسىز جاۋعا, ءتۇرلى قيىن جاعدايعا قار­سى اتتانىپ بارا جاتاتىن قۇتقارۋ­شى توپتىڭ ءار مۇشەسى تۋرالى جەكە ماقالا جازسا دا ارتىق ەتپەيدى. ءبىز تومەن­دە باتىس قازاقستان وبلىستىق توتەن­شە جاعدايلار دەپارتامەنتى ۇسىن­عان قۇتقارۋشى قايسار جاندارمەن جاقى­نىراق تانىستىرماقپىز.

25 جىل ساپتا جۇرگەن

نيكولاي ۆالەرەۆيچ – قازاقستان قۇتقارۋ قىزمەتى پايدا بولعان العاشقى كۇننەن بەرى ساپتا كەلە جاتقان ساردار.

ازاماتتىق قورعاۋ پودپولكوۆنيگى نيكولاي ۆالەرەۆيچ پوليششۋك 1978 جىلى 5 ماۋسىمدا ورال قالاسىندا دۇ­نيەگە كەلگەن ەكەن. ازاماتتىق قور­عاۋ قىزمەت ورگاندارىندا 1995 جىلعى 1 قاڭتاردان باستاپ قىزمەت اتقارادى.

نيكولاي 1997 جىلى قازاقستان رەس­پۋب­ليكاسى ىشكى ىستەر مينيستر­لىگىنە قاراستى پاۆلودار تەحنيكالىق كول­لەدج­ىندە ورتكە قارسى قورعانىس تەحنيگى ماماندىعىن الىپ شىققان. 2012 جىلى باتىس قازاقستان ينجەنەرلىك-تەحنيكالىق ۋنيۆەرسيتەتىندە قۇرى­لىسشى ماماندىعى بويىنشا جوعارى ءبىلىم الدى.

ء«بىزدىڭ نيكولاي ۆالەرەۆيچ – ادامي قاسيەتى جوعارى, كەيىنگى جاستارعا جول كورسەتىپ, ۇجىمدا ۇلكەن بەدەلگە يە بولعان جان. تاڭداعان كاسىبىن سۇيىس­پەنشىلىكپەن, ادال دا ءمىنسىز ات­قارادى» دەيدى ارىپتەستەرى.

ۆالەري پوليششۋك ورتكە قارسى قىزمەت جولىندا ءارتۇرلى لاۋازىمدا بولدى. №2 ءورت ءسوندىرۋ ءبولىمىنىڭ قا­راۋىل باستىعى, №1مامان­دان­دىرىل­عان ءورت ءسوندىرۋ ءبولىمىنىڭ اعا ينجەنەرى, ء«ورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مەملەكەتتىك مەكەمەسى باسشىسىنىڭ ورىنباسارى لاۋازىمدارىن اتقاردى. بۇگىنگى تاڭدا باتىس قازاقستان وبلىستىق توتەنشە جاعدايلار دەپارتامەنتى ء«ورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مەملەكەتتىك مەكەمەسىنىڭ ءورت ءسوندىرۋ كەزەكشى قىزمەتى جەدەل كەزەكشىسىنىڭ كومەكشىسى مىندەتىن اتقارادى.

شيرەك عاسىر ومىرىندە ۆالەري پوليششۋك كۋا بولعان قيىن ساتتەر, وكى­نىشتى ءورت وقيعالارى وتە كوپ. ءتىلسىز جاۋدىڭ ء«تىلىن» ۇعىپ, ونى تەز قۇرىق­تاۋدىڭ جولىن تاجىريبەلى مامان عانا ۇيىمداستىرا الادى. نيكولاي ۆالەرەۆيچ تىكەلەي ارالاسقان ءبىر وقيعانى ەسكە الايىق. بيىل 14 شىلدە كۇنى 9 ساعات 27 مينۋتتا تەرەكتى اۋدانىنا قاراستى شاعاتاي جانە اقسوعىم اۋىلدارى ماڭىندا قۇرعاق ءشوپ پەن بۇتا ورتەندى. كۇن جەل ەدى. جەلدىڭ ەكپىنى سەكۋندىنا 15-20 سەكۋندقا دەيىن جەتىپ, ۇشقىن جايىق وزەنىنەن اسىپ ءتۇستى. ال وزەننىڭ ارعى بەتىندە كولوۆەرتنوە اۋىلى بار ەدى. ءسويتىپ, ءورت سالدارىنان ءبىر تۇرعىن ءۇي, ءبىر بوس تۇرعان يەسىز عيمارات جانە 4 قورا-قوپسى ورتكە وراندى. قاۋىپتى اۋماقتان 42 ادام, 15 سيىر, 25 قوي-ەشكى, 30 قۇس ەۆاكۋاتسيالاندى. ابىروي بولعاندا ادام شىعىنى, جاراقات العاندار بولعان جوق. بۇل نيكولاي ۆالەرەۆيچ سەكىلدى تاجىريبەلى مامانداردىڭ قيىن ساتتە ابىرجىماي, ساۋاتتى دا ناقتى ارەكەت ەتۋىنىڭ ناتيجەسى بولاتىن.

وتباسىندا 2 ۇل 1 قىز بالا تار­بيەلەپ وتىرعان ۆالەري پوليششۋك كاسىبي قىزمەتىندە ۇلگىلى ەڭبەگى ءۇشىن «ورتكە قارسى قىزمەت ورگاندارىنداعى ءمىنسىز قىزمەتى ءۇشىن» III, ءىى, ءى دارەجەلى مەدالدارمەن ماراپاتتالعان.

قۇتقارۋ قىزمەتىنىڭ قۇرداسى

ورال قالاسىنداعى مامانداندى­رىلعان №3 ءورت ءسوندىرۋ ءبولىمىنىڭ قۇتقارۋشى-ءورت ءسوندىرۋشىسى ايبەك ايماعامبەتوۆ 1995 جىلى باتىس قازاقستان وبلىسى, قازتالوۆ اۋدانى, جالپاقتال اۋىلىندا دۇنيەگە كەلگەن. قازاقستاندىق ازاماتتىق قورعاۋ جۇيەسى سەكىلدى, ايبەك اباي ۇلى دا ءوزىنىڭ ەكىنشى مۇشەلىن تويلاپ وتىر.

2002 جىلى جالپاقتال ورتا مەك­تەبىنىڭ تابالدىرىعىن اتتاعان ايبەك 2008 جىلدان باستاپ وقۋىن باتىس قازاقستان وبلىستىق مامان­دان­­دى­رىلعان دارىندى بالالارعا ارنال­عان سپورت مەكتەپ-ينتەرناتىندا جال­عاستىردى. سپورت مەكتەبىندە ءتالىم-تاربيەگە ۇيرەنە ءجۇرىپ, سامبو ۇيىر­­مەسىنە قاتىستى. 2013-2020 جىل­دار ارالىعىندا باتىس قازاق­ستان گۋما­نيتارلىق كوللەدجى, كەيىن ۋني­ۆەرسي­تەتىندە وقىپ, دەنە شىنىقتىرۋ جانە سپورت فاكۋلتەتىن اياقتادى.

2016-2017 جىلدار ارالىعىندا ماڭعىستاۋ وبلىسى, بەينەۋ قالاسىندا اسكەري بورىشىن وتەدى.

ايبەك اباي ۇلى 2018 جىلى جەلتوقسان ايىندا ىشكى ىستەر مي­نيسترلىگى توتەنشە جاعدايلار كو­مي­تەتى باتىس قازاقستان وبلىستىق توتەنشە جاعدايلار دەپارتامەنتى ءورت ءسوندىرۋ جانە ازاماتتىق قورعانىس جەكە قۇرامىنىڭ ورال قالالىق ما­مان­داندىرىلعان №3 ءورت ءسوندىرۋ بولى­مىنە قۇتقارۋشى-ءورت ءسوندىرۋشى بولىپ جۇمىسقا تۇردى.

ايبەك بالا كەزىنەن سپورتقا وتە بەيىم بولعانىن ايتتىق. اۋىلدىق, اۋداندىق, وبلىستىق سپورتتىق ءىس-شارالارعا بەلسەنە قاتىسىپ, تالاي جۇلدەلى ورىنعا يە بولعان ازامات سامبودان سپورت شەبەرى. 2013 جىلى ەرلەر اراسىندا قازاقستان رەسپۋبليكاسى چەم­پيوناتىندا 1-ورىن, 2013 جىل­دىڭ قازان ايىندا جاسوسپىرىمدەر ارا­سىن­داعى الەم چەمپيوناتىندا 3-ورىن, 2014 جىلى جاستار اراسىندا قازاق­ستان چەمپيونا­تىندا 3-ورىندى يەلەندى. ايبەك اباي­ ۇلىنىڭ سپورت­قا بەيىمدىلىگى, سالامات­تى ءومىرى, فيزي­كالىق دايارلىعى كاسى­بي قىز­مەتىندە دە ۇنەمى كومەكتەسىپ كەلەدى.

2020 جىلى 16 ساۋىردە ورال قالا­سىنىڭ اباي داڭعىلى بويىندا ورنا­لاسقان كوپقاباتتى جاتاقحانادان ءورت شىققان بولاتىن. سول جولى 119 ادام­دى, ونىڭ ىشىندە 43 بالانى ەۆا­كۋاتسيالاۋعا قاتىسىپ, ايبەك اباي­ ۇلى تۇرعىنداردىڭ العىسىنا بولەندى.

قىزمەتىندە ۇنەمى ماقتاۋ ەستىپ جۇرسە دە ايبەك ءوزىن سالماقتى ۇس­تايدى. جان-جاقتى قابىلەتتى, ادامگەر­شىلىگى مول جاندى ارىپتەستەرى دە ەرەكشە قۇرمەت تۇتادى.

ارينە, ءومىر بار جەردە قاتەر دە بار. سىن ساتتە, قيىن جاعدايدا جەدەل دە ساۋاتتى قيمىلدايتىن مامان قۇتقا­رۋشىلاردىڭ قىزمەتىنە قوعام ار­قا­شان ءزارۋ. كاسىبي مەرەكەسى  كەزىن­دە ءبىز ازاماتتىق قورعانىس سالاسىندا جۇر­گەن بارلىق قۇتقارۋشىلار قاۋى­­مىن قۇتتىقتاپ, ەڭبەگىنە جەمىس تىلەيمىز!

باتىس قازاقستان وبلىسى