بۇگىن ەلىمىزدىڭ ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ورمان شارۋاشىلىعى قىزمەتكەرلەرىن كاسىبي مەرەكەلەرىمەن قۇتتىقتادى. جىل سايىن قازان ايىنىڭ ءۇشىنشى جەكسەنبىسىندە اتاپ وتىلەتىن كۇن بيىل 18 قازانعا تۋرا كەلىپ وتىر, دەپ حابارلايدى Egemen.kz
"قيىندىعى مەن سان-ءتۇرلى تاۋەكەلدەرىنە قاراماستان, ەلىمىزدىڭ ورمان قورىن ساقتاپ, جاڭعىرتۋ تاباندى ەڭبەك ەتىپ كەلە جاتقان ازاماتتار قانداي قۇرمەتكە دە لايىق. سەبەبى ورمان كەشەنى – ەكولوگيالىق قاۋىپسىزدىكتىڭ كەپىلى", دەپ جازدى ول Twitter پاراقشاسىندا.
مينيستر قازىر ورمانشىلار ستاتۋسىن كوتەرۋ ماسەلەسى قارالىپ جاتقانىنان حاباردار ەتتى.
"ورمانشىلار باعا جەتپەس ۇلتتىق بايلىعىمىزدى قورعاپ, كەلەر ۇرپاققا جەتكىزۋشىلەر. ولاردىڭ زور ەڭبەگىن ەسكەرە وتىرىپ, ءبىزدىڭ مينيسترلىك ورمانشىلار ستاتۋسىن كوتەرۋ ماسەلەسىن قاراستىرىپ جاتىر. جاسىل تابيعاتتى ايالاۋ – ارقايسىمىزدىڭ مىندەتىمىز. سوندىقتان بارلىق ەل ازاماتتارىن ورمان قورىنا ۇقىپتى قاراپ, ونى قورعاۋشىلارعا قولداۋ كورسەتۋگە, جۇمىستارىن باعالاۋعا شاقىرامىن", دەپ اتاپ ءوتتى ماعزۇم مىرزاعاليەۆ.
ەسكە سالايىق, ورمان شارۋاشىلىعى قىزمەتكەرلەرىنىڭ كاسىبي مەرەكەسى 2017 جىلى قر ۇكىمەتى قاۋلىسىمەن بەكىتىلگەن.