قازىرگى كەزدە تاراز قالاسىندا كارانتين تالاپتارىن قايتا كۇشەيتۋ جۇمىستارى جۇرگىزىلۋدە. دەگەنمەن, شاھاردا ءالى دە توي جاساۋ تىيىلماي تۇر. اسىرەسە, سەنبى, جەكسەنبى كۇندەرى دە تارازدا توي تويلاۋ جالعاسۋدا. بۇل رەتتە قالا اكىمدىگىنىڭ قىزمەتكەرلەرى رەيدكە شىعىپ, ءتيىستى نىسانداردى تەكسەرۋدە. تاراز قالاسى بويىنشا كۇنى بۇگىنگە دەيىن 1284 نىسان تەكسەرىلىپ, 94 حاتتاما تولتىرىلعان. سالىنعان ايىپپۇلدىڭ جالپى كولەمى 10 ميلليون 972 مىڭ 120 تەڭگەنى قۇراعان, دەپ حابارلايدى Egemen.kz
جۋىردا توي ماسەلەسىنە بايلانىستى تاراز قالاسىنىڭ اكىمى ايتقازى قارابالاەۆ مالىمدەمە جاسادى. اكىم مونيتورينگتىك توپ جۇرگىزگەن رەيد بارىسىندا كەز-كەلگەن مەيرامحانادا ءوتىپ جاتقان تويدا مەملەكەتتىك قىزمەتشىلەردىڭ بار ەكەنى انىقتالسا, ولارعا ءتيىستى شارا قولداناتىنىن ايتتى. ول ءتىپتى قالالىق اكىمدىكتە جۇمىس ىستەيتىن قىزمەتكەر بولسا, جۇمىستان بوساتىلۋى ىقتيمال ەكەنىن ەسكەرتتى.
"قازىر ۇلكەن تويحانالاردا توي جاساپ جاتقان قاراپايىم حالىق ەمەس. ونى جاساپ جاتقان لاۋازىمدى, مەملەكەتتىك قىزمەتتە جۇرگەن ازاماتتار. توي ءوتىپ جاتقان مەيرامحانانىڭ ەگەسى, بولماسا سول تويعا شاقىرىلعانداردىڭ ىشىندە ءبىزدىڭ مەكەمەنىڭ قىزمەتكەرلەرى بولعان جاعدايدا ءبىز ءوز تاراپىمىزدان ءتيىستى ورىندارعا شارا قولدانۋعا ۇسىنىس بەرەتىن بولامىز. وسىنى ەسكەرسە دەيمىن. ويتكەنى اۋىلدان, باسقا جاقتان تويعا ەشكىم دە كەلىپ جاتقان جوق. ونىڭ ءبارى وسى تاراز قالاسىنداعى لاۋازىمدى ازاماتتار. توي ءوتىپ جاتقان "باق سارايى", ء"ساتتى", "تاراز حولل" سياقتى مەيرامحانالار قاراپايىم حالىقتىڭ قالتاسى كوتەرەتىن جەر ەمەس. سوندىقتان دا ءبارىمىز جۇكتى جۇمىلا كوتەرمەسەك, جۇمىس جۇرمەيدى", دەيدى ايتقازى قارابالاەۆ.
سونداي-اق, قانداي مەملەكەتتىك مەكەمەدە بولسىن قىزمەت ىستەيتىن شەنەۋنىكتەردىڭ تويعا بارعانى انىقتالىپ جاتسا, ولاردىڭ باسشىلارىنا اتالعان قىزمەتكەرگە شارا قولدانۋ ءۇشىن ۇسىنىس حات جولداناتىن بولدى.
جامبىل وبلىسى