تۇركىستان وبلىسىندا كوروناۆيرۋس ينفەكتسياسىنىڭ ىقتيمال بەلەڭ الۋ جاعدايلارى ەسكەرىلە وتىرىپ, ەمدەۋ مەكەمەلەرىندە جۇمىس جوسپارى بەكىتىلگەن. جالپى, مەديتسينالىق ۇيىمداردا 6000-عا جۋىق توسەك ورنى قاراستىرىلعان. وبلىستاعى مەديتسينالىق مەكەمەلەردىڭ پاندەميانىڭ بولۋى مۇمكىن ەكىنشى تولقىنىنا دايىندىق بارىسىمەن تانىسۋ ماقساتىندا باق وكىلدەرىنە ارنالىپ پرەسس-تۋر ۇيىمداستىرىلدى, دەپ حابارلايدى Egemen.kz.
ايتا كەتەرلىگى, اۋدان-قالالارداعى اۋرۋحانالاردىڭ ماتەريالدى-تەحنيكالىق بازاسى جاقسارتىلىپ, وكپەنى جاساندى جەلدەتۋ اپپاراتتار سانى 65 پايىزعا ارتقان. سونىمەن قاتار, 80 وكسيگەن اپپاراتى الىنىپ, وتتەگى كونتسەنتراتورلارىنىڭ سانى 900 بىرلىككە جەتكەن. بۇدان وزگە, اۋرۋحانا ايماقتارىنان سالىنعان وتتەگى ستانتسيالارى ەكى ەسەگە ارتقان.
ەمدەۋ مەكەمەسىن تولىعىمەن وتتەگىمەن قامتاماسىز ەتەتىن ستانتسيانىڭ ءبىرى كەنتاۋ قالالىق ورتالىق اۋرۋحاناسىندا ورناتىلعان. اۋرۋحانا جاڭادان اشىلعان گەمودياليز ورتالىعى, كومپيۋتەرلىك توموگرافيا, ساندىق رەنتگەن اپپاراتى, جاڭا ۇلگىدەگى ۋدز مەن زەرتحانالىق دياگنوستيكالىق اپپاراتتارىمەن جابدىقتالعان.
"ىندەتتىڭ ءبىرىنشى تولقىنىندا ورىن العان كەمشىلىكتەردى بولدىرماۋ ءۇشىن بۇگىندە بارلىق ءتيىستى جاعدايلار جاسالۋدا. اتاپ ايتساق, 2-3 ايعا جەتەتىن اۋرۋعا قارسى قولدانىلاتىن ءدارى-دارمەك قورى جاساقتالدى. قاجەتتى قۇرال-جابدىقتار جەتكىلىكتى دەڭگەيدە الىندى. ەندى وبلىستىق مەديتسينالىق جەدەل-جاردەم قىزمەتى جىل سوڭىنا دەيىن قوسىمشا 120 كولىكپەن قامتىلاتىن بولادى. شالعاي اۋىلدارعا 12 جىلجىمالى مەديتسينالىق كەشەن الىنۋدا", – دەدى وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ.
سونىمەن قاتار ارىس قالالىق ورتالىق اۋرۋحاناسىندا دا Covid-19 ينفەكتسياسىمەن كۇرەس جۇمىستارى قولعا الىنعان. مەديتسينالىق ۇيىم جەكە قورعانىس كيىمدەرى مەن ءدارى-دارمەكتىڭ ەكى ايلىق قورىمەن قامتاماسىز ەتىلگەن. جانساقتاۋ بولىمىندە 9 وكپەنى جاساندى جەلدەتۋ اپپاراتى, قوسىمشا وتتەگى وكسيگەنەراتورلارى جانە باسقا دا قاجەتتى مەديتسينالىق قۇرال-جابدىقتار ورناتىلعان. سونداي-اق, كوروناۆيرۋس ينفەكتسياسىمەن كۇرەسكە جۇمىلدىرىلعان 19 ءموبيلدى توپ حالىققا قىزمەت كورسەتۋدە.
ال ورداباسى اۋداندىق ورتالىق اۋرۋحاناسىندا كوروناۆيرۋس ينفەكتسياسىن انىقتايتىن زەرتحانا ىسكە قوسىلعان. پتر سىناماسى بويىنشا انىقتايتىن زەرتحانا تاۋلىگىنە 500-گە جۋىق تەست قابىلداۋعا مۇمكىندىگى بار. الداعى ۋاقىتتا ارىس قالاسى مەن بايدىبەك اۋداندارىنان سىناما قابىلداۋ جوسپارلانۋدا. تۇركىستان وبلىسى بويىنشا مۇنداي 12 زەرتحانا جۇمىس ىستەۋدە. سونىمەن قاتار, اۋداندا ەسكى اۋرۋحانا عيماراتى تولىق كۇردەلى جوندەۋدەن وتكىزىلىپ, 100 توسەك ورىندى پروۆيزورلىق, 10 ورىندى وبسەرۆاتسيالىق ءبولىم اشىلعان. قازىرگى تاڭدا ەمدەۋ مەكەمەسى جەكە وتتەگى ستانتسياسى, 23 وكپەنى جاساندى جەلدەتۋ اپپاراتىمەن جاساقتالعان.
ايتا كەتەيىك, ايماقتا بۇگىندە جالپى 23 429 مەديتسينا قىزمەتكەرى بار. ونىڭ 5000-نان استامى دارىگەرلەر, قالعاندارى ورتا بۋىن ماماندارى. اق حالاتتى جانداردىڭ ەرەن ەڭبەگىنىڭ ارقاسىندا وڭىردە قاۋىپتى ىندەتتى جۇقتىرعان 3331 ناۋقاس تولىق جازىلىپ شىققان. جالپى, پاندەميا بەلەڭ العالى وبلىستا Covid-19 ينفەكتسياسى راستالعان 3395 جاعداي تىركەلدى. ولاردىڭ 2355-دە اۋرۋ سيمپتومسىز وتكەن.