قازاقستان قارۋلى كۇشتەرىندە اسكەري قىزمەتشىلەرگە "حالىق العىسى" مەدالىن سالتاناتتى تۇردە تابىستاۋ راسىمدەرى وتۋدە. پرەزيدەنت جارلىعىنا سايكەس اتالعان ماراپاتقا 700 ادام يە بولدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
ماراپاتتالۋشىلاردىڭ اراسىندا كوروناۆيرۋس ىندەتىمەن كۇرەسۋدە ايتارلىقتاي ۇلەس قوسقان قارۋلى كۇشتەردىڭ وفيتسەرلەرى, سەرجانتتارى مەن ساربازدارى, كۋرسانتتار جانە ازاماتتىق پەرسونال دا بار.
سالتاناتتى ءىس-شارا كۇنى بۇرىن «وڭتۇستىك» وڭىرلىك قولباسشىلىق اسكەرلەرىندە ءوتتى. بۇل وڭىرلىك قولباسشىلىقتىڭ اسكەري بولىمدەرىنەن توتەنشە جاعداي رەجيمى جانە كارانتيندىك شارالاردى ساقتاۋدى قامتاماسىز ەتۋگە ەكى مىڭعا جۋىق اسكەري قىزمەتشى تارتىلعان.
"وڭتۇستىك" وڭىرلىك قولباسشىلىعىنىڭ اسكەري قىزمەتشىلەرى ازاماتتاردىڭ دەنساۋلىعى مەن ءومىرىن قورعاۋ ءۇشىن ءبىر كىسىدەي اياعىنان تىك تۇردى. ولار ازاماتتاردىڭ قاۋىپسىزدىگى, ەلدىڭ ەگەمەندىگى مەن قازاقستان قول جەتكىزگەن بارلىق جەتىستىكتەرىن قورعاۋ جولىندا وتان قورعاۋشى اتاعىنا ابدەن لايىقتىلار", – دەپ اتاپ ءوتتى ءوڭىردىڭ قولباسشىسى گەنەرال-مايور قايدار قاراقۇلوۆ.
ەلىمىزدىڭ قارۋلى كۇشتەرى توتەنشە جاعدايدى قامتاماسىز ەتۋ ءىس-شارالارىنا العاشقى كۇنىنەن باستاپ تارتىلدى. 10,5 مىڭنان استام اسكەري قىزمەتشى دەزينفەكتسيالاۋ جۇمىستارىنا, بلوكبەكەتتەردە كەزەكشىلىك اتقارۋعا, پاترۋلدىك جۇمىستارىنا قاتىسىپ, شەتەلدەن جۇزدەگەن وتانداستىرىمىزدى ەۆاكۋاتسيالاۋ مەن گۋمانيتارلىق كومەكتى جەتكىزۋگە اتسالىستى. 29 قالادا دەزينفەكتسيالاۋ جۇمىستارى جۇرگىزىلدى. تج كەزىندە جالپى كولەمى 50 ميلليون شارشى مەتردى قۇرايتىن الەۋمەتتىك ماڭىزدى نىساندار, 4000 شاقىرىمعا جۋىق جولدار زالالسىزداندىرىلدى. اسكەري قىزمەتشىلەردىڭ قاتىسۋىمەن قوعامدىق ءتارتىپتى بۇزۋدىڭ 1225 فاكتىسى جانە 35 قىلمىستىق قۇقىق بۇزۋشىلىقتىڭ جولى كەسىلدى.
سونىمەن قاتار جۇزدەگەن اسكەري قىزمەتشىلەر بىرنەشە ۋاقىت بويى ۇيلەرىنەن مىڭداعان شاقىرىم جەردە قىزمەتتەرىن اتقارۋعا تۋرا كەلدى.
بارلىق اسكەري-مەديتسينالىق مەكەمەلەر كوروناۆيرۋسپەن كۇرەسۋگە بەلسەندى اتسالىسىپ, وزدەرىنىڭ جوعارى دايىندىقتارى مەن كاسىبي بىلىكتىلىكتەرىن كورسەتتى.