"جاعالاۋ-3" تۇرعىن ءۇي كەشەنىنىڭ 30-شى بلوگىندا قاسبەتتىك جۇمىس اياقتالدى, اباتتاندىرۋ جۇمىستارى اياقتالۋ ساتىسىندا. تۇرعىن ءۇي كەشەنىن تۇراقتى ەنەرگيامەن جابدىقتاۋ جەلىلەرىنە قوسۋ بويىنشا جۇمىستار جۇرگىزىلۋدە. بۇل تۋرالى نۇر-سۇلتان قالاسىنىڭ اكىمى التاي كولگىنوۆ ءوزىنىڭ Instagram پاراقشاسىندا جازدى, دەپ حابارلايدى Egemen.kz.
«8 جىلدىق تاريحى بار قۇرىلىسى ۇزاققا سوزىلعان تاعى ءبىر نىساننىڭ قۇرىلىسى اياقتالۋعا جاقىن قالدى. «جاعالاۋ-3» تۇرعىن ءۇي كەشەنىندە ورنالاسقان 30-بلوكتا 600-دەن استام الدانعان وتباسى بار. تۇرعىندارمەن بىرنەشە رەت بولعان كەزدەسۋلەر بارىسىندا كەزەڭ-كەزەڭمەن قۇرىلىس كەستەسىن ازىرلەدىك. شەشىلمەگەن ماسەلەلەر كوپ بولدى. قازىرگى ۋاقىتتا ءۇي ورتالىق سۋمەن جابدىقتاۋعا, جىلۋ مەن كارىزگە قوسىلدى. تۇرعىن ءۇي كەشەنىن تۇراقتى ەنەرگيامەن جابدىقتاۋ جەلىلەرىنە قوسۋ بويىنشا جۇمىستار جۇرگىزۋدەمىز-قازىر ءۇي ۋاقىتشا ەلەكترمەن جابدىقتالۋدا.
قاسبەتتىك بولىك بويىنشا جۇمىستار اياقتالدى, اباتتاندىرۋ جۇمىستارى اياقتالۋ ساتىسىندا: ۇلكەن اۋلادان باسقا, فۋتبول جانە باسكەتبول الاڭىن ورناتۋ بويىنشا دا جۇمىس ىستەيمىز. جاقىن ارادا جۇمىسشىلار كىرەبەرىستەردى ىشكى ارلەۋگە كىرىسەدى, ليفتىلەردىڭ ءبىر بولىگىن ورناتتى, ولار بويىنشا جۇمىستار جالعاسۋدا.
«جاعالاۋ-3» 30-بلوك قۇرىلىسىن اياقتاپ, ءۇيدى بيىلعى جىلدىڭ سوڭىنا دەيىن پايدالانۋعا بەرۋدى جوسپارلاپ وتىرمىز. ۇلەسكەرلەر جاڭا جىلدى كوپتەن كۇتكەن پاتەرلەرىندە قارسى الا الادى.
سونىمەن قاتار, «جاعالاۋ-3» 28 جانە 29 بلوگىنىڭ قۇرىلىسىن اياقتاۋ بويىنشا جۇمىستار جۇرگىزۋدەمىز.
قۇرىلىسى ۇزاققا سوزىلعان نىسانداردىڭ قۇرىلىسىن قايتا باستاۋ جانە اياقتاۋ – وڭاي ماسەلە ەمەس, ءاربىر ءۇي جەكە جۇمىستى تالاپ ەتەدى. وسى باعىتتا ءتيىستى جۇمىستار جۇرگىزەمىز», – دەپ جازدى التاي كولگىنوۆ.