پاتەرلەر كىلتىن ەكىباستۇز تۇرعىندارىنا پاۆلودار وبلىسىنىڭ اكىمى ابىلقايىر سقاقوۆ تابىستادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
قونىستانۋشىلار جاڭا ءۇيدىڭ الدىندا ءوڭىر باسشىسىمەن بىرگە شىرشا وتىرعىزدى. ەكىباستۇزدىقتار بۇل اعاشتار 8-10 جىلدان كەيىن اۋلانىڭ ءارىن كىرگىزەتىنىنە سەنىمدى.
"بۇگىن "نۇرلى جەر" باعدارلاماسى اياسىندا 144 وتباسى پاتەر الاتىنىنا قۋانىشتىمىن. بيىل ەكىباستۇزدا اۋدانى 56 مىڭ شارشى مەترگە جۋىق تۇرعىن ءۇي پايدالانۋعا بەرىلەدى, بۇل 1000-نان استام پاتەر. قالادا مۇنداي كولەمدە تۇرعىن ءۇي قۇرىلىسى بولماعالى ءبىراز ۋاقىت بولدى. ءار وتباسىنا باقىت پەن اماندىق تىلەيمىن. سىزدەردى جاڭا قونىستارىڭىزبەن قۇتتىقتايمىن!" - دەپ اتاپ ءوتتى پاۆلودار وبلىسىنىڭ اكىمى ابىلقايىر سقاقوۆ.
العاش بولىپ پاتەر العاندار قاتارىندا گۇلميرا اسقاروۆا دا بار. كوپ بالالى, ءارى جالعىز ىلىكتى انا بۇل ءساتتى سەگىز جىل كۇتكەنىن جەتكىزدى.
"مەنىڭ ءبىرىنشى بالام مۇگەدەك, جولداسىم جوق, پاتەر كەزەگىندە تۇرعانىما سەگىز جىل بولدى. بۇگىن مەنىڭ توبەم كوككە جەتتى. نەشە جىلدان بەرى اڭساعان ارمانىم ورىندالدى. وسىنداي كەرەمەت ءۇي سالىپ بەرگەن مەملەكەت پەن قۇرىلىسشىلارعا العىسىم شەكسىز", - دەپ ول قۋانىشىن جاسىرا المادى.
جاڭا توعىز قاباتتى ءۇي پايدالانۋعا بەرىلگەن شاعىن اۋداندا تاعى ءتورت ءۇيدىڭ قۇرىلىسى اياقتالۋعا جاقىن. جوسپار بويىنشا جىل سوڭىنا دەيىن بۇل اۋلادا 432 وتباسى تۇراتىن بولادى.