قىرعىزستان پرەزيدەنتى وتستاۆكاعا كەتەدى

پرەزيدەنتتىڭ ءباسپاسوز قىزمەتى مەملەكەت باسشىسى ۇندەۋىنىڭ تولىق ءماتىنىن جاريالادى.

"قۇرمەتتى وتانداستار!

ەلىمىزدىڭ استاناسى بىشكەك قالاسىندا قوعامدىق-ساياسي جاعداي كۇردەلى بولىپ وتىر. كەشە جوگوركۋ كەنەش ۇكىمەت قۇرامىن بەكىتتى, مەن قىرعىز رەسپۋبليكاسى پرەزيدەنتىنىڭ ءتيىستى تاعايىنداۋلار تۋرالى جارلىعىنا قول قويدىم. بىراق بۇل شيەلەنىسكەن جاعدايدى قالپىنا كەلتىرمەدى. وكىنىشكە قاراي, اگرەسسيا ازايماعان.

مەنىڭ تەز ارادا وتستاۆكاعا كەتۋىمدى تالاپ ەتىپ جاتىر. قازىرگى جاعداي ەكىجاقتى قاقتىعىسقا جاقىن.

ءبىر جاعىنان – نارازىلىق بىلدىرۋشىلەر, ەكىنشى جاعىنان – قۇقىق قورعاۋشىلار. اسكەري قىزمەتكەرلەر مەن قۇقىق قورعاۋ ورگاندارى مەملەكەتتىك رەزيدەنتسيانى قورعاۋ ءۇشىن قارۋ قولدانۋعا مىندەتتى. مۇنداي جاعدايدا قان توگىلەتىنى ءسوزسىز. مەن ەكى تاراپتى دا ارانداتۋشىلىققا بەرىلمەۋگە شاقىرامىن.

قۇرمەتتى مەنىڭ وتانداستارىم!

مەن ءۇشىن قىرعىزستانداعى بەيبىتشىلىك, ەل بۇتىندىگى, حالقىمىزدىڭ بىرلىگى مەن قوعامداعى تىنىشتىق بارىنەن دە جوعارى. مەن ءۇشىن ءاربىر وتانداسىمنىڭ ومىرىنەن اسقان ەشتەڭە جوق. مەن بيلىككە تالاسپايمىن. قىرعىزستان تاريحىندا ءوز ازاماتتارىنا وق جاۋدىرىپ, قان توككىزگەن پرەزيدەنت رەتىندە قالعىم كەلمەيدى. سوندىقتان مەن وتستاۆكاعا كەتۋ جونىندە شەشىم قابىلدادىم. جاپاروۆ پەن باسقا ساياساتكەرلەردەن ءوز جاقتاستارىن ەل استاناسىنان الىپ كەتىپ, بىشكەك تۇرعىندارىنا بەيبىت ءومىردى قايتارىپ بەرۋدى سۇرايمىن. ەشقانداي بيلىك ەلىمىزدىڭ بۇتىندىگى مەن قوعامداعى تاتۋلىقتان ارتىق ەمەس. بارلىعىڭىزدى ءتاڭىر قولداسىن, تۋعان جەرىمىزدە بەيبىتشىلىك پەن تىنىشتىق بولسىن", دەلىنگەن ۇندەۋدە.